Կարապետյանն առաջարկներ ուներ Հայաստանից և արտերկրից, բայց ընտրեց Նոան․ Արթուր Սահակյան

Երկրորդ տարին անընդմեջ Հայաստանի փոխչեմպիոն հռչակված «Նոան» նախապատրաստվում է Կոնֆերենցիաների լիգայի անդրանիկ խաղարկությանը։

Եվրագավաթներին ընդառաջ, սակայն, «Նոան» վերջերս հայտարարեց ռուս մասնագետ Դմիտրի Գունկոյի՝ թիմի գլխավոր մարզչի պաշտոնից հեռանալու մասին։ 45-ամյա մասնագետը 2020 թվականի հոկտեմբերից էր գլխավորում «Նոան», որի հետ ավարտված մրցաշրջանում դարձավ Հայաստանի փոխչեմպիոն։ Այսօր արդեն Գունկոն պաշտոնապես ստանձնեց «Արարատ-Արմենիայի» գլխավոր մարզչի պաշտոնը․

«Նոայի» գործադիր տնօրեն Արթուր Սահակյանն ArmSport-ի հետ զրույցում պատմել է եվրագավաթներին ընդառաջ մարզչական փոփոխության պատճառների, այս փուլում թիմի առաջին նորեկի՝ Հայաստանի հավաքականի հարձակվող Ալեքսանդր Կարապետյանի, սպասվելիք այլ փոփոխությունների և առաջիկա ծրագրերի մասին․

-Եվրագավաթներին ընդառաջ մարզչական փոփոխությունն ինչո՞վ էր պայմանավորված։

-Սա համատեղ որոշում էր՝ մարզչի և ակումբի կողմից։ Այսպես ստացվեց։ Մենք միայն բարին ենք մաղթում Դմիտրի Գունկոյին, որն իսկապես մեծ աշխատանք տարավ մեր թիմի ղեկին։ Նա մեր ակումբ եկավ պատերազմի թեժ պահին, չվախեցավ, թիմին տվեց կայունություն ու հասցրեց փոխչեմպիոնության։ Չնայած փոքր-ինչ տխրություն կա, քանի որ չդարձանք չեմպիոն, քանի որ ունեինք բավականին մեծ շանսեր, բայց ընդհանուր առմամբ մրցաշրջանը համարում ենք հաջողված։

-Դմիտրի Գունկոն բավականին մեծ աշխատանք էր կատարել թիմում։ Նրա հեռանալուց հետո թիմում տրամադրվածությունն ինչպիսի՞ն է։

-Իսկապես վերջին մրցաշրջանի ընթացքում բավականին մեծ աշխատանք է կատարվել, ու թիմի տրամադրվածությունը հիմա մարտական է։ Բարձր խանդավառությամբ պատրաստվում ենք եվրագավաթներին։ Խնդիրը մեկն է՝ հասնել խմբային փուլ։ Ինչ վերաբերում է մրցաշրջանին, ապա նպատակը մեկն է՝ դառնալ չեմպիոն։

-«Արարատ-Արմենիան» այսօր պաշտոնապես հայտարարեց Գունկոյի հետ պայմանագիր կնքելու մասին։ Ի՞նչ կասեք այս մասին։

-Կարող եմ միայն շնորհավորել «Արարատ-Արմենիային» բարձրակարգ մարզիչ ձեռք բերելու կապակցությամբ։

Ես շատ լավ կարծիքի եմ Դմիտրի Գունկոյի մասին, ով հոյակապ անձնավորություն է և բարձրակարգ մասնագետ։ Դմիտրի Գունկոյին միմիայն հաջողություններ եմ մաղթում իր կարիերայում։ Ինքս տեսել եմ նրա բարձր որակներն ու պրոֆեսիոնալիզմը։

-Իսկ նոր գլխավոր մարզչի նշանակման հարցում ի՞նչ նորություն կա։ Արտասահմանացի՞ մասնագետների եք դիտարկում։

-Գլխավոր մարզչի մի քանի թեկնածու ենք դիտարկում։ Առաջին հերթին՝ այո, արտասահմանցի, բայց տեղացի մարզիչների ևս դիտարկում ենք։ Այս հարցում դեռ վերջնական որոշում չենք կայացրել, մոտ ժամանակներս կկայացնենք։

-Եվրագավաթներին ընդառաջ թիմն ի՞նչ նախապատրաստություն է անցնելու։ Հստակություն կա՞ այս առումով։

-Թիմը հիմա գտնվում է արձակուրդում։ Այն ամենն, ինչ հիմա անում ենք սելեկցիոն աշխատանքներն են։ Ինչ վերաբերում է նախապատրաստական ծրագրերին, ապա չենք շտապում այն կազմել։ Նոր գլխավոր մարզիչն ինքը մեզ կտա իր ծրագիրը, որը կհաստատենք ու ըստ դրա կշարժվենք։

-Խոսեցիք սելեկցիոն գործընթացի մասին, թիմն ամառային տրանսֆերային պատուհանի առաջին ձեռքբերումն արդեն արել է՝ ի դեմս Ալեքսանդր Կարապետյանի։ Նրա տրանսֆերն ինչպե՞ս ստացվեց, ի՞նչ տրամադրվածությամբ է միացել «Նոային»։

— Ես դա լուրջ քայլ եմ համարում մեզ համար, քանի որ Ալեքսանդրը բարձր որակի հարձակվող է և ի զորու է իր արդյունավետ գործողություններով թիմի համար միավորներ վաստակելու։
Նա ունի մեծ մոտիվացիա՝ ամեն խաղին, հաղթանակին իր լուման ներդնելու ցանկություն։

Բանակցությունները վարել եմ ինքս և ինձ գրավեց նրա «Նոա» տեղափոխվելու ցանկությունը, քանի որ նա ուներ առաջարկներ ինչպես Հայաստանից, այնպես էլ արտերկրից։

-Իսկ այլ խաղացողների սպասո՞ւմ եք, որ միգուցե նախքան նոր մարզչի նշանակումն արդեն սկսել էիք բանակցությունները։ Ո՞ր դիրքերն ուժեղացման կարիք ունեն եվրագավաթներին ընդառաջ։

-Մինչև մարզչի նշանակվելը բանակցություններ ենք վարում հայ ֆուտբոլիստների հետ, որոնց հարցը համարում ենք առաջնահերթ։

Թիմը բոլոր օղակներում էլ ուժեղացման կարիք ունի։ Շեշտը դնում ենք մեր հնարավորությունների սահմաններում որակյալ ֆուտբոլիստների ընտրության վրա։ Չկա կոնկրետ ազգային ուղղվածություն։

-Վերջերս «Նոայից» հեռացավ թիմի առաջատար Վլադիմիր Ազարովը։ Կարելի՞ է ասել, որ սա լուրջ կորուստ է թիմի համար։ Ինչպե՞ս որոշեցիք նրան բաց թողնել։

-Ազարովն, այո, մեր առաջատար խաղացողներից մեկն էր, բայց նրա պայմանագրի ժամկետն ավարտվում էր ու նա ցանկություն հայտնեց այլ ակումբ տեղափոխվելու։

-Իսկ կա՞ն այլ ֆուտբոլիստներ, որոնք գուցե ևս հեռանան։

-Այո, կան խաղացողներ, որոնք պայմանագրերի ժամկետներն ավարտվել են ու նրանք հեռացել են թիմից։ Մոտ օրերս կտեղեկացնենք ինչպես հեռացողների, այնպես էլ նորեկների մասին