Ֆուտբոլի Ֆրանսիայի ազգային հավաքականը ԱԱ-2026-ի խմբային փուլի երկրորդ տուրում վստահ հաղթանակ տարավ Իրաքի ընտրանու նկատմամբ և ժամանակից շուտ ապահովեց իր տեղը մրցաշարի փլեյ-օֆֆում:
ԱՄՆ-ի Ֆիլադելֆիա քաղաքի «Լինքոլն Ֆայնենշել Ֆիլդ» մարզադաշտում կայացած հանդիպումն ավարտվեց եվրոպացիների հաղթանակով՝ 3:0 հաշվով:
Խաղի հաշիվը 14-րդ րոպեին բացեց Կիլիան Մբապեն՝ աչքի ընկնելով Մայքլ Օլիսեի փոխանցումից հետո: Առաջին խաղակեսի ավարտին հորդառատ անձրևի և ամպրոպի վտանգի պատճառով հանդիպման գլխավոր մրցավար, կանադացի Դրյու Ֆիշերը ստիպված եղավ դադարեցնել խաղը։ Հարկադրված դադարը տևեց մոտ երկու ժամ:
Վերսկսված խաղի երկրորդ կեսում ֆրանսիացիները շարունակեցին իրենց գերիշխանությունը: Ուսման Դեմբելեի փոխանցումից հետո Մբապեն դարձավ դուբլի հեղինակ, իսկ 66-րդ րոպեին Դեմբելեն անձամբ գրավեց մրցակցի դարպասը՝ դնելով հանդիպման վերջակետը:
Այս հանդիպումը նշանավորվեց Ֆրանսիայի հավաքականի աստղերի համար մի շարք անհատական նվաճումներով.
Մբապեն հետապնդում է Մեսսիին. 27-ամյա Կիլիան Մբապեն ԱԱ-2026-ի երկու խաղում արդեն դարձել է 4 գոլի հեղինակ։ Աշխարհի առաջնություններում խփած իր գոլերի ընդհանուր քանակը նա հասցրեց 16-ի՝ շրջանցելով բրազիլացի Ռոնալդոյին (15) և հավասարվելով գերմանացի Միրոսլավ Կլոզեին: Այժմ նա բոլոր ժամանակների ռմբարկուների ցուցակում կիսում է 2-րդ տեղը՝ զիջելով միայն արգենտինացի Լիոնել Մեսսիին, ով ունի 18 գոլ (Մեսսին նույնպես մասնակցում է այս մրցաշարին և արդեն աչքի է ընկել 5 անգամ):
Հոբելյանական խաղ և ռեկորդ. Մբապեն անցկացրեց իր 100-րդ հանդիպումը ազգային հավաքականի կազմում: Իր 59-րդ և 60-րդ գոլերով նա ամրապնդեց Ֆրանսիայի հավաքականի պատմության լավագույն ռմբարկուի իր կարգավիճակը:
Դեմբելեի նորամուտային գոլը. «Ոսկե գնդակի» գործող դափնեկիր Ուսման Դեմբելեի համար սա կարիերայում առաջին գոլն էր Աշխարհի առաջնություններում։
Այս հաղթանակի շնորհիվ Դիդիե Դեշամի գլխավորած թիմը վաստակեց 6 միավոր և ապահովեց խմբից դուրս գալու հարցը: Իրաքը առանց միավորների եզրափակում է մրցաշարային աղյուսակը։
Խմբային փուլի վերջին տուրում Ֆրանսիան կմրցի Նորվեգիայի հետ, որն առաջին տուրում 4:1 հաշվով հաղթել էր Իրաքին, իսկ իրաքցիները կփորձեն առաջին միավորները վաստակել Սենեգալի դեմ խաղում:
Տեսանյութը՝ ԱՅՍՏԵՂ
I խմբի աղյուսակն այս պահին
