«Բարսելոնայի» կիսապաշտպան Ֆերմին Լոպեսը կիսվել է թիմի հարձակվող Ռոբերտ Լևանդովսկիի՝ ակումբից հեռանալու վերաբերյալ իր տպավորություններով։
Լեհ ֆուտբոլիստը չի երկարաձգի ավարտվող պայմանագիրը «կապտանռնագույնների» հետ։ Այսօր հարձակվողը հրաժեշտ կտա «Կամպ Նոուի» երկրպագուներին՝ մրցաշրջանի վերջին տնային խաղում մրցելով «Բետիսի» դեմ։
«Ես կկարոտեմ Լևանդովսկիին։ Անձամբ ես նրանից շատ բան եմ սովորել։ Նա հսկայական փորձ ունեցող մեծագույն խաղացող է, որը հաղթել է ամեն ինչ։ Ափսոս, որ նա հեռանում է։ Ռոբերտը ակումբ եկավ բարդ ժամանակահատվածում և մեզ շատ օգնեց։
Նրա պես ֆուտբոլիստների շնորհիվ մեր թիմը կրկին հաջողակ դարձավ։ Շատ շնորհակալ եմ իմ հանդեպ նրա ջերմ վերաբերմունքի համար»,- Ֆերմինի խոսքն է մեջբերում Barca Universal-ը։
Ռոբերտ Լևանդովսկին «Բարսելոնայում» անցկացրել է չորս տարի։ Այդ ընթացքում նա կատալոնացիների կազմում մասնակցել է 191 հանդիպման՝ դառնալով 119 գոլի հեղինակ։
