«Լիվերպուլի» նորեկ Ռոնալդ Արաուխոն, ով վարձավճարով տեղափոխվել է կատալոնական «Բարսելոնայից», կիսվել է անգլիական ֆուտբոլ տեղափոխվելու իր տպավորություններով, խոսել է Լուիս Սուարեսից ստացած նամակի և նոր մրցաշրջանի հավակնոտ նպատակների մասին։
27-ամյա ուրուգվայցի կենտրոնական պաշտպանի տեղափոխության մասին պաշտոնապես հայտարարվեց երկուշաբթի՝ օգոստոսի 10-ին։ Վարձակալական պայմանագիրը նախատեսված է մինչև 2026/27 մրցաշրջանի ավարտը, իսկ մերսիսայդյան ակումբն իրավունք կունենա գնելու ֆուտբոլիստի տրանսֆերը 55 միլիոն եվրոյով: Նշենք, որ Արաուխոն պաշտպանում է «Բարսելոնայի» գույները 2018 թվականից, իսկ նրա գործող պայմանագիրը կատալոնացիների հետ ուժի մեջ է մինչև 2031 թվականը։ Նոր թիմում ֆուտբոլիստն ընտրել է 33 համարի մարզաշապիկը։
«Երջանիկ եմ հայտնվել նման մեծ ու հարուստ պատմություն ունեցող ակումբում։ Կարծում եմ՝ իմ կարիերայի այս փուլում սա իդեալական որոշում էր, ինձ հենց նման քայլ էր անհրաժեշտ։ Երբ իմացա «Լիվերպուլի» հետաքրքրության մասին, ամեն ինչ շատ արագ զարգացավ։ Սա ճիշտ տեղափոխություն է՝ ճիշտ ժամանակին։
Կասկած չունեմ, որ որակներս իդեալական են Պրեմիեր լիգայի համար և հրաշալի տեղավորվում են տեղի խաղաոճի մեջ։ Վաղուց էի ցանկանում հանդես գալ այս առաջնությունում։ Այն շատ ուժեղ լիգա է, որը շատերը համարում են լավագույնն աշխարհում։ Ես լի եմ էնտուզիազմով և անհամբերությամբ սպասում եմ նոր թիմակիցներիս հետ ծանոթությանն ու խաղադաշտ դուրս գալուն»,- նշել է Արաուխոն ակումբի մամուլի ծառայության հետ զրույցում։
Խոսելով իր հայրենակից, «Լիվերպուլի» պատմության առաջին ուրուգվայցի ֆուտբոլիստ Լուիս Սուարեսի մասին, ով ակումբ էր տեղափոխվել դեռևս 2011 թվականին՝ Արաուխոն ընդգծել է նրա թողած պատմական հետքը.
«Ուրուգվայում պաշտում են Պրեմիեր լիգան։ Իհարկե, մանկության տարիներին ես հետևել եմ Սուարեսի ֆանտաստիկ խաղին «Լիվերպուլում»։ Մենք բոլորս քաջ գիտակցում ենք, թե ինչերի նա հասավ այստեղ և ինչպիսի հետք թողեց պատմության մեջ։ Ես շատ ջերմ հարաբերություններ ունեմ Լուիսի հետ։ Բոլորովին վերջերս նրանից նամակ ստացա․ նա ինձ ամենայն բարիք մաղթեց և վստահեցրեց, որ հիանալի ակումբ եմ տեղափոխվել»։
Հիշեցնենք, որ Սուարեսը 2014 թվականին Անգլիայից տեղափոխվեց հենց «Բարսելոնա», իսկ ներկայումս հանդես է գալիս ամերիկյան «Ինտեր Մայամիում»։
«Անկասկած, իմ գլխավոր նպատակը տիտղոսներ նվաճելն է։ Երբ գալիս ես «Լիվերպուլի» պես ակումբ, հասկանում ես, որ թիմը պայքարելու է բոլոր հնարավոր մրցաշարերում հաղթելու համար։ Այստեղ պետք է քո առջև դնես միայն ամենաբարձր նպատակները։ Վստահ եմ՝ դա են ցանկանում բոլոր խաղացողները, ակումբի աշխատակիցներն ու երկրպագուները։
Շնորհակալ եմ երկրպագուներին՝ բազմաթիվ ջերմ հաղորդագրությունների համար։ Խոստանում եմ առավելագույնս նվիրվել, քրտնաջան աշխատել և ամբողջ մրցաշրջանի ընթացքում հանդես գալ իմ հնարավորությունների առավելագույն սահմանագծին»,- եզրափակել է Արաուխոն։
Հավելենք, որ ԱՊԼ-ի նոր մրցաշրջանի առաջին տուրում «Լիվերպուլը» կմրցի «Նյուքասլի» հետ։ Հանդիպումը կկայանա օգոստոսի 23-ին։
