Մադրիդի «Ռեալի» գլխավոր մարզիչ Ժոզե Մոուրինյուն առաջին անգամ անկեղծորեն մեկնաբանել է Ռոդրիի տրանսֆերային բանակցությունների տապալման շուրջ ստեղծված իրավիճակը։
Մադրիդյան ակումբը տևական ժամանակ բանակցություններ էր վարում «Մանչեսթեր Սիթիի» հետ՝ 30-ամյա աշխարհի չեմպիոնի տրանսֆերային իրավունքները ձեռք բերելու շուրջ։ Հաղորդվում էր, որ «սերուցքայիններն» ի վերջո համաձայնեցրել էին անձնական պայմանագրի կետերը ֆուտբոլիստի հետ, սակայն այդպես էլ չէին կարողացել անգլիական ակումբի հետ ընդհանուր հայտարարի գալ փոխհատուցման չափի հարցում։
«Ռեալի» անհաջողությունից հետո ֆուտբոլիստի համար պայքարին միացավ «Բարսելոնան», որն արագորեն ձևակերպեց Ռոդրիի տեղափոխությունը։ Մոուրինյուն չի թաքցրել իր դժգոհությունը, սակայն միևնույն ժամանակ նշել է, որ դա ոչ թե ակումբի, այլ խաղացողի կորուստն է։
– Դուք խոսե՞լ եք Ռոդրիի հետ։
«Այո, ես մի քանի անգամ զրուցել եմ նրա հետ։ Մադրիդի «Ռեալը» նրան շատ շահավետ առաջարկ էր արել։ Ռոդրին տատանվում էր, և դա արդեն իսկ ինձ մոտ կասկածներ առաջացրեց։ Նա անհավանական ֆուտբոլիստ է և մեզ հետ շատ կոռեկտ էր։ Բայց Մադրիդի «Ռեալն» այնպիսի մեծության ակումբ է, որ ֆուտբոլիստներին երկու անգամ չի հարցնում։ Դուք զանգահարում եք նրանց, և նրանք միայն հարցնում են. «Ե՞րբ գամ»։ Քանի որ նա մեզ հետ շատ հարգալից էր, ես նրան ամենայն բարիք եմ մաղթում։ Բայց ոչ չափազանց շատ, բնականաբար»։
– Նրա տեղափոխությունն ընկալվո՞ւմ է որպես «Բարսելոնայի» հաղթանակ «Ռեալի» նկատմամբ։
«Հաղթանակները միայն խաղադաշտում են լինում։ Հաղթանակները միավորներն ու տիտղոսներն են»,- պատասխանել է պորտուգալացի մասնագետը El Chiringuito-ի հետ զրույցում։
Հիշեցնենք, որ Ռոդրին «Բարսելոնայի» հետ կնքել է պայմանագիր, որը նախատեսված է մինչև 2030 թվականը։ Տրանսֆերի արժեքը, ներառյալ հնարավոր բոնուսները, կկազմի 76,5 միլիոն եվրո։
