Բուլղարիայում հնչած կրակոցները ցնցել են տեղի ֆուտբոլային և գործարար աշխարհը. Պլովդիվում սպանվել է տեղի «Բոտև» ֆուտբոլային ակումբի սեփականատեր, 53-ամյա խոշոր գործարար Իլիյան Ֆիլիպովը: Մահվան փաստը պաշտոնապես հաստատել է Բուլղարիայի Ներքին գործերի նախարարությունը:
Ըստ նախնական տվյալների՝ հանցագործությունը տեղի է ունեցել չորեքշաբթի գիշերը։ Ֆիլիպովը սպանվել է գլխին ստացած մեկ հրազենային վնասվածքից՝ իրեն պատկանող անշարժ գույքի տարածքում: Շրջանային դատախազ Վանյա Խրիստևան հաստատել է, որ հարուցվել է քրեական գործ՝ կանխամտածված սպանության հատկանիշներով։
Այս պահին Պլովդիվում մեծամասշտաբ ոստիկանական գործողություն է իրականացվում։ Քաղաքի մուտքերն ու ելքերը խիստ հսկողության տակ են, ստուգվում են կասկած հարուցող բոլոր մեքենաները: Սպանության վայրի մոտակայքում անտառային զանգված կա, և ոստիկանությունը ստուգում է վարկածը, ըստ որի՝ մարդասպանը թաքնվել է հենց այնտեղ ու դարանակալել գործարարին։ Առայժմ ձերբակալվածներ կամ կասկածյալներ չկան, հայտնի չէ նաև՝ արդյոք նախկինում Ֆիլիպովը սպառնալիքներ ստացել է, թե ոչ։
Իլիյան Ֆիլիպովը «Բոտևի» մաժորիտար բաժնետերն էր դարձել 2025 թվականի հունիսին: Նրա անվան հետ է կապված նաև ակումբի տնային արենայի՝ «Խրիստո Բոտև» մարզադաշտի կառուցումը, որն ուղեկցվել էր ֆինանսական վեճերով և շինարարության ժամանակավոր դադարներով՝ պետությունից հավելյալ ֆինանսավորում պահանջելու պատճառով։ Բուլղարիայի ընթացիկ առաջնությունում «Բոտևը» վաստակած 16 միավորով զբաղեցնում է մրցաշարային աղյուսակի 6-րդ հորիզոնականը։ Հատկանշական է, որ վերջին օրերին Ֆիլիպովը ֆուտբոլային հարցերի շուրջ հրապարակային սուր բանավեճի մեջ էր մտել ֆուտբոլային հայտնի գործիչ, Սոֆիայի «Սլավիայի» նախագահ Վենցեսլավ Ստեֆանովի հետ։
Ֆիլիպովը հայտնի ֆիգուր էր նաև բիզնես ոլորտում. նա դեռ 2000 թվականից հանդիսանում էր PIMK խոշոր տրանսպորտային և շինարարական ընկերության հիմնադիրն ու ղեկավարը։ Գործարարի անունը հաճախ է շրջանառվել տարբեր հանրային և բիզնես կոնֆլիկտների, այդ թվում՝ Պլովդիվում շինարարական թույլտվությունների և տրանսպորտային հարկերի շուրջ ծագած վեճերում։ Նախորդ տարվա մարտին նա որպես վկա հարցաքննվել էր Թուրքիա բեռնատարներով կոկաինի ենթադրյալ տեղափոխման գործով, սակայն ստուգումների արդյունքում ընկերությունում որևէ խախտում չէր հայտնաբերվել։ Սպանությունից ընդամենը երեք օր առաջ Ֆիլիպովը ներկա է գտնվել Պլովդիվում կայացած հանրային միջոցառման:
