Հայաստանի Ֆուտբոլի ֆեդերացիան երեկ հայտարարություն տարածեց, որ իրավունք է ստացել սույն թվականի սեպտեմբերի 18-ից սկսած՝ VBET Հայաստանի Պրեմիեր Լիգայի, Առաջին խմբի և VBET Հայաստանի գավաթի խաղարկության հանդիպումներին թույլատրել մասնակից յուրաքանչյուր ակումբից 75 հանդիսատեսի մասնակցություն (ընդամենը՝ 150 անձ):
Դաշտի տեր ակումբի պատասխանատվությամբ՝ բոլոր երկրպագուները պետք է տեղակայվեն մարզադաշտում՝ պահպանելով սահմանված սոցիալական հեռավորությունը, և հանդիպման ամբողջ ընթացքում կրեն դիմակներ։ Ի դեպ , ֆեդերացիայից Armsport-ին տեղեկացրեցին, որ հատկացված 150 տեղը մասնակից ակումբները կարող են բաշխել իրենց հայեցողությամբ։
Այս որոշումը, իհարկե, երկրպագուների համար շատ սպասված էր: Մոտ 7 ամիս առաջ հայ երկրպագուն զրկվեց խաղադաշտ այցելելու հնարավորությունից: Ֆրանսիան ու Ռուսասատանը երկրպագուներին արդեն թույլատրում են գալ մարզադաշտ՝ իհարկե, որոշակի քանակությամբ: Այլ երկրներում ևս նման ավանդույթ կա:
Հայաստանում կորոնավիրուսի տեմպերը սկսել են նվաճել ու այժմ կա՝ երկրպագուներին մարզադաշտ թողնելու թույլտվություն: Այստեղ հարցն այն է, թե ինչպես պետք է բաժանվի այդ 150 տեղը: Յուրաքանչյուր ակումբ կստանա հավելյալ 75 հոգու մարզադաշտ թողնելու հնարավորություն: Տրամաբանության սահմաններում է, որ առաջինը պետք է հնարավորություն տրվի Ֆան ակումբների անդամներին:
Armsport-ը մի քանի ակումբից փորձել է ճշտել, թե այդ տոմսերը ինչպես են բաժանվելու.
«Նոայի» մամուլի ծառայությունից տեղեկացրին, որ առաջին հերթին նախապատվությունը տրվելու է ֆան ակումբի անդամներին, իսկ մնացած տոմսերի մասով դեռ պետք է քննարկում լինի: Մոտավորապես նույն պատասխանը տվեցին «Արարատից», «Ուրարտուից» ու «Փյունիկից»:
Իհարկե, առաջին հերթին այս իրավիճակում շահողը երկրպագուն է, որ նորից խաղադաշտից կտեսնի իր սիրելի թիմի խաղը: Այս իսկ պատճառով պայմանականորեն զրուցել ենք «Փյունիկի» ու «Արարատ-Արմենիայի» ֆան ակումբների անդամների հետ ու ստացել նրանց արձագանքները.
«Փյունիկի» «Sector 18» երկրպագուական շարժման անդամ Արշակ Պապոյանը մեզ հետ զրույցում նշեց.
«Արտակարգ դրություն մտցվելուց ի վեր երազում էինք ստադիոն մտնելու մասին։ Դա մեր կյանքն է, մեր տունը։ Այդ ամենը նման էր նրան, կարծես, սեփական տանից հանել էին, իսկ հիմա կարոտով վերադառնում ենք մարզադաշտ»:
Հարցին, թե ինչպես երկրպագուները կբաժանեին այդ 75 տոմսը, որ արդար լիներ, եթե իրենց տրվեր այդ հնարավորությունը, Արշակը պատասխանեց.
«Ներկայիս հայաստանյան առաջնություն չկա գեթ մեկ թիմ, ով ունի այդ քանակով ակտիվ ֆան շարժում։ Մեր շարժման անդամները 30-40 հոգին են, որը ակումբին տրված լիմիտի կեսն է։ Չենք ուզում բաժանություն դնել ֆան շարժման երկրպագուների և մյուս երկրպագուների միջև, բայց տվյալ իրավիճակում 50/50 բաժանումը ճիշտ կլինի: Այս պահին կարևորն այն է, որ վերադառնում ենք մարզադաշտ»:
Նույն հարցին «Արարատ-Արմենիայի» ALFA երկրպագուական շարժման անդամ Դավիթ Վահրադյանը տվեց այսկերպ պատասխան.
«Ճիշտն ասած, մեր սրտով չի այս բաժանումը: Մենք կառաջարկեինք ամեն ֆան ակումբից ներկա գտնվելու հնարավորություն ունենան 50-ական մարդ, իսկ մնացած 50 երկրպագուները, ովքեր ֆան ակումբների անդամներ չեն, սակայն հայկական ֆուտբոլի երկրպագու են»:
Դավիթն ու իր ֆանատական թիմը ևս անհամբերությամբ է սպասել այս որոշմանը.
«Շատ ենք սպասել այս որոշմանը: Չնայած, մեր ֆան ակումբը՝ ԱԼՖԱ-ն, գրեթե բոլոր խաղերին աջակցել և սատարել է իր սիրելի թիմին՝ մարզադաշտի հարակից տարածքներից, բայց մարզադաշտից աջակցելը այլ երկրպագուական աշխարհ է։
Կարանտինային դադարի բացասական կողմերն ակնառու են, սակայն կան նաև դրականները, որոնք մեզ պատմեցին Արշակն ու Դավիթը.
«Ֆանատական ոգին բարձրացավ տղաների մոտ, մենք հասկացանք, որ «Մենք միշտ մեր թիմի կողքին ենք» երգը զուտ երգ չէ, այլ ապրելակերպ։ Նաև, ֆուտբոլիստները տեսան, որ իրենց և թիմին նվիրված երկրպագուներին ոչ մի խոչնդոտ բաժանել չի կարող»,-ասաց Արշակը:
«Բացասականի մասին չեմ խոսի, քանի որ բոլորիս էլ պարզ է, իսկ դրականը՝ դա մեր ֆան ակումբի գրասենյակում հեռուստացույցով ընդհանուր դիտումներ կազմակերպելն էր, մարզադաշտից դուրս գտնվելով՝ համախմբումն էր, և ամենակարևորը կնշեմ, մեր ֆան ակումբի ակցիան էր, որով բարձրաձայնեցինք այն, որ ֆուտբոլն առանց երկրպագուների ոչինչ է (football is nothing without fans)»,-ասաց Դավիթը:
Ունենալով բավականին շատ ազատ ժամանակ, ֆան ակումբները նորարություններ են պատրաստել: «Փյունիկի» ֆան շարժման անդամը նորարությունները թողեց գաղտնի, իսկ Դավիթը նշեց, որ ազատ ժամանակը օգտագործել են երգերի ու լոզունգներ փորձեր կատարելու համար։
Ի դեպ, երկու կողմի անդամներն էլ նշեցին՝ որքան էլ տարօրինակ է, այս ընթացքում ֆանատական շարժման անդամները շատացել են: Դավիթը հավելեց, որ իրենց շարքերը ավելացել են՝ առաջին հերթին ճիշտ աշխատանքի շնորհիվ, Հայաստանում նոր երկրպագուական մշակույթ ձևավորելով և Ֆան ակումբի գրասենյակ բացելով, իսկ Արշակը տեղեկացրեց, որ իրենց շարքերը համալրած նորեկները երկրպագուական դասեր են անցել էկզոտիկ պայմաններում:
Արմեն Գարամյան