Մադրիդի «Ատլետիկոյի» գլխավոր մարզիչ Դիեգո Սիմեոնեն նախախաղային ասուլիսի ժամանակ բավականին ուշագրավ և երկիմաստ հայտարարություններ է արել արգենտինացի հարձակվող Խուլիան Ալվարեսի ապագայի վերաբերյալ։ Թեև մասնագետը վերահաստատել է ակումբի ղեկավարության կոշտ դիրքորոշումը՝ նշելով, որ տրանսֆերի հարցը փակված է, այնուամենայնիվ ակնարկել է, որ սպասում է ամենատարբեր զարգացումների տրանսֆերային պատուհանի վերջնամասում։ Այս մասին գրում է Sport.es-ը։
«Մալագայի» դեմ կայանալիք հանդիպումից առաջ «Մետրոպոլիտանոյում» լրագրողների հետ հանդիպման ժամանակ Էլ Չոլոն անդրադարձել է ակումբի գործադիր տնօրեն Միգել Անխել Խիլ Մարինի անզիջում դիրքորոշմանը՝ օգտագործելով իրավաբանական տերմինաբանություն․
«Եթե ակումբի սեփականատերը խոսում է այդքան կտրուկ, ապա կարծում եմ՝ ամեն ինչ ավելի քան պարզ է: Սա նման է դատավարության. հայցը մերժված է: Այսքան հստակ։ Բայց մենք պատրաստ ենք այն ամենին, ինչ կարող է պատահել տրանսֆերային պատուհանի վերջում»։
Խոսելով ֆուտբոլիստի մարզավիճակի մասին՝ արգենտինացի մասնագետն անկեղծացել է, որ Ալվարեսը դեռ պատրաստ չէ խաղադաշտ դուրս գալ.
«Մարզական տեսանկյունից մենք պետք է հոգ տանենք նրա մասին: Մենք սպասում ենք, որ նա հասնի այնպիսի մարզավիճակի, որը թույլ կտա նրան շարունակել պահպանել իր բարձր հեղինակությունը՝ որպես ֆուտբոլիստ և անհատ, ով արդեն շատ բան է տվել մեզ: Այս պահին մենք նրան չենք տեսնում այնպիսի պայմաններում, որպեսզի կարողանա խաղալ։ Հուսով եմ՝ առաջիկա օրերին նա կբարելավի իր վիճակը և ավելի մոտ կլինի մեր պահանջներին»:
Սիմեոնեն ընդգծել է, որ իր ուշադրության կենտրոնում բացառապես մարզական հարցերն են, և իր գլխավոր նպատակը թիմը Խուլիան Ալվարեսի շուրջ կառուցելն է.
«Ես շարունակում եմ մտածել նույն ուղղությամբ: Նա ֆանտաստիկ տղա է, մենք մշտապես զրուցում ենք: Նրան դեռ լրացուցիչ մարզումներ են անհրաժեշտ լիարժեք պատրաստ լինելու համար»։
Այսպիսով՝ պաշտոնապես հայտնի դարձավ, որ «Սարդը» չի ընդգրկվի չորեքշաբթի օրը կայանալիք Լա Լիգայի մեկնարկային խաղի հայտացուցակում:
Անդրադառնալով այն հարցին, թե արդյոք «Մետրոպոլիտանոյի» երկրպագուները կներեն հարձակվողին, եթե նա մնա թիմում, Սիմեոնեն նախընտրել է խուսափել ուղիղ պատասխանից.
«Մարդիկ կարտահայտեն իրենց կարծիքը: Ես հարգանքով եմ վերաբերվում ցանկացած իրավիճակի, ինչպես ժամանակին արել եմ Դիեգո Կոստայի և Անտուան Գրիզմանի պարագայում… Նույնը կանեմ հիմա Խուլիանի հետ»։
Ամփոփելով թիմի ներկայիս վիճակը՝ Չոլոն հավելել է.
«Շատ տղաներ նոր են վերադարձել արձակուրդից և քիչ մարզումներ են անցկացրել: Մենք պետք է շտկումներ անենք մեր ունեցած կազմից առավելագույնը քաղելու համար: Շուկան դեռ բաց է, և մենք պատրաստ ենք ցանկացած սցենարի: Երբ տրանսֆերային պատուհանը փակվի, մեզ համար ավելի պարզ կդառնա, թե ինչ ունենք մեր տրամադրության տակ»։
