«Իմ թիմից հեռանալու պատճառները ոչ մի կապ չունեն ֆինանսների հետ, դա ուրիշ հարթության մեջ է և չեմ անդրադառնա այդ պատճառներին»,-այս մասին ArmSport-ի հետ զրույցում ասաց Կարեն Բարսեղյանը՝ ի պատասխան այն խոսակցություններին, թե իբրև իր՝ ակումբից հեռանալու պատճառը կապված է եղել գումարների անհետացման հետ:
«Ես երկու ամիս առաջ հարցազրույց տվեցի, բայց փակագծերը ամբողջությամբ չբացեցի: Անընդհատ զանգեր եմ ստանում ու որոշ զանգված հետաքրքրվում է ֆինանսական հարցերի շուրջ: Ես ուզում եմ այս հարցը պարզաբանել մեկընդմիշտ: Անկեղծ ասած, ես չէի ցանկանա խոսել, բայց ամեն դեպքում պարզաբանեմ: Խոսակցություններ կան իբրև ակումբում 15 մլն չկա և այլն: Ասեմ, որ «Վանի» ստեղծման օրվանից բոլոր գումարները ես եմ տնօրինել՝ իհարկե ակումբի նախագահի թույլտվությամբ: Ոչ միայն 15 մլն, այլ ավելի մեծ գումարներ ենք տնօրինել, որը ծառայել է ի շահ ակումբի: Այդ գումարն իհարկե ինձ մոտ է եղել, քանի որ անձամբ ես էի տնօրինում ֆուտբոլիստների աշխատավարձերը, վարձակալության գումարները և այլն: Քանի որ ինձ հետ ամեն ինչ ամպրոպի պես կայծակնային եղավ ու իմ չաշխատելու որոշումը միանգամից կայացվեց, այդ գումարն իհարկե իմ մոտ էր, և մինչև ես ստացա բոլոր հարցերի պատասխանները, ես այդ գումարը վերադարձրեցի ակումբին, ու բացարձակ ոչ մի ֆինանսական խնդիր չկա:
Ուզում եմ բոլորը հասկանան, քանի որ մեր իրականության մեջ մարդիկ, ովքեր իրենցից բան չեն ներկայացնում կամ անտեղյակ են, փորձում են պղտոր ջրում ձուկ որսալ: Իրենց համար շատ հարմար առիթ է, որ նման բաների մասին մտածեն կամ խոսեն: Նորից եմ կրկնում՝ ֆինանսական խնդիրներ չեն եղել: Գումարն ինձ մոտ է եղել, որոշ հարցեր են եղել, և դրանց պարզաբանումներից հետո գումարը վերադարձվել է ակումբին:
Ես ֆուտբոլի մեջ առաջին օրը չեմ ու ամբողջ կյանքս եմ նվիրել ու գիտեմ, որ ֆուտբոլի մեջ պետք է առավելագույնս ազնիվ լինել: Թող շատերը փորձեն գոնե իմ կեսի չափ ներդրում ունենալ հայկական ֆուտբոլի մեջ: Համենայնդեպս, ես ինքս մեր հովանավորների ու ակումբի ղեկավարների շնորհիվ թիմ եմ ստեղծել իմ համախոհների հետ միասին, որն ահռելի մեծ աշխատանք է, և նսեմացնել այդ աշխատանքը՝ ոչ մեկին թույլ չեմ տա»,-ասում է Կարեն Բարսեղյանը:
Մասնագետի խոսքով ինքը երբևէ խնդիրներ չի ունեցել ակումբի ղեկավարության հետ.
«Ակումբի ղեկավարության հետ ես բացարձակ ոչ մի խնդիր չեմ ունեցել, չունեմ ու հուսով եմ՝ չեմ էլ ունենա: Մենք ամեն ինչ արել ենք մաքսիմալ նվիրված, արել ենք ամեն ինչ, որ մեր ակումբը լինի լավագույններից մեկը: Չունենալով այն բյուջեն, որն ունեն մեր մյուս ակումբները, այնպես ենք արել, որ դա մեր խաղի ու կազմակերպվածության վրա չի երևացել»,-նշում է Բարսեղյանը:
Եթե ակումբի ղեկավարության հետ ոչ մի խնդիր չի եղել, այդ դեպքում ի՞նչը կարող էր պատճառ դառնալ ակումբից հեռանալու, ինչպես Բարսեղյանն է ասում՝ «ամպրոպի պես կայծակնային» որոշման համար։ Կարեն Բարսեղյանը, չնայած տարատեսակ խոսակցություններին, հրաժարվում է լույս սփռել իրական պատճառների վրա։
«Ես նորից պետք է կրկնեմ, որ այդ հեռանալու պատճառները պետք չէ փնտրել ֆուտբոլի մեջ, որովհետև ֆուտբոլային առումով մենք մեծ աշխատանք ենք կատարել, որը տեսանելի է բոլորի համար: Իհարկե այդ ամենն արել ենք ակումբի ղեկավարի ու հովանավորների օժանդակությամբ: Այսինքն ակումբի նախագահի հետ խոսելուց հետո որոշում ենք կայացրել, որ գոնե այս պահի համար մենք պետք է առանձնանանք, բայց պատճառների մասին նորից կլռեմ ու կասեմ, որ ֆուտբոլային չեն»,-նշում է Բարսեղյանը:
Նրա խոսքով ոչինչ չի կարելի բացառել, ու հնարավոր է մի օր նորից հայտնվի Չարենցավանի թիմում: «Կյանքն այնպիսին է, որ ոչինչ չի կարելի բացառել: Ոչ մեկ չգիտի՝ ով որտեղ է հայտնվելու վաղը, կամ ով ինչ պատասխան է տալու իր արածների համար: Ժամանակը ցույց կտա՝ կտեսնենք: Ես նորից եմ կրկնում՝ մինչև դեկտեմբերի 28-ը շատ երջանիկ եմ եղել ակումբում»,-ասում է Բարսեղյանն ու հավելում, որ «Վանում» աշխատելու ընթացքում չեն եղել այնպիսի մեծ խնդիրներ, որոնք իրեն չգոհացնեին։ «Բացարձակ այդպիսի բան չկա, որ ասեմ ինձ չէր գոհացնում: Մենք աստիճանաբար՝ քայլ-առ-քայլ շարժվում էինք առաջ ու նպատակ չէինք դրել այս տարի միանգամից չեմպիոնություն նվաճել, քանի որ հասկանում էինք մեր ներուժն ու հնարավորությունը: Այսինքն, ամեն ինչ արել ենք աստիճանաբար ու կարծում եմ, որ մենք ճիշտ ճանապարհի վրա էինք: Իսկ մեր արած աշխատանքի գնահատականը տալիս է երկրպագուն, ղեկավարը, հովանավորն ու նախագահը, ովքեր տեսել են, թե ինչ ենք արել: Ես այնտեղ ֆուտբոլային առումով խնդիրներ չեմ ունեցել: Իհարկե տեղային խնդիրներ եղել են, որոնք լուծվել են»,-ասում է Բարսեղյանը:
45-ամյա մասնագետն այս ընթացքում մեկ նախագծի վրա է աշատում, որի մասին բարձրաձայնել չի ցանկանում: Նրանից տեղեկանում ենք, որ հիմա հաճախում է առաջնության խաղերին, փորձում հասկանալ թիմերի պոտենցիալը, ինչպես նաև սպասում է նոր աշխատանքի համար առաջարկի:
Խոսելով ՀՊԼ-ի ընթացիկ առաջնության մասին՝ Բարսեղյանը նշում է. «Առաջնությունը հետաքրքիր է նրանով, որ գրեթե բոլոր թիմերն ակնհայտ հավասար են: Այսօր գուշակել, թե ինչպես կավարտվի հանդիպումը՝ շատ բարդ է: Նույնիսկ ետնապահները միավորներ են վաստակում առաջատարների հետ: Այս իրավիճակում կարծում եմ՝ ում նյարդներն ավելի պինդ լինեն և ով մի քանի հանդիպում իրար հետևից կարողանա հաղթել՝ ավելի մեծ հնարավորություն կունենա չեմպիոն դառնալու, որովհետև ամեն ինչ շատ խառն է ու անկանխատեսելի»,-ասում է Բարսեղյանը:
Անդրադառնալով լեգիոներների սահմանափակման նոր ձևաչափին Բարսեղյանը գնահատում է, որ ՀՖՖ-ի այս որոշումը շատ ճիշտ էր։ «Լեգիոներների սահմանափակման հետ կապված ինձ թվում է այս ձևաչափը ճիշտ է ընտրված: Հուսով եմ, որ մյուս տարի կավելացնենք տեղացի ֆուտբոլիստների քանակը: Մի առաջարկությամբ դիմել եմ ֆեդերացիայի նախագահին, երբ հանդիպել եմ իր հետ: Ես ոչ մի կերպ չեմ կարողանում հասկանալ, թե ոնց կարող է ակումբն ունենալ 2 արտասահմանցի դարպասապահ: Սա շատ լուրջ խնդիր է մեր դարպասապահների համար, հատկապես, որ այսօր ունենք բավականին հեռանկարային ու փորձառու դարպասապահներ, որոնք պետք է մրցակցեն գոնե մեկ արտասահմանցի դարպասապահի հետ: Առաջարկություն արել եմ և կուզեմ, որ դարպասապահներից գոնե միայն մեկը լինի արտասահմանցի ու մրցակցությունը լինի մեկ արտասահմանցի ֆուտբոլիստի հետ»,-ասում է Բարսեղյանը:
«Ինձ համար հաճելի է, որ Ուրարտուի կազմում «Արարատ-Արմենիայի» հետ խաղին մասնակցում էր մեր հեռանկարային ֆուտբոլիստներից մեկը՝ Էրիկ Սիմոնյանը: Սա շատ գովելի է: Ես ժամանակին առաջարկով եմ հանդես եկել, որ եթե մինչև 19 տարեկան հավաքականի ֆուտբոլիստները ներգրավվում են իրենց թիմի հիմնական կազմում կամ փոխարինման են մտնում, պետք է ֆեդերացիան խրախուսի և ֆինանսապես աջակցի այդ ակումբներին, ինչը կհանգեցնի նրան, որ թիմերը կմտածեն երիտասարդ ֆուտբոլիստներին ներգրավելու մասին: Իհարկե բարդություններ կլինեն, բայց մեծ ցանկության դեպքում կարծում եմ դա կաշխատի ու մեծ օգուտ կտա հայկական ֆուտբոլին»,-եզրափակեց Կարեն Բարսեղյանը:
