Մեր ընտրանու հաղթանակը, Ռոնալդուի ու Ռամոսի ֆանտաստիկ ցուցանիշները․ Ազգերի լիգայում պայքարը թեժանում է

Սեպտեմբերի 3-8 կայացան Ազգերի լիգայի արդեն թվով երկրորդ խաղարկության առաջին երկու տուրերը։ 

Մեկնարկային տուրերից հետո զգացվում է, որ հավասարազոր թիմեր են ներկայացված յուրաքանչյուր լիգաներում ու դա էլ ավելի դիտարժան և անկախատեսելի է դարձնում մրցապայքարը։

⚽ A լիգա

Այս լիգայում ընդգրկված են աշխարհամասի ամենաբարձր վարկանիշ ունեցող հավաքականները։ Ի տարբերություն նախորդ խաղարկության՝ այս անգամ էլիտայում իրենց տեղն էին զբաղեցրել 4 նոր հավաքակններ՝ Ուկրաինան, Շվեդիան, Դանիան, Բոսնիա և Հերցեգովինան։ Վերջին կվարտետը չի զբաղեցրել այլ հավաքականների տեղեր, այլ պարզապես A լիգայի մասնակիցների թիվն է ավելացել՝ 12-ից հասնելով 16-ի։

Նորեկներից ո՞ր հավաքականը լավ տպավորություն թողեց՝ մի քիչ հարաբերական է։ Մրցակիցներին բավականին համառ դիմադրություն ցույց տվեցին բոսնիացիները, ովքեր կարողացան մեկ միավոր կորզել իտալացիներից (1-1), իսկ ահա լեհերին զիջեցին թեժ պայքարում (1-2)։ Այս հավաքականները, Նիդերլանդների հետ միասին, ընդգրկված են առաջին խմբում։ Բավականին հաճելի է հետևել Իտալիայի հավաքականի խաղին․ Մանչինին մարտունակ թիմ է ստեղծել, զգացվում է, որ հավաքականում տիրում է ջերմ մթնոլորտ, բավականին շատ նորեկներ են ընդգրկվում հավաքականի կազմում և ընդհանրապես, վերջին մեկ-երկու տարին իտալացիները անցկացնում են թերևս լավագույն ժամանակահատվածը վերջին տասնամյակում։ Առաջին խմբում, կարծում եմ, հիմնական պայքարը կգնա իտալացիների, լեհերի և նիդերլանդացիների միջև։

Երկրորդ խմբում 100%-անոց արդյունք ունի Բելգիայի հավաքականը, որը երկու խաղերում չխնայեց Դանիայի և Իսլանդիայի հավաքականներին։ Այս խմբում հիմնական պայքարը կընթանա Բելգիայի և Անգլիայի հավաքականների միջև, և հավանականությունը քիչ է, որ սկանդինավները կմիանան այդ պայքարին։

Պարզապես հրաշալի մարզավիճակում է Պորտուգալիայի հավաքականը, որը երրորդ խմբի երկու խաղերում էլ հաղթանակ տարավ ոչ դյուրին մրցակիցների դեմ՝ Խորվաթիայի և Շվեդիայի։ Իսկ Ռոնադուն, ով մեղվի խայթոցի պատճառով բաց էր թողել բալկանյան հավաքականի դեմ հանդիպումը, հրաշալի հանդիպում անցկացրեց պորտուգալացիների երկրորդ խաղում՝ երկու անգամ տխրեցնելով սկանդինավների դարպասապահին։ 35-ամյա ֆուտբոլիստի համար այս գոլերը դարձան 100-րդ և 101-րդը ազգային հավաքականում: Կրիշտիանուն դարձավ պատմության մեջ երկրորդ խաղացողը, ով 100 գոլից ավել է խփել ազգային հավաքականում և առաջինն է այդ ցուցանիշով եվրոպական ֆուտբոլում: Նրան ընդամենը 6 գոլ է պակասում, որպեսզի հավասարվի Իրանի հավաքականի նախկին հարձակվող Ալի Դայեիի ռեկորդին։ Ի դեպ, ամենից հաճախ Ռոնալդուն գրավել է Լիտվայի և Շվեդիայի հավաքականների դարպասը՝ 7 գոլ։ Հայաստանի, Անդորրայի, Լատվիայի և Լյուքսեմբուրգի հավաքականների դարպասը պորտուգալացին գրավել է 5-ական անգամ։

Այս խմբում երկու հաղթանակ ունի նաև Ֆրանսիայի հավաքականը և հենց նրանք Ազգերի լիգայի գորժող չեմպիոնների՝ պորտուգալացիների հետ կպայքարեն այս խմբում առաջին տեղը զբաղեցնելու համար։

Վերջին՝ չորրորդ խմբում բավականին լավ տպավորություն է թողնում Իսպանիայի հավաքականը։ Ինչպես Ռամոսն էր նշում, հավաքականում բավականին հաջող՝ փորձառու ֆուտբոլիստների և երիտասարդների համադրություն է։ Ի դեպ, հավաքականի կազմում իր գոլերի հաշիվն է բացել Անսու Ֆատին, իսկ Ռամոսը օրերս դարձավ ֆուտբոլի պատմության մեջ հավաքականների կազմերում հանդես եկած ամենաարդյունավետ պաշտպանը ։

Իսկ Գերմանիայի հավաքականի ցուցանիշներն այդքան էլ տպավորիչ չեն՝ երկու ոչ-ոքի նույն Իսպանիայի և Շվեյցարիայի հավաքականների դեմ, ընդ որում, երկու խաղում էլ գերմանացիները հաշվի մեջ առջևում էին։ Բայց, ինչ-որ տեղ, դա նաև բացատրելի է, քանի որ գերմանացիները այդ խաղերում հանդես եկան ոչ հիմնական կազմով․ Լյովը որոշել էր հանգստի հնարավորություն տալ «Բավարիայի» ֆուտբոլիստներին, ովքեր բավականին ծանրաբեռնված մրցաշրջան անցկացրեցին։ Կարծում եմ՝ գերմանացիները հաջորդ տուրից սկսած լուրջ պայքար կմղեն իսպանացիների հետ խմբի հաղթողին որոշելու համար։

⚽ B լիգա

Այս լիգայում, նախորդ խաղարկության համեմատ, փոփոխություններն է՛լ ավելի շատ են։ Բավական չէ, որ 4 թիմեր տեղափոխվել են A լիգա և նրանց տեղերը զբաղեցրել են նախորդ մրցաշարի C Լիգայի լավագույն թիմերը, նաև մասնակիցների քանակն է ավելացել․ այսինքն՝ միանգամից 8 հավաքական իրավունք է ստացել հանդես գալ B լիգայում․ Նորվեգիա,  Հունգարիա, Ֆինլանդիա,  Շոտլանդիա, Բուլղարիա, Սերբիա, Ռումինիա, Իսրայել։ Նորեկներից բավականին լավ տպավորություն թողեց Նորվեգիայի հավաքականը, որի կազմը համալրված է երիտասարդ տաղանդավոր ֆուտբոլիստերով՝ Հոլանդ, Նորման, Այեր, Սորլոթ։ Առանց թիմի առաջատարներից մեկի՝ Էդեգորի, սկանդինավները 1-2 հաշվով զիջեցին ավստրիացիներին․ այդ խաղում հավաքականի կազմում իր առաջին գոլը խփեց «երիտասարդ վիկինգը»՝ Էրլինգ Հոլանդը։ «Մեղրի համը զգացած արջին կանգնեցնել հնարավոր չէ»․ այս խոսքերը տիպիկ նկարագրում են Էրլինգին, ով Հյուսիսային Իռլանդիայի հետ արտագնա խաղում դարձավ դուբլի և գոլային փոխանցման հեղինակ։

Լավ հանդես եկան Ռուսաստանի և Ուելսի հավաքականները, որոնք 100%-անոց արդյունք գրանցեցին՝ տանելով երկուական հաղթանակ։ Ռուսները նախ սեփական հարկի տակ հաղթեցին սերբերին, իսկ նրանց հաջորդ զոհը Հունգարիայի ընտրանին էր։ Վալիացիներն էլ իրենց հերթին ուժեղ գտնվեցին բուլղարացիներից և ֆիններից՝ երկու խաղերում էլ տոնելով նվազագույն հաշվով հաղթանակ։

Ասել է թե՝ սխալ կլինի ներկա պահին ընդգծել B լիգայի յուրաքանչյուր խմբի ֆավորիտին․ բոլոր հավաքակններն էլ գրեթե նույն խաղամակարդակի են՝ բացառությամբ մեկ-երկուսի, այնպես որ ամեն ինչ ավելի պարզ կլինի հոկտեմբերյան հանդիպումներից հետո, երբ կկայանան 3-րդ և 4-րդ տուրի հանդիպումները։

⚽ C լիգա

Ինչ վերաբերվում է այս լիգային, ապա այստեղ ևս ամեն ինչ գրեթե նման է B լիգային․ ակնհայտ ֆավորիտներ դժվար է ընդծել երկու տուրերից հետո: Մի փոքր զգացվում է Մոնտենեգրոյի հավաքականի առավելությունը առաջին խմբում։ Երրորդ խմբում առաջին տեղի համար հիմնական պայքար կմղեն Հունաստանը և Սլովենիան, սակայն Կոսովոյի հավաքականը կարող է խառնել այդ երկու հավաքականների ծրագրերը։ Կատարյալ հավասարություն է չորրորդ խմբում, որտեղ նախկին ԽՍՀՄ-ի ներկայացուցիչները՝ Ղազախստանը, Լիտվան, Բելառուսը, և նախկին սոցիալիստական ճամբարի ևս մեկ ներկայացուցիչ՝ Ալբանիան, իրենց ակտիվում ունեն 3-ական միավոր։

Ինչ վերաբերվում է մեր խմբին, ապա այստեղ ևս ակնհայտ ֆավորիտներ չկան։ Հայաստանի, Վրաստանի և Հյուսիսային Մակեդոնիայի հավաքականները, կարելի է ասել, հավասար հնարավորություններ ունեն խմբի հաղթողը դառնալու։ Մի փոքր ընդհանուր պատկերից դուրս է մնում Էստոնիայի ընտրանին, որպեսզի վստահաբար կարելի լիներ ասել, որ խմբում լիովին հավասարազոր թիմեր են։

Ազգերի լիգայի առաջին տուրում մակեդոնացիներին պարտվելուց հետո (1-2), երկրորդ տուրում Հայաստանի հավաքականը սեփական հարկի տակ ընդունեց Էստոնիայի ընտրանուն և առավելության հասավ 2։0 հաշվով։ Հայաստանի հավաքականի կազմում գոլի հեղինակ դարձան Ալեքսանդր Կարապետյանն ու Վբեյմար Անգուլոն, ով իր առաջին գոլը խփեց մեր ընտրանու կազմում։ Սա նաև մեր հավաքականի առաջին հաղթանակն էր նոր գլխավոր մարզիչ Խոակին Կապառոսի գլխավորությամբ։

Մեզ համար բավականին հաջող դասավորվեց Վրաստանի և Հյուսիսային Մակեդոնիայի միջև հանդիպումը, որն ավարտվեց ոչ-ոքի՝ 1-1 հաշվով։ Այդպիսով, երկու հավաքականներն էլ ընդամենը 1 միավորի առավելություն ունեն մեր հավաքականի նկատմամբ և առաջիկա երկու տուրերում մեր հավաքականը լավ հնարավորություն ունի շրջանցելու մրցակիցներին մրցաշարային աղյուսակում։ Հոկտեմբերի 11-ին Հայաստանի հավաքականը Երևանում կընդունի վրացիներին, իսկ երեք օր անց կհյուընկալվի էստոնացիներին։

⚽ D լիգա

Նախորդ խաղարկության համեմատ բավականին մեծ փոփոխության է ենթարկվել վերջին՝ D լիգան։ Վերևում այդ մասին մենք արդեն խոսել ենք։ Ֆուտբոլային «թզուկներից» կարելի է առանձնացնել Ֆարերյան Կղզիների հավաքականին, որը բավականին վստահ մեկնարկեց մրցաշարում՝ տանելով հաղթանակներ Մալթայի և Անդորրայի ընտրանիների նկատմամբ։ Լավ տպավորություն թողեց կղզիաբնակների 30-ամյա հարձակվող Անդրասոն Օլսենը, ով երկու խաղերում էլ դարձավ մեկական գոլի հեղինակ։

Հավաքականները մեկամսյա դադար կունենան և Ազգերի լիգայի հաջորդ տուրը կմեկնարկի հոկտեմբերի 10-ին։

Վար Բաբայան