Եվրագավաթ հայկական շնչով, թոփ ակումբներով ու մեծ հնարավորություններով․ մեկնարկում է Եվրոպա լիգայի փլեյ-օֆֆ փուլը

Ակումբային ֆուտբոլի ամենահեղինակավոր երկրորդ մրցաշրջանը՝ Եվրոպա լիգան ևս վերադառնում է։ Ֆուտբոլասերների համար այսուհետ հետաքրքիր երեկոներ են սպասվում նաև Չեմպիոնների լիգայի խաղային օրերից հետո։

Եվրոպա լիգան, իհարկե, զիջում է Չեմպիոնների լիգային, սակայն այստեղ քիչ չեն այն թիմերը, որոնք հաջողությամբ հանդես կարող էին գալ նաև ակումբային ֆուտբոլի ամենահեղինակավոր մրցաշարում։ Այստեղ են «Մանչեսթեր Յունայթեդը», «Ռոման», «Տոտենհեմը», «Միլանը», «Այաքսը», «Նապոլին», «Արսենալը», «Բայերը»։ Սրանք թիմեր են, որոնց ներկայությունը այս մրցաշարում է՛լ ավելի հետաքրքիր է դարձնում Եվրոպա լիգայի փլեյ-օֆֆ փուլը։

Իհարկե, քիչ չեն այն թիմերը, որոնք կցանկանային ավելի շուտ խաղալ ՉԼ-ում, այլ ոչ թե այստեղ։ Վառ օրինակ է «Ման Յունայթեդը», որը Չեմպիոնների լիգայի խմբային փուլում տապալեց վերջին տուրերն ու խմբից փլեյ-օֆֆ փուլ դուրս գալու փոխարեն ուղեվորվեց ԵԼ։ Հատկանշական է, որ «Ման Յունայթեդը» բավականին բարդ մրցակից ունի 1/16 եզրափակիչում։ Օլե-Գունար Սուլշերի սաներին դիմակայելու է իսպանական մի շատ ամուր կոլեկտիվ՝ «Ռեալ Սոսիեդադը»։

Անգլիական թիմերից Եվրոպա լիգայում մեծ նպատակներ են իրենց առաջ դնելու լոնդոնյան երկու թիմերը՝ «Արսենալն» ու «Տոտենհեմը»։ Հյուսիսլոնդոնյան այս երկու թիմերը Պրեմիեր լիգայում բարդագույն օրեր են ապրում, ու բարդ է պատկերացնելը, թե ինչպես են հայտնվելու լավագույն քառյակում։

«Արսենալի» պարագայում դա անիրական է թվում, «Տոտենհեմի» պարագայում՝ անհավանական։ Ժոզե Մոուրինյոյի թիմի մրցակիցը «Վոլֆսբերգերն» է, իսկ «Արսենալը» փլեյ-օֆֆ փուլը սկսում է «Բենֆիկայի» հետ արտագնա խաղով։ Ի դեպ, անգլիական թիմերից այստեղ է նաև «Լեսթերը»։ Բրենդան Ռոջերսի սաները հիասքանչ տեսք ունեն ԱՊԼ-ում, սակայն փորձելու են առավելագույնն անել նաև ԵԼ-ում։

Այս մրցաշրջանը կարելի է համարել եվրոպական ֆուտբոլի գլխավոր գրանդներից մեկի վերադարձի մրցաշրջան։ Խոսքը, իհարկե, «Միլանի» մասին է։ Ա սերիայում նրանք մինչև անցած տուրն առաջատար էին, իսկ հիմա շարունակում են պայքարը Եվրոպա լիգայում։

«Միլանի» մրցակիցը «Ցրվենա Զվեզդան» է։ Թեպետ «ռոսոներիները» այս տարի պետք է որ Իտալիայի առաջնությունից նվաճեն Չեմպիոնների լիգայի ուղեգիր, բայց և այնպես դեմ չեն լինի Եվրոպա լիգայում առաջ գնալուն ու նաև հաղթելուն։

Եվրոպա լիգան առանձնահատուկ ուշադրության է արժանանալու հայ երկրպագուների համար։ Նախ այստեղ է «Ռոման»։ Պաուլու Ֆոնսեկայի սաները մրցաշարի գլխավոր ֆավորիտներից են իրենց ցուցադրած տպավորիչ խաղով, արդյունավետ ֆուտբոլով և, իհարկե, Հենրիխ Մխիթարյանով։

Հայ կիսապաշտպանն ու ընկերները պայքարը փլեյ-օֆֆում կսկսեն «Բրագայի» դեմ արտագնա խաղով։ Ճիշտ է, «Ռոմային» հեշտ չի լինելու հենց սկզբից։ «Բրագան» Պորտուգալիայի առաջնությունում երրորդն է ու բավականին լավ տեսք ունի։

Հայկական գվարդիայի անդամներից Եվրոպա լիգայում է նաև Սարգիս Ադամյանը գերմանական «Հոֆենհայմով»։ Ճիշտ է, այս մրցաշրջանը Ադամյանի համար բարդ է դասավորվում։ Վնասվածք, հետո կորոնավիրուս։ Ադամյանը գրեթե չի լինում իր թիմի մեկնարկային կազմում։ Այս ամենի ֆոնին «Հոֆենհայմի» վերջին արդյունքները հուսադրող չեն։ Ինչևէ Ադամյանի թիմի մրցակիցը «Մոլդեն» է։ Այսպիսի դիմակայություններում բարդ է հասկանալ, թե ինչ է լինելու։

Երեկ հայկական ֆուտբոլի ռադարները արագորեն իրենց ուրույն տեղը գտան ռուսական «Կրասնոդարի» վրա։ Հայտնի դարձավ, որ հայ երիտասարդ կիսապաշտպան Էդուարդ Սպերցյանը հանդես է գալու Հայաստանի ազգային հավաքականում։

Ճիշտ է, հանուն արդարության պետք է ասենք, որ Սպերցյանը այդքան հաճախ չի խաղում «Կրասնոդարի» կազմում, ու սա բնական է։ Նա դեռ 20 տարեկան է։ Ճիշտ է, Սպերցյանը Չեմպիոնների լիգայի ընթացիկ մրցաշրջանում 2 հանդիպում է անցկացրել ռուսական թիմի կազմում՝ խաղալով «Սևիլիայի» ու «Չելսիի» հետ։ Այնպես որ, հետայսու պետք է ընդգծել նաև «Կրասնոդարի» խաղերը։ Ռուսական թիմի մրցակիցը 1/16-ում Զագրեբի «Դինամոն» է։

Անկանխատեսելի եվրագավաթը․․․Այո՛, հենց այդպիսին է Եվրոպա լիգան։ Այստեղ ամենակարևոր պահերին սայթաքում են անգամ եվրագավաթներում ամենաբազմափորձ թիմերը։ Դա գուցե քիչ մոտիվացիա ունենալու պատճառով է։ Այո՛, երբեմն թոփ թիմերը չեն կարողանում ինչպես հարկն է կենտրոնանալ ԵԼ-ի խաղերին, մինչդեռ մյուս թիմերը ամեն ինչ են դնում այս մրցաշարում։

Արամ Սահակյան