«Ֆուտբոլը տաքարյուն սպորտ է, կարող են միջադեպեր լինել, ու այսօր էլ այո, քաշքշուկ և խոսակցություն եղել է, բայց որ խփենք իրար՝ չէ: Արտառոց բան չկա, ինչ էլ՝ եղել է, անցել գնացել է ու մնացել է դաշտում», — ArmSport-ի հետ զրույցում ասում է «Սևանի» ֆուտբոլիստ Հակոբ Համբարձումյանը՝ մեկնաբանելով «Շիրակի» հետ ընկերական խաղում այսօր գրանցված միջադեպը:
Հիշեցնենք՝ «Սևանի» տարածած մամուլի հաղորդագրության մեջ մասնավորապես ասվում էր.
«Ազդարարելով խաղի ավարտը մրցավարը դիմեց «կտրուկ» գործողությունների։ Մոտենալով Համբարձումյանին՝ բռնցքամարտին բնորոշ աջ հուկով փորձեց նոկդաունի ենթարկել ֆուտբոլիստին։ Ու միայն երկու թիմերի ֆուտբոլիստների ու մարզչական կազմի միջամտության շնորհիվ հաջողվեց հանդարտեցնել մթնոլորտը։ Թե ինչո՞վ էր մտածում մրցավարը ֆուտբոլիստին հարվածելիս դժվար է ասել, բայց հաստատ գլխով չէր մտածում։
Հարվածել ֆուտբոլիստին,այն էլ խաղադաշտում, երբ հանդիպման մասնակիցները դեռ չէին լքել մրցասպարեզը, սա նորություն է հայկական ֆուտբոլում»:
Հարցին՝ ինչու է այդ դեպքում ակումբը նման էմոցիոնալ գրառում կատարել՝ Համբարձումյանն ասում է՝ չի կարող մեկնաբանել, քանի որ դա արդեն իրեն չվերաբերող հարց է:
«Ինչ էլ՝ եղել է, մնացել է դաշտում: Ֆուտբոլիստներ ենք, խուլիգաններ չենք: Այսօրվա մրցավարն էլ նորմալ անձնավորություն է, ամեն ինչ նորմալ է: Խոսել, հասկացել ենք իրար»:
Հիշեցնենք՝ «Շիրակի» հետ խաղում կրքերը լարվել էին խաղավարտին, երբ խաղի հիմնական ժամանակի ավարտից մեկ րոպե առաջ 11-մետրանոց էր նշանակվել գյումրեցիների օգտին, ինչն էլ անվրեպ իրացնելով՝ «Շիրակը» հաղթանակի էր հասել 2-1 հաշվով: Համբարձումյանը դժգոհել էր 11-մետրանոց նշանակելու որոշումից.
«Մարդ է՝ կարող է սխալված լինել, կամ էլ ես կարող եմ սխալված լինել, հիմա չեմ կարող ասել: Էմոցիա էր, անցավ գնաց: Այնպես չէ, որ մուռ կա, կամ նման մի բան: Խոսել ենք, ամեն ինչ նորմալ է, ոչ մի խնդիր չկա»,- եզրափակում է իր խոսքը Հակոբ Համբարձումյանը:
Այն, որ ամեն ինչ նորմալ է, մեզ հետ զրույցում փաստում է նաև հանդիպման գլխավոր մրցավար Սամվել Հովսեփյանը.
«Ոչինչ չի եղել»,- մեկնաբանելով այսօրվա միջադեպը հակիրճ պատասխանում է Սամվել Հովսեփյանը:
Հարցին՝ ինչպես է ինքն արձագանքել ֆուտբոլիստի դժգոհությանը 11-մետրանոցի նշանակումից հետո՝ Հովսեփյանն ասում է.
«Ֆուբոլում էմոցիաներն անպակաս են, նորմալ երևույթ է: Անհամաձայնություն եղել է, բայց ոչ այնպես ինչպես նկարագրվել է: Ամեն ինչ նորմալ է:
Չեմ կարող ասել, թե ինչու է ամեն ինչ այդպես նկարագրվել: Ես համենայն դեպս որևէ խնդիր կամ դժգոհութուն չունեմ միջադեպի, ֆուբոլիստի կամ անձնակազմի հետ կապված: Ամեն ինչ նորմալ է»,- ասում է Սամվել Հովսեփյանը:
