Ռուսական «Չայկայի» ֆուտբոլիստ Մաքսիմ Մաշնյովը պայմանագիր է ստորագրել «Ուրարտուի» հետ և առաջին հարցազրույցը տվել ակումբի մամուլի ծառայությանը:
Ամբողջական հարցազրույցը ներկայացնում ենք ձեր ուշադրությանը.
ԱՌԱՋԻՆ ՏՊԱՎՈՐՈՒԹՅՈՒՆՆԵՐԻ ՄԱՍԻՆ
«Ամեն ինչ ուրախացնում է՝ խաղադաշտը, մթնոլորտը, մարզումային գործընթացը, այն, թե ինչպես են անցկացվում նախապատրաստական աշխատանքները: Ինչ վերաբերում է թիմի մթնոլորտին, տղաների հետ դեռ ծանոթանում ենք, ներգրավվում կոլեկտիվի մեջ։ Առաջիկայում ամեն ինչ ավելի կլավանա»:
ՆՊԱՏԱԿՆԵՐԻ ՄԱՍԻՆ
«Ոչ թե նպատակը, այլ խնդիրը հնարավորինս վեր բարձրանալն է, լավ արդյունք ցույց տալը, որպեսզի դուրս գանք եվրոգավաթներ, առաջնությունում պայքարենք բարձր հորզիոնականների, չեմպիոնության համար, նույնը վերաբերում է նաև գավաթի խաղարկությանը: Հիմա դրա համար արվում է ամեն ինչ»:
ԻՐ ԽԱՂԱՅԻՆ ԴԻՐՔԻ ՄԱՍԻՆ
«Ես դաշտի կենտրոնում եմ գործում՝ հենակետային կիսապաշտպան եմ, կարող եմ մոտ խաղալ և՛ պաշտպանությանը, և՛ հարձակմանը: Ճիշտ է, երբեք չեմ խաղացել, բայց եթե պահանջվի, եզրում էլ կարող եմ հանդես գալ: Գլխավոր մարզչի հետ ծանոթ եմ, մինչ այս միասին աշխատել ենք։ Կարճ ժամանակահատված էր, բայց նա հավաքների ժամանակ ինձ փորձել է տարբեր դիրքերում: Այնպես որ, կարող եմ դաշտի միջին գծի ցանկացած դիրք փակել»։
«ՈՒՐԱՐՏՈՒ» ՏԵՂԱՓՈԽՈՒԹՅԱՆ ՄԱՍԻՆ
«Սա ինձ համար քայլ է դեպի առաջ, որովհետև այստեղ եվրոգավաթներում խաղալու հնարավորություն կա, բոլորին չէ, որ տրվում է նման շանս, թեկուզև մասնակցել որակավորման փուլին, բայց սա ամեն դեպքում հեղինակավոր է և գումարած այն, թե ինչ է արվում թիմում դրա համար, կրկնում եմ՝ Ռուսաստանի Առաջին լիգայի ոչ բոլոր թիմերում կա նման վերաբերմունք»,- «Ուրարտուի» մամուլի ծառայության հետ զրույցում ասել է 27-ամյա կիսապաշտպանը։
