Արգենտինայի հավաքականի դարպասապահ Էմիլիանո Մարտինեսը պատմել է 2026 թվականի աշխարհի առաջնության եզրափակիչի մասին, որում արգենտինացիները լրացուցիչ ժամանակում 0:1 հաշվով պարտվել են Իսպանիայի ընտրանուն։ Նրա խոսքով՝ թիմին խանգարել է նաև ֆուտբոլիստների հոգնածությունը, որը պայմանավորված էր հանդիպումների միջև վերականգնվելու համար հատկացված կարճ ժամանակով։
«Ես հավատում էի, որ այդ օրն իմ օրն է լինելու։ Գիտե՞ք այն զգացողությունը, երբ գնդակը պարզապես չի ցանկանում հայտնվել դարպասում։ Կարծում եմ՝ մրցակիցն էլ է նման բան զգացել։ Իսպանացի դարպասապահներից մեկն ինձ ասաց․ «Լավ է, որ հաղթեցինք՝ առանց 11-մետրանոցների հարվածաշարի»։
Ես տեսնում էի, որ թիմակիցներս վազում էին՝ ուժասպառ եղած։ Այդ պահին իմ հերթն էր գործելու։
Լսում էի, թե ինչպես էին իսպանացի ֆուտբոլիստներն ասում․ «Մենք պետք է հաղթենք մինչև 11-մետրանոցների հարվածաշարը, չի կարելի դրան հասցնել»։ Նրանք գոլ խփեցին լրացուցիչ ժամանակի երկրորդ խաղակեսի հենց սկզբում։
Ահա թե ինչն ինձ դուր չեկավ այս Աշխարհի առաջնությունում՝ համեմատած Կատարում անցկացված մրցաշարի հետ։ Այն ժամանակ Խորվաթիայի և Ֆրանսիայի դեմ հանդիպումների միջև վեց օր ունեինք։ Իսկ այս անգամ ընդամենը երեք օր էր մնացել ամեն ինչի համար՝ ներառյալ թռիչքը և կարճատև մարզումը։
Տղաներով մատե էինք խմում և կատակում, որ ավելի լավ կխաղայինք, եթե հանդիպումը սկսվեր ժամը 20:00-ին։ Այդպես լրացուցիչ հինգ ժամ կունենայինք քնելու համար։ Մենք ամբողջովին ուժասպառ էինք», – Մարտինեսի խոսքերը մեջբերում է Albiceleste Talk-ը։
Հիշեցնենք, որ ԱԱ-2026-ի եզրափակիչում Իսպանիայի հավաքականը հաղթանակ է տարել 106-րդ րոպեին Ֆերան Տորեսի խփած գոլի շնորհիվ։ Արգենտինացիների կիսապաշտպան Էնցո Ֆերնանդեսը հեռացվել է խաղադաշտից 90+3-րդ րոպեին։
