Ֆրանսիայի ֆուտբոլի ֆեդերացիայի նախագահ Ֆիլիպ Դիալոն առաջին անգամ հանգամանալից ներկայացրել է ՖԻՖԱ-ի նախագահի պաշտոնում իր թեկնածությունն առաջադրելու պատճառները։ 63-ամյա ֆունկցիոները, որը 2027 թվականի մարտի 18-ին Մարոկկոյում կայանալիք ընտրություններում ձեռնոց է նետելու կառույցի գործող ղեկավար Ջանի Ինֆանտինոյին, հայտարարել է համաշխարհային ֆուտբոլում հասունացած վստահության խորը ճգնաժամի մասին։
Նոյեմբերի 17-ին Փարիզում հրավիրված մամուլի ասուլիսի ժամանակ Դիալոն անկեղծացել է՝ նշելով, որ ի սկզբանե չի դիտարկվել որպես թեկնածու, սակայն եվրոպացի գործընկերների հորդորներն ու համաշխարհային ֆուտբոլի կառավարման ներկայիս մտահոգիչ իրավիճակն իրեն ստիպել են վերցնել պատասխանատվությունը։
«Ի սկզբանե ես թեկնածուների ցանկում չէի, քանի որ քննարկվող մյուս անձինք չցանկացան առաջադրվել։ Սակայն, հավատարիմ մնալով իմ սկզբունքներին, չէի կարող մերժել այդ առաջարկը։ Համոզված եմ, որ ունեմ բավարար փորձ, համոզմունքներ և արժեքներ՝ ՖԻՖԱ-ի ներկայիս ղեկավարությանն արժանի այլընտրանք ներկայացնելու համար»,- նշել է Դիալոն։
Ֆրանսիացի պաշտոնյան կոշտ քննադատության է ենթարկել Ջանի Ինֆանտինոյի պաշտոնավարման ընթացքում, հատկապես վերջին մեկ տարում կայացված մի շարք վիճահարույց որոշումներ, որոնք, նրա խոսքով, հարվածել են ֆուտբոլի հեղինակությանը.
«Վերջին ամիսներին ՖԻՖԱ-ում կայացվել են որոշումներ, որոնք պարզապես ցնցել են ֆուտբոլային հանրությանը։ Խոսքը վերաբերում է Խաղաղության մրցանակին, Աշխարհի առաջնության եկամուտների բաշխմանը, Ֆոլարին Բալոգունի կարմիր քարտի չեղարկմանը և Մունդիալի եզրափակիչի ընդմիջման տևողությունը փոխելուն։ Այդ որոշումները հաճախ կայացվել են միանձնյա՝ առանց համապատասխան քննարկումների։ Ֆուտբոլային աշխարհը փոփոխությունների կարիք ունի. ՖԻՖԱ-ի նախագահի նկատմամբ վստահությունը խաթարված է։ Ժամանակն է կանգ առնել»։
Դիալոյի թեկնածությունն արդեն իսկ ստացել է Եվրոպայի լիակատար աջակցությունը։ Նոյեմբերի 16-ին՝ ՈւԵՖԱ-ի նախագահ Ալեքսանդր Չեֆերինի գլխավորած նիստում, եվրոպական ֆեդերացիաները (այդ թվում՝ ՀՖՖ-ն) միաձայն որոշել են սատարել նրան, իսկ հաջորդ օրը ՖՖՖ գործկոմը պաշտոնապես հաստատել է առաջադրումը։
Հասկանալով, որ միայն եվրոպական 55 ասոցիացիաների ձայները բավարար չեն 211 անդամ ունեցող ՖԻՖԱ-ում հաղթելու համար, Դիալոն արդեն սկսել է բանակցությունները մյուս մայրցամաքների ներկայացուցիչների հետ։ Նա հայտնել է, որ կապ է հաստատել Ճապոնիայի ֆուտբոլի ասոցիացիայի պատվավոր նախագահ Կոզո Տաշիմայի հետ և դրական ազդակներ է ստացել այլ տարածաշրջաններից.
«ՈւԵՖԱ-ի միաձայն աջակցությունն ինձ տալիս է ձայների շատ ամուր բազա։ Այժմ իմ և թիմիս խնդիրն է համոզել մյուս մայրցամաքների գործընկերներին։ Արդեն իսկ լուրջ աջակցության ազդակներ ունեմ եվրոպական սահմաններից դուրս գտնվող մի շարք երկրներից, որոնց մասին կխոսենք առաջիկայում։ Ես այս պայքարի մեջ եմ մտնում ոչ թե պարզապես այլընտրանքային տեսակետ հնչեցնելու, այլ հաղթելու համար»,- շեշտել է նա։
Հիշեցնենք, որ ՖԻՖԱ-ի նախագահի ընտրությունները կանցկացվեն 2027 թվականի մարտի 18-ին՝ Մարոկկոյի մայրաքաղաք Ռաբաթում։ Կառույցը 2016 թվականից ղեկավարող Ջանի Ինֆանտինոն, որը վայելում է մի շարք մայրցամաքային կոնֆեդերացիաների աջակցությունը, շարունակում է համարվել ֆավորիտ, սակայն Դիալոն մտադիր է իր շուրջը համախմբել բարեփոխումներ ու թափանցիկ կառավարում պահանջող բոլոր ֆեդերացիաներին։



























































