Ավարտվեց 2019/20 մրցաշրջանի Չեմպիոնների Լիգայի խաղարկությունը։ Այս ՉԼ-ն մենք դեռ երկար կհիշենք․ անսպասելի արդյունքներ, ֆրանկո-գերմանական կվարտետը կիսաեզրափակչում, ֆիասկոներ և բենեֆիսներ, և իհարկե՝ երիտասարդ տաղանդավոր ֆուտբոլիստներ, որոնց համար այս ՉԼ-ն դարձավ աստեղային։ Հենց վերջիններիս մասին էլ կխոսենք այսօրվա Ֆուտբոլային սկաուտում․․․
Էմանուել Դենիս Բոնավենտուրե
Նիգերիա
«Բրյուգե»
22 տարեկան
Դենիսին կհիշեն մեր ընթերցողներից շատերը։ Նիգերիացի ֆուտբոլիստի թիմը ՉԼ-ի խմբային փուլում ընդգրկվել էր ՊՍԺ-ի և «Ռեալի» հետ միևնույն խմբում, որտեղ բելգիական ակումբը զբաղեցրեց երրորդ հորիզոնականը։ Թիմի մասին այդքան էլ խոսելու առիթ չկա, իսկ ահա Դենիսի մասին․․․ հիշո՞ւմ եք նրա դուբլը «Ռեալի» դեմ խաղում, այն էլ Մադրիդում։ Արագաշարժ, բավականին լավ տեխնիկայով, ֆուտբոլային ինտելեկտով աչքի ընկնող ֆուտբոլիստ, և, միանշանակ, «Բրյուգեն» այս տաղանդավոր ֆուտբոլիստի համար նշաձող չէ, այլ ցատկահարթակ՝ ավելի մեծ ակումբում հայտնվելու համար։ Գրանդ ակումբների երիտասարդ ֆուտբոլիստների մասին բազմիցս է խոսվում, նրանց մամուլում հաճախ են գովերգում, սակայն պետք չէ մոռանալ, թե որքան տաղանդավոր և աստղային ֆուտբոլիստներ են հայտնվում մեծ ֆուտբոլում հենց ֆուտբոլային «նկուղներից»։ Այնպես որ, մտապահեք այս ֆուտբոլիստին, ում շուտով կտեսնեք որևէ թոփ ակումբի կազմում։
Հուսեմ Աուար
🇫🇷 Ֆրանսիա
22 տարեկան
«Լիոն»
«Լիոնն» ընդհանրապես այս ՉԼ-ի գլխավոր անակնկալներից մեկն էր․ երևի թե միայն ֆրանսիական ակումբի ամենահավատարիմ երկրպագուները կարող էին հավատալ, որ իրենց սիրելի ակումբը կարող է հասնել ակումբային գլխավոր մրցաշարի կիսաեզրափակիչ։ Եվ այդ ամենում իր մեծ ներդրումն ունեցավ երիտասարդ Աուարը։ Ի դեպ, Հուսեմը հենց «Լիոնի» սան է, ինչն էլ ավելի արժեքավոր է դարձնում ֆուտբոլիստի հաջողությունները թիմի երկրպագուների համար։ Ֆրանիացին պարզապես հրաշալի մրցաշրջան անցկացրեց ՉԼ-ում՝ դառնալով մեկ գոլի և 6 գոլային փոխանցման հեղինակ։ Պատահական չէ, որ կիսապաշտպանը հայտնվել է մի շարք գրանդ ակումբների դիտակետում և շատ հավանական է, որ արդեն նոր մրցաշրջանում մենք այս տաղանդին կտեսնենք արդեն լրիվ ուրիշ մարզաշապիկով։
Դայո Ուպամեկանո
🇫🇷 Ֆրանսիա
21 տարեկան
«ՌԲ Լայպցիգ»
ՉԼ-ի 1/4 եզրափակչի՝ «Աթլետիկոյի» հետ խաղում ֆրանսիացի պաշտպանը ճանաչվեց հանդիպման լավագույն ֆուտբոլիստ։ Սակայն նա ոչ միայն այդ մեկ խաղում դրսևորեց իրեն, այլ ամբողջ մրցաշրջանն է անցկացնում բավականին բարձր մակարդակով։ Ինչպես «ՌԲ Լայպցիգի» մի քանի այլ խաղացողներ, ֆրանսիացի պաշտպանը գերմանական ակումբ է տեղափոխվել Red Bull-ի մեկ այլ ակումբից՝ ավստրիական «ՌԲ Զալցբուրգից»։ Նա արդեն երրորդ մրցաշրջանն է, ինչ համարվում է թիմի հիմնական կազմի ֆուտբոլիստ, իսկ վերջին մեկ-երկու տարիներին նա ընդհանրապես Եվրոպայի ամենահեռանկարային պաշտպաններից մեկն է։ 21 տարեկան հասակում լինել մի թիմի պաշտպանության հենասյունը, որը հասել է ՉԼ-ի կիսաեզրափակիչ, դա արդեն խոսում է ֆուտբոլիստի խաղամակարդակի մասին։
Էրլինգ Հոլանդ
🇳🇴 Նորվեգիա
20 տարեկան
«Բորուսիա Դ․»
Թե ինչ սուպեր մրցաշրջան է անցկացնում «երիտասարդ վիկինգը», արդեն բազմիցս ենք խոսել։ Բայց չընդգրկել նրան այս ցուցակում պարզապես անթուլյատրելի էր։ Հոլանդը սկսեց ՉԼ-ի այս մրցաշրջանը «ՌԲ Զալցբուրգի» կազմում և ինչպե՜ս սկսեց․ հեթ-տրիկ, ֆանտաստիկ խաղ, ՉԼ-ի նոր ռեկորդներ։ Շատերը սկզբից պատահականություն էին համարում նորվեգացու սխրանքները, սակայն ֆուտբոլիստը խաղից խաղ ապացուցում էր իր բարձր կարգը։ Տեղափոխվելով «Բորուսիա Դ․»՝ Հոլանդը շարունակեց նոր ռեկորդներ գրանցել․ նա դարձել է առաջին ֆուտբոլիստը, որը Չեմպիոնների լիգայի մեկ խաղարկության ընթացքում գոլ է խփում երկու տարբեր թիմերի կազմերում: Ավելի վաղ նա 8 գոլ էր խփել «ՌԲ Զալցբուրգի» կազմում խմբային փուլում: 1/8 եզրափակչի՝ ՊՍԺ-ի հետ խաղում երկու անգամ առանձնանալով ՝ Հոլանդը մրցաշարում իր գոլերի քանակը հասցրեց 10-ի: Այս ցուցանիշին հասնելու համար նրան պետք եղավ յոթ հանդիպում: Սա ռեկորդային ցուցանիշ է Չեմպիոնների լիգայի պատմության մեջ: Սա Հոլանդի փայլուն մրցաշրջանն էր և, կարծում եմ, ոչ միակը մոտ ապագայում․․․
Ալֆոնսո Դեյվիս
🇨🇦 Կանադա
19 տարեկան
«Բավարիա»
Եվս մեկ ֆուտբոլիստ, ում մասին շատերը դեռ մեկ-երկու տարի առաջ կամ ընդհանրապես չէին լսել, կամ էլ լսել էին որպես հերթական հեռանկարային ֆուտբոլիստ։ Կանադացին, ով ՉԼ-ի այս մրցաշրջանում արդեն իսկ հասցրել է 4 գոլային փոխանցման հեղինակ դառնալ, առաջին լիարժեք մրցաշրջանն է անցկացնում գերմանական գրանդի կազմում։ Տեխնիկապես ուժեղ ֆուտբոլիստներին արագաշարժ Դեյվիսին այդքան էլ դժվար չէ շրջանցել, սակայն փախչել նրանից գրեթե անհնար է․ նա, ինչպես հեպարդն է հասնում գազելին (այծեղջյուր, չնայած Երևանի ԳԱԶել-ներին էլ կհասնի), արագության շնորհիվ նահանջում և պարզապես «հոշոտում» է մրցակցին։ Այո, պաշտպանական գործառույթներում Ալֆոնսոյի խաղում դեռևս թերացումներ կան, որը նա փոխհատուցում է առջևի գծում իր արդյունավետությամբ։ Սակայն նա ընդամենը 19 տարեկան է, և գրեթե կասկած չկա, որ նոր մրցաշրջանում մենք ականտես կլինենք էլ ավելի ուժեղ Դեյվիսի խաղին․․․
Վար Բաբայան
Շարքի նախորդ մասերը
Սևիլյայի սելեկցիան շարունակում է փայլել
ՌՊԼ-ի ամենահեռանկարային ֆուտբոլիստները
Վալենսիան շարունակում է մնալ ֆուտբոլային քաղաք
Աֆրիկայի ամենաթանկարժեք 5 ադամանդները
5 ռմբարկուներ ոչ թոփ առաջնություններից
ՌԲ Լայպցիգը՝ ապագա աստղերի դարբնոց
Դեղձանիկները դեռ կճախրեն ֆուտբոլային երկնակամարում
Շոտլանդիայի առաջնության ամենահեռանկարային ֆուտբոլիստները
Լավագույնները Ա Սերիայի նկուղում
Ամերիկացիների երիտասարդ դեսանտը Եվրոպայում
Բեռլինում նոր աստղեր են հասունանում
Երիտասարդ գլադբախցիներն ու դեղագործները՝ համաշխարհային ֆուտբոլի ապագա աստղեր
Ֆրանսիայի առաջնության գլխավոր բացահայտումները
Հաշվենկատ Վերոնան և հավակնոտ Բոլոնյան՝ ցատկահարթակ ֆուտբոլային էլիտա
Քեյ-ֆուտբոլի (K-Football) ակնկալիքով
Երիտասարդ աղվեսների ոդիսականը շարունակվում է
Ֆուտբոլային սկաուտ․ Ռեալ Սոսեյդադ, Սևիլյա
Ֆուտբոլային սկաուտ․ Ատալանտա, Լացիո
Ֆուտբոլային սկաուտ․ Վուլվերհեմփթոն, Էվերտոն
Ֆուտբոլային սկաուտ․ Վերդեր, Այնտրախտ
Էրեդիվիզիի ամենահեռանկարային ֆուտբոլիստները (Մաս 3)
Էրեդիվիզիի ամենահեռանկարային ֆուտբոլիստները (Մաս 2)
Էրեդիվիզիի ամենահեռանկարային ֆուտբոլիստները (Մաս 1)
Պորտուգալիան՝ ցատկահարթակ դեպի մեծ ֆուտբոլ
Բելգիան շարունակում է մնալ ապագա աստղերի դարբնոց (Մաս 2)
Բելգիան շարունակում է մնալ ապագա աստղերի դարբնոց (Մաս 1)
Սամուրայների նոր սերունդը Եվրոպայում
Բրազիլիայի առաջնության ամենահեռանկարային ֆուտբոլիստները (Մաս 2)
Բրազիլիայի առաջնության ամենահեռանկարային ֆուտբոլիստները (Մաս 1)
MLS-ի 7 ֆուտբոլիստներ, ովքեր կարող են փայլել Հին աշխարհում