- Երբ չի մնում ելք ու ճար, խենթերն են գտնում հնար…
Հայ Մեծ բանաստեղծ Պարույր Սևակի խոսքերը Հայաստան-Իսլանդիա հանդիպման ժամանակ գրված էին ՖԱՖ-ի պաստառի վրա: Իրականում, այդ խոսքերի տրամաբանության սահմաններում էլ կարողացանք 2 գոլ խփել. և՛ Բարսեղյանը, և՛ Բայրամյանն անհատական որակներ դրսևորեցին ու 2 անգամ Հալդոուրսոնին ստիպեցին գնդակը հանել սեփական դարպասից:
Առաջին անգամ ընտրական փուլերի պատմության մեջ Հայաստանի հավաքականը մեկնարկեց 2 հաղթանակով. հաղթանակներ, որոնք օրինաչափ էին: 2 խաղ, 2 չոր հանդիպում, խփած 3 գնդակ: Մեր ընտրանին այժմ J խմբում Գերմանիայի հետ 6 միավորով կիսում է առաջատարությունը: ՖԻՖԱ-ն Հայաստանի հավաքականին բնութագրել է որպես խմբի ֆավորիտների ահ ու սարսափ: Սա, կարծում եմ, արդեն իսկ պարտավորեցնող է: Ի՞նչն է կարևոր այս պահին. չկորցնել միավորներ այնպիսի խաղերում, որտեղ պարտավոր ենք հաղթել, որպեսզի հետագայում չապրենք նույն ափսոսանքը, ինչն ապրեցինք ԵՎՐՈ-2012-ի ընտրական փուլում (անտեղի միավորներ կորցրեցինք Հյս. Մակեդոնիայի դեմ խաղում, որը վերջում դարձավ ճակատագրական):
Ռումինիայի դեմ խաղին մեր հավաքականը մոտենում է հոգեբանական վերելքով, իսկ հյուրերը Երևան են եկել պարտված: Ճիշտ է, Գերմանիայից նվազագույն հաշվով կրած պարտությունը ձախողում չէ, բայց պարտությունը մնում է պարտություն: Դիտելով Ռումինիա-Գերմանիա հանդիպումը` կարող ենք վստահ ասել, որ, մեղմ ասած, հեշտ խաղ չի սպասվում: Գերմանիան կարող էր և չհաղթել, եթե ռումինացիները վերջում կարողանային օգտագործել իրենց տրված պահերից գոնե մեկ պահը, սակայն արդարության համար պետք է փաստենք, որ Լյովի թիմն ամբողջ ներուժով չէր խաղում, ասել է թե՝ «մեկ ոտքով»:
Ռումինիան խնդիրներ ունեցավ խմբային փուլի առաջին տուրում: Հյս. Մակեդոնիայի դեմ խաղում քիչ էր մնում, որ գրեթե կայացած հաղթանակը Ռեդոյի թիմը բաց թողներ: 82-րդ ու 83-րդ րոպեներին Անգելովսկու սաները 2 գնդակ խփեցին ու մոտ էին հրաշքին, սակայն 86-րդ րոպեին Հաջին կարողացավ 3 միավոր պարգևել իր հավաքականին: Մակեդոնացիները բավականին հավասար ֆուտբոլ խաղացին մրցակցի հարկի տակ ու, առաջին հերթին, մեզ ցույց տվեցին, որ կարող ենք 3 խաղից հետո ունենալ 9 միավոր:
Ռումինիայի նկատմամբ մենք առայժմ հաղթանակ չունենք: Հանդիպել ենք 5 անգամ` 1 ընկերական և 4 պաշտոնական խաղերի շրջանակում: Մունդիալ-2006-ի ընտրական փուլի տնային խաղն ավարտվել է 1-1 հաշվով: Մեր թիմի կազմում միակ գոլը խփել է Կարեն Դոխոյանը: Պատասխան խաղում ռումինացիները հաղթեցին 3-0 հաշվով:
2006 թ-ին Կիպրոսում կայացած ընկերական խաղում պարտվել ենք 0-2 հաշվով:
Այնպես է ստացվում, որ ռումինացիների հետ հանդիպում ենք միայն մունդիալների ընտրական փուլում: 2018 ԱԱ ընտրական փուլում մեր մրցակիցների թվում էր կրկին Ռումինիան: Երևանյան խաղը կատարյալ ֆիասկո էր. մեկնարկում՝ կարմիր քարտ ու 11 մետրանոց, իսկ արդյունքում պարտվեցինք 0-5 հաշվով: Պատասխան խաղում պարտվեցինք 0-1 հաշվով, իսկ գոլն ընդունեցինք ավելացված ժամանակում:
Գաղտնիք չէ, որ խիտ գրաֆիկի պայմաններում ցանկացած դետալ մեծ ազդեցություն կարող է ունենալ: Այս պարագայում, մի քանի գործոն մեր օգտին է.
- Կրկին խաղում ենք Երևանում, իսկ մրցակիցը ճանապարհ է անցել
- Մենք հաղթել ենք, Ռումինիան՝ պարտվել
- Ամենակարևոր գործոնը՝ երկրպագուների՝ տրիբունաներում ներկայությունը
Ռումինիայի հավաքականում սերնդափոխություն է, և բավականին երիտասարդ կազմ է մասնակցում այս ընտրական փուլին:
- Հավանական մեկնարկային կազմ.
Նախորդ խաղի հետխաղային ասուլիսին Խոակին Կապառոսը նշեց, որ հաջորդ խաղում ևս ռոտացիայի է դիմելու: Հաշվի առնելով, որ նախորդ 2 խաղում խաղացել ենք 4-4-2 մարտավարությամբ, կարելի է ենթադրել, որ այս խաղում ևս կխաղանք նույն սխեմակով.
Դարպասում կլինի Դավիթ Յուրչենկոն:
Պաշտպանության կենտրոնում, ամենայն հավանականությամբ, կտեսնենք Հարոյան-Չալըշըր զույգը: Նախորդ խաղում անթերի հանդիպում անցկացրեց Հարոյանը, իսկ Տարոն Ոսկանյանը մի քանի դրվագում անփույթ գործեց, երբեմն էլ դիրքային սխալներ էր թույլ տալիս, բայց, ընդհանուր առմամբ, վատ հանդիպում չանցկացրեց: Հաշվի առնելով, որ հանգստացել է Չալըշըրը, իսկ Կապառոսը ռոտացիա սիրում է, մեկնարկային կազմում կլինի վերոնշյալ զույգը: Աջ եզրում կլինի Հովհաննես Համբարձումյանը, իսկ ահա ձախ եզրում, ինչպես նախորդ 2 խաղում, կլինի Կամո Հովհաննիսյանը:
Կիսապաշտպանության կենտրոնում կրկին կտեսնենք Գրիգորյան-Ուդո զույգը: Ձախ եզրում կրկին մեկնարկային կազմում խաղադաշտ դուրս կգա Խորեն Բայրամյանը, իսկ աջում կլինի Տիգրան Բարսեղյանը: Նույնիսկ, եթե խաղին պատրաստ լինի Գևորգ Ղազարյանը, միանշանակ, մեկնարկային րոպեներից նա դաշտ դուրս չի գալ:
Հարձակման գծում այս անգամ խաղադաշտ դուրս կգա Ալեքսանդր Կարապետյանը, իսկ նրա կողքին, կարծում եմ, կտեսնենք Սարգիս Ադամյանին:
Հավաքականի վերջին խաղերում մենք հստակ ձեռագիր ենք տեսնում: Ի վերջո, մեր ընտրանին վերջին 7 խաղում անպարտելի է: Մեր հավաքականը երբեք անպարտելիության նման շարք չի ունեցել: Կարելի է ենթադրել, որ ինչպես Իսլանդիայի դեմ խաղում, այնպես էլ վաղը գնդակը կզիջենք մրցակցին ու կապավինենք արագ հակագրոհներին: Այդ պարագայում իրենց արագությունն ու կրեատիվությունը ևս մեկ անգամ ցուցադրելու հնարավորություն կստանան առջևի գծի մեր խաղացողները:
Հաղթանակի դեպքում մեր առջև շատ ավելի մեծ հեռանկարներ կբացվեն: Հաջորդ խաղն անցկացնելու ենք մակեդոնացիների հետ: Իսկ հետո կմրցենք Գերմանիայի ու Լիխտենշտեյնի հետ, իսկ դա նշանակում է, որ 6 տուրից հետո կարող ենք 15 միավոր ունենալ, իսկ 15 միավոր ունեցող հավաքականի հետ կատակ չեն անում:
Աստծո օրհնությամբ, հզոր հավատքով միշտ պատրաստ ենք մարտի…
Արմեն Գարամյան
