Կանոէի միջազգային ֆեդերացիան փոփոխություն է մտցրել կազմակերպչական հարցերում: Նախկինում մարզիկները մրցավայր էին մեկնում նավակներով: Հետայսու ամենուրեք կազմակերպիչները նոր նավակներ կտրամադրեն մասնակիցներին, հայտնում է ՀԱՕԿ-ի պաշտոնական կայքէջը:
Որոշումը կնպաստի մարզաձևի մասսայականացմանը և նոր մրցավայրերի ստեղծման գործին: Այս համակարգի շնորհիվ պատվիրակությունները կազատվեն ծանրաբեռնվածությունից և ավելի հեշտ կլինի մրցումների մեկնել-վերադառնալու գործընթացը:
Այդպես կլինի նաև Բառնաուլում, որտեղ այսօր կմեկնարկի մարզաձևի աշխարհի գավաթի խաղարկության երկրորդ փուլի մրցաշարը: Կազմկոմիտեն բառնաուլյան ստուգատեսի մասնակիցներին արդեն 300 նոր նավակներ է տրամադրել, որի համար ծախսել է 150 միլիոն ռուբլի:
Մրցաշարին հայտավորված է 57 երկրի ավելի քան 400 մարզիկ: Նրանց թվում են Հայաստանի պատվիրակներ Արա Վիրաբյանն ու Էդգար Թությանը:
Մրցումներում կխաղարկվեն օլիմպիական ուղեգրեր:
