ՕԽ-ի մասնակցությունից մինչև Երևանում աշխարհի առաջնության անցկացում. Սուսերամարտի ֆեդերացիան լավատեսորեն է տրամադրված

Սուսերամարտի օլիմպիական հերթափոխի մանկապատանեկան մարզադպրոցում մեկնարկել է Հայաստանի երիտասարդական առաջնությունը, որին մասնակցում է շուրջ 100 մարզիկ՝ Երևանից, Գյումրիից և Վանաձորից:  

Այսօր՝ մրցումային առաջին օրը մրցահարթակ էին դուրս եկել խոցասուսերակիր տղաներն ու ճկասուսերակիր աղջիկները: Արդեն հայտնել ենք, որ խոցասուսերակիրների պայքարում Հայաստանի չեմպիոն դարձավ Աշոտ Խալաթյանը:

16-ամյա մարզիկը, չնայած առաջին անգամ նվաճեց Հայաստանի առաջնության ոսկե մեդալ, սակայն գոհ չէր իր ելույթից. «Իմ կարծիով մարզիկը երբեք չպետք է գոհ լինի իրենից, քանի որ եթե գոհ եղավ, ուրեմն արդեն պարտված է: Կարող էի ավելի լավ հանդես գալ: Ամեն մրցումից սովորում եմ նոր բաներ և փորձում հաջորդին ավելի լավ հանդես գալ: Այս առաջնությանը մասնակցելն ու հաղթելը ինձ մեծ վստահություն տվեց»,-ArmSport-ի հետ զրույցում ասաց Հայաստանի երիտասարդական առաջնության նորընծա չեմպիոնը: Մինչ այս Աշոտ Խլղաթյանի լավագույն արդյունքը եղել է 2018-ին՝ Վրաստանի միջազգային մրցաշարի երկրորդ տեղը, իսկ պատանի սուսերամարտիկի երազանքն Օլիմպիական չեմպիոն դառնալն է:

Հավաքականի գլխավոր մարզիչ Արմեն Նավասարդյանի խոսքով երիտասարդների թիմում կան հեռանկարային մարզիկներ, ովքեր հաջողությամբ կփոխարինեն մեծահասակներին. «Ունենք լավ արդյունքներ ու լավ երիտասարդ մարզիկներ, որոնք արժանիորեն կփոխարինեն մեծահասակներին: Նախորդ տարվա համեմատ  մասնակիցների թվի մի փոքր աճ կա»,-ասաց հավաքականի մարզիչը:

Այս առաջնության արդյունքներով կորոշվի, թե ովքեր են մասնակցելու առաջիկա մրցաշարերին:  «Պատրաստվում ենք մի շարք մրցաշարերի, այդ թվում նաև Աշխարհի առաջնության: Թիմը կմեկնի հավաքի այս մրցումներից հետո և կնախապատրաստվի ապրիլի սկզբին Կահիրեում կայանալիք աշխարհի առաջնությանը:

Նախորդ տարի կորոնավիրուսի համավարակը  ազդեցություն ուենցավ նաև սուսերամարտ մարզաձևի վրա:  Հավաքականի մարզչի խոսքով մարզումները միշտ էլ ընթացել են՝  հակահամաճարակային կանոնները պահպանելով: Այդ իրավիճակն ազդել է սուսերամարտիկների մարզավիճակի վրա, սակայն հիմա կամաց-կամաց ամեն ինչ վերականգնվում է:

Անկախ Հայաստանի պատմության լավագույն արդյունքը  եղել է 2017 թվականին: Աշխարհի առաջնությունում 8-րդ տեղն է գրավել Էմմա Պողոսովան: Ֆեդերացիայի նախագահ Արմեն Գրիգորյանի խոսքով մարզաձևի մասսայականությունն այնքան էլ մեծ չէ Հայաստանում, բայց ամեն ինչ արվում է այդ ուղղությամբ: 

2018 թվականին Հայաստանում  սուսերամարտի Եվրոպայի մինչև 23 տարեկանների առաջնությունն անցկացնելուց հետո երկրում մարզաձևի նկատմամբ հետաքրքրությունը և սուսերամարտով զբաղվողների թիվը  մեծացել է. «Այո, սուսերամարտի նկատմամբ հետաքրքրությունը մեծացել է: Եվրոպայի երիտասարդական առաջնությունն անցկացնելուց հետո մեր պլաններում է նաև մեծահասակների Եվրոպայի առաջնությունը Երևանում անցկացնելը, բայց դրան հասնելու համար պետք է մի քանի միջազգային մրցաշարեր հյուրընկալենք, նաև բյուջեն պետք է բավականացնի: Նախնական պայմանավորվածություններ ունենք միջազգային ֆեդերացիայի հետ և խոսք են տվել յուրաքանչյուր պահին կարող են վերանայել ու օգնել մեզ: Դա իրոք կլինի մարզական մեծ տոն, և սուսերամարտով զբաղվողների թիվն ավելի շատ կլինի»:

Անդրադառնալով  Հայաստանի առաջնությանն ու առաջիկա անելիքներին՝ ֆեդերացիայի նախագահն ասաց. «Այս տարին մենք սկսեցինք Հայաստանի առաջնությունով: Այս մրցաշարից հետո կկազմավորվի Հայաստանի հավաքականը, որը հավաք կանցկացնի Ծաղկաձորում ու կնախապատրաստվի Աշխարհի երիտասարդական առաջնությանը: Այս տարի ունենք նաև վարկանիշային մրցաշարեր, որին նույնպես նախապատրաստվում ենք: Մենք ունենք 3 առաջատարներ, որոնք նախորդ տարվանից են պատրաստվում վարկանիշային մրցաշարերին: Ամեն ինչ առջևում է: Ֆեդերացիան աշխատում է բնականոն հունով: Մենք կանենք ամեն ինչ, որ լրացնենք 2020 թվականին հասկանալի պատճառներով առաջացած բացերը»,-ասաց Գրիգորյանը:

Նշենք, որ մրցումային առաջին օրվան ներկա էր նաև ԿԳՄՍ փոխնախարար Կարեն Գիլոյանը, ով եզրափակիչ ելույթներից առաջ ֆիզիկական կուլտուրայի և սպորտի բնագավառում ունեցած վաստակի և ծննդյան 60-ամյակի կապակցությամբ Հայաստանի սուսերամարտի ֆեդերացիայի նախագահ Արմեն Գրիգորյանին պարգևատրեց ՀՀ ԿԳՄՍ նախարարության ոսկե մեդալով: Ֆեդերացիայի նախագահը պարգևատրվեց նաև Հայաստանի ազգային օլիմպիական կոմիտեի ոսկե շղթայով:

Երվանդ ՀԱԿՈԲՅԱՆ