Շվեյցարիայի Ցյուրիխ քաղաքում երեկ կայացավ Մունդիալ-2022-ի ընտրական փուլի վիճակահանությունը:
Հայաստանի ազգային հավաքականն ընդգրկվեց J խմբում, որտեղ կմրցի Գերմանիայի, Ռումինիայի, Իսլանդիայի, Հյուսիսային Մակեդոնիայի և Լիխտեյնշտեյնի հավաքականների հետ:
Եվս 6 հավաքականներ, որոնց հետ Հայաստանի ազգային թիմն անցկացրել է միայն ընկերական խաղեր և երբևէ ընտրական փուլերում չի եղել նույն խմբում. Դրանք են՝ Լյուքսեմբուրգի, Լիտվայի, Իսրայելի, Մոլդովայի, Լատվիայի և Հունգարիայի հավաքականները:
Վերադառնանք Մունդիալ-2022-ի վիճակահանությանը:
Ինչպես արդեն նշեցինք, պաշտոնական խաղերի փորձ ունենք մեր խմբի բոլոր հավաքականների հետ: Ամենից շատ Հայաստանի հավաքականը հանդիպել է Հյուսիսային Մակեդոնիայի հետ (10 անգամ):
Ստորև ներկայացնում ենք մեր խմբում ընդգրկված թիմերի հետ դիմակայությունների պատմությունն ու վիճակագրությունը:
Գերմանիայի հավաքական
Հայաստանի հավաքականն աշխարհի քառակի չեմպիոնների հետ հանդիպել է 3 անգամ: Երկու թիմերը նույն խմբում էին ընդգրկվել Մունդիալ-1998-ի նախընտրական փուլում: 1996-ին գերմանացիները Երևանում հաղթեցին 5:1 հաշվով, իսկ հաջորդ տարի Դորտմունդում կայացած խաղում 4 անպատասխան գնդակ ուղարկեցին հյուրերի դարպասը: 2014-ին Գերմանիայի ընտրանին սեփական հարկի տակ ընկերական խաղում հաղթեց 6:1 հաշվով: Ստացվում է դիմակայության 3 խաղերում Հայաստանի հավաքականը կրել է 3 պարտություն, խփել 2 գնդակ և բաց թողել 15-ը:
Ռումինիայի հավաքական
Ռումինիայի հավաքականի հետ անցկացրած 5 խաղերից և ոչ մեկում Հայաստանի ընտրանին հաղթանակ չի տարել: Թիմերի առաջին «ծանոթությունը» եղել է 2004 թվականին՝ Մունդիալ-2006-ի նախընտրական փուլում: Առաջին խաղում Երևանում գրանցվել է ոչ-ոքի (1:1), իսկ 2005-ին ռումիանցիները սեփական հարկի տակ հաղթել են 3:0 հաշվով: 2006-ին Կիպրոսում կայացած միջազգային մրցաշարում Ռումինիան հաղթել է 2:0 հաշվով: ԱԱ-2018-ի ընտրական փուլում նույնպես երկու անգամ հաղթել են ռումինացիները (0:5, 1:0):
Ռումինացիների հետ անցկացրած 5 խաղերում Հայաստանի թիմը ոչ մի հաղթանակ չի տարել: Կրել է 4 պարտություն և մեկ խաղ ավարտել ոչ-ոքի: Այդ խաղերում Հայաստանի ընտրանին խփել է 1 գոլ և բաց թողել 12-ը:
Իսլանդիայի հավաքական
Գրեթե նույն պատկերն է նաև իսլանդացիների հետ դիմակայություններում, սակայն «վիկինգների» հետ մեր ճանապարհներն ավելի քիչ են խաչվել: Եվրո-2000-ի ընտրական փուլում թիմերի առաջին խաղում Երևանում գրանցվել է ոչ-ոքի, իսկ Ռեյկյավիկում իսլանդացիները հաղթել են 2:0 հաշվով: Նույն հաշիվն է գրանցվել նաև 2008-ի ընկերական խաղում: Թիմերի անցկացրած 3 խաղերում գրանցվել է մեկ ոչ-ոքի, երկու անգամ հաղթել են իսլանդացիները՝ խփելով 4 գոլ:
Հյուիսայիս Մակեդոնիայի հավաքական
Խմբում ամենից շատ հանդիպումներն անցկացրել ենք Հյուսիսային Մակեդոնիայի հավաքականի հետ: Ազգերի լիգայի վերջին 2 խաղարկություններում, ինչպես նաև Եվրո-96-ի, Եվրո-2012-ի և Մունդիալ 2006-ի ընտրական փուլերում եղել ենք նույն խմբում: Անցկացրած 10 խաղերում բացառապես հավասարություն է: Կողմերը տարել են 4-ական հաղթանակ, երկու խաղ ավարտվել է ոչ-ոքի: Գրեթե հավասարություն է նաև խփած և բաց թողած գնդակներով՝ 17 գնդակ խփել է Հայաստանի հավաքականը, 15-ը՝ մակեդոնացիները:
Լիխտեյնշտեյնի հավաքական
Մունդիալ-2022-ի ընտրական փուլի J խմբի թիմերից Հայաստանի ընտրանին առավելություն ունի միայն Լիխտեյնշտեյնի ընտրանու նկատմամբ: Թիմերը նույն խմբում են եղել Ազգերի լիգայի 2018/19 մրցաշրջանում, ինչպես նաև Եվրո-2020-ի ընտրական փուլում: Կայացած 4 խաղերում Հայաստանի ազգային թիմը տարել է 2 հաղթանակ, 2 խաղ էլ ավարտվել է ոչ-ոքի արդյունքով: 4 խաղերում Հայաստանի հավաքականը խփել է 8, և բաց թողել՝ 4 գնդակ:
Երվանդ ՀԱԿՈԲՅԱՆ