Ալեքսանդր Գլիշիչ․ Սպորտում միշտ գնում ես հաղթելու ու կարևոր չէ՝ ում դեմ ես խաղում

VBET Հայաստանի Գավաթի կիսաեզրափակիչ պատասխան խաղում այսօր՝ ապրիլի 30-ին, «Ալաշկերտը», արտագնա խաղում 3-1 հաշվով հաղթեց «Նոային» ու դիմակայությունում ընդհանուր 4-2 հաշվով հաղթանակ տոնելով, դուրս եկավ մրցաշարի եզրափակիչ։

Խաղից հետո ArmSport-ը զրուցել է ալաշկերտցիների երկրորդ գոլի հեղինակ Ալեքսանդր Գլիշիչի հետ։

-Ալեքսանդր, ինչպիսի՞ն էր Գավաթի եզրափակիչ հասնելու ուղին։

-Եթե նայեք արդյունքներին, կարող է թվալ, թե դժվար էր միայն կիսաեզրափակիչը։ Բայց ես այդպես չեմ կարծում։ Որովհետև, օրինակ, քառորդ եզրափակչում, երբ խաղում էինք ԲԿՄԱ-ի հետ, շատ դժվար խաղ ստացվեց, թեպետ, արդյունքը դա չէր արտացոլում։ Բայց հավատացեք ինձ, դժվար էր։ Նրանք շատ տաղանդավոր երիտասարդ հայ ֆուտբոլիստներ ունեն, տաղանդավոր հայ մարզիչ և վստահաբար, նրանք հայկական ֆուտբոլի ապագան են։

Իսկ կիսաեզրափակիչ խաղերը դեռ թարմ են։ Բայց մենք հասկանում ենք, որ շատ լավ աշխատանք ենք անում ու ուրախ ենք, որ կարող ենք պայքարել տիտղոսի համար։ Իհարկե, դժվար էր, որովհետև խաղում էինք նախորդ տարվա հաղթողի դեմ, բայց վերջում մենք հաղթեցինք, կխաղանք եզրափակչում և շատ երջանիկ ենք։

-Կիսաեզրափակիչ առաջին խաղն ավարտվել էր 1-1 հաշվով, մտավախություն կա՞ր, որ չեք կարողանա անցնել «Նոային», այն էլ արտագնա խաղում։

-Իհարկե, ոչ։ Սպորտում դու միշտ գնում ես հաղթելու ու կարևոր չէ՝ ում դեմ ես խաղում։ Ես այդպես եմ սովորել կյանքում։ Այս թիմն այստեղ ոչ մեկից չի վախենում։ Մենք հարգում ենք նրանց, բայց հավատում էինք, որ կարող ենք հաղթել նրանց ու հասնել եզրափակիչ։

-Ինչի՞ հաշվին կարողացաք հաղթող դուրս գալ այս պայքարում։

-Կարծում եմ՝ ամենակարևորն այն էր, որ մենք հավատացինք։ Առաջին խաղից արդյունքը նրանց ավելի ձեռնտու էր, բայց մենք հավատում էինք, որ կարող ենք անցնել նրանց, հավատում էինք մեր թիմակիցներին, մարզչին ու արդյունքում, այս ամենը միասին մեզ հասցրին եզրափակիչ։

-Քեզ համար տարբերություն կա՞, թե եզրափակչում որ թիմը կլինի ձեր մրցակիցը։

-Ինձ համար, անկեղծ, ոչ։ Երկուսն էլ լավ թիմեր են։ Որ թիմն էլ անցնի, վստահաբար, դժվար ու հետաքրքիր խաղ է լինելու։

-Փաստացի, քո գոլն էր, որ հաղթանակի նժարը թեքեց «Ալաշկերտի» կողմը․ զգացողություններդ ինչպիսի՞ն էին։

-Բոլոր գոլերը կարևոր են, բայց, գուցե, այո, եթե նայենք, որ իմ գոլից հետո նրանք պիտի երկուսը խփեին, որպեսզի դուրս գային եզրափակիչ։ Իսկ զգացողությունների մասին,,,ես երջանիկ էի, իհարկե, ինչպես ցանկացած հարձակվող, որը գոլ է խփում։ Մենք միշտ գոլի ծարավ ենք։

-Ի՞նչ է պետք եզրափակչում հաջողության հասնելու համար։

-Օհ, շատ բան։ Առաջին հերթին, հավատալ, ինչպես արդեն ասացի, հետո խաղալ մեր իմացած խաղը, լավ պատրաստվել մրցակցի դեմ ու մի փոքր էլ բախտ ունենալ․ նման խաղերում դա ևս կարևոր է։

-Իսկ եթե եզրափակչում թիմը լինի առանց մարզչի, դա հոգեբանորեն կարո՞ղ է ազդել թիմի և ապա՝ արդյունքի վրա։

-Լավ հարց է։ Դա մեզ համար, վստահաբար, մինուս կլինի, բայց առաջին անգամը չէ, որ մենք նման իրավիճակում ենք։ Մենք բոլորս գիտենք՝ ինչ անել․․․Հուսով եմ՝ դա մեզ վրա չի ազդի ու կխաղանք այնպես, ասես նա խաղադաշտի մոտ է։

Հիշեցնենք, որ VBET Հայաստանի Գավաթի եզրափակչի մյուս մասնակիցը հայտնի կդառնա վաղը՝ «Արարատ-Արմենիա»-«Արարատ» խաղում։ Առաջին խաղում «Արարատը» հաղթել է 2-0 հաշվով։

Ստելլա Բաբլոյան

                                                                                                    Լուսանկարները՝ ՀՖՖ պաշտոնական կայքի