«Շիրակ» ՖԱ-ն, ինչպես հայտնի է, չնայած ՀՖՖ-ի կողմից Ազգային արտոնագիր ստանալուն, սահմանված ժամկետում՝ մինչև հունիսի 30-ը, VBET Հայաստանի Պրեմիեր Լիգային և ՀՀ Առաջին խմբի 2021/2022 մրցաշրջանին մասնակցելու հավաստագիր չի ներկայացրել։
Գյումրիի ակումբից ArmSport-ին տեղեկացրին, որ ուշացման պատճառը զուտ տեխնիկական խնդիրներն են եղել․
«Միայն կարող եմ ասել, որ շուտով մասնակցելու հայտ կուղարկենք։ Ուշացել ենք զուտ տեխնիկական պատճառներով»,- մեզ հետ զրույցում ասաց ակումբի մամուլի քարտուղար Արման Մալոյանը։
Մեր այն հարցին՝ արդյոք ՀՖՖ-ի հետ պայմանավորվածություն ձեռք բերե՞լ են հայտն ուշացումով ընդունելու վերաբերյալ, ակումբից նախընտրեցին չպատասխանել։
Տեղեկություն կար նաև, որ մասնակցելու դեպքում «Շիրակը» հանդես կգա միայն Առաջին խմբում։ ArmSport-ի հարցին՝ արդյոք VBET Հայաստանի Պրեմիեր Լիգայի՞, թե՞ ՀՀ Առաջին խմբի առաջնությանը մասնակցելու հայտ են ուղարկելու, Մալոյանը նշեց․
«Հայաստանում անցկացվող առաջնություններին»։
ՀՖՖ պաշտոնական կայքն ավելի վաղ հայտնել էր, որ VBET Հայաստանի Պրեմիեր Լիգայի և ՀՀ Առաջին խմբի 2021/2022 մրցաշրջանին մասնակցության հավաստագիր են ներկայացրել «Ալաշկերտ», «Արարատ», «Արարատ-Արմենիա», «Նոա», «Սևան», «Վան», «Փյունիկ», «Ուրարտու», ԲԿՄԱ, «Նորավանք», «Լեռնային Արցախ», «Ալաշկերտ-2», «Արարատ-Արմենիա-2», «Փյունիկ ակադեմիա» և «Ուրարտու-2» ակումբները։
Հավելենք, որ գալիք օրերին կկայանա ՀՖՖ Գործադիր կոմիտեի հերթական նիստը, որի ընթացքում կհաստատվեն VBET Հայաստանի Պրեմիեր Լիգայի և ՀՀ Առաջին խմբի առաջնություններին մասնակցող թիմերի քանակը և մրցաշարերի ձևաչափը։