«Բարսելոնայի» կիսապաշտպան Գավին հուզիչ ուղերձով դիմել է երկրպագուներին՝ Իսպանիայի Լա Լիգայի 2-րդ տուրի՝ «Էլչեի» դեմ հաղթական խաղում (5:0) ստացած վնասվածքից հետո։
Իսպանացի ֆուտբոլիստը փոխարինվել էր հանդիպման առաջին խաղակեսի վերջնամասում։ Լրատվամիջոցներում անմիջապես սկսեցին լուրեր շրջանառվել, թե խաղացողի մոտ կասկածվում է ծնկի խաչաձև կապանների նոր պատռվածք։
Երկրպագուների անհանգստությունն արդարացված էր՝ հաշվի առնելով ֆուտբոլիստի վնասվածքների ծանր պատմությունը. 2023 թվականին Գավին արդեն ստացել էր նույն ծնկի դիմային խաչաձև կապանի պատռվածք։
2025 թ. օգոստոսից մինչև 2026 թ. մարտը նա կրկին տևական ժամանակով ապաքինվում էր ծնկի մեկ այլ լուրջ վնասվածքից։
Բարեբախտաբար, «Բարսելոնայի» մամուլի ծառայությունը հանդես եկավ պաշտոնական հայտարարությամբ՝ ցրելով վատագույն սպասումները. վնասվածքը լուրջ չէ, դա ընդամենը ծնկի սալջարդ է, և կիսապաշտպանը մոտ ժամանակներս կվերադառնա մարզումներին։
Հանգստացնող նորություններից հետո ֆուտբոլիստն Ինստագրամի իր էջում գրառում է կատարել՝ շնորհակալություն հայտնելով աջակցության համար.
«Շնորհակալ եմ նրանց, ովքեր միշտ ինձ հետ են, աջակցում են ինձ և գնում իմ կողքով մինչև վերջ: Այլ կերպ ես ֆուտբոլն ուղղակի չեմ պատկերացնում: Կներեք, որ ստիպում եմ ձեզ այսքան տառապել»։
