Ռուսաստանի Պրեմիեր լիգայի 24-րդ տուրում կայացած «Կրասնոդար» — «Զենիթ» (1:1) հանդիպումից հետո «ցլերի» ավագ և Հայաստանի ազգային հավաքականի կիսապաշտպան Էդուարդ Սպերցյանը կիսվել է տպավորություններով, ինչպես նաև շնորհավորել երկրպագուներին Սուրբ Զատկի կապակցությամբ։
«Իհարկե, որոշակի նստվածք մնաց։ Պետք էր ավելի շատ վերահսկել գնդակը և երկրորդ գոլը խփելու ուղիներ փնտրել։ Բայց, ընդհանուր առմամբ, էմոցիաները դրական են։ «Զենիթն» ուժեղ մրցակից է։ Որոշ դրվագներում մի փոքր թերանում էինք, մինչև վերջ չէինք պայքարում: Ընդմիջմանը վերլուծեցինք սխալները և երկրորդ խաղակեսում շտկեցինք դրանք։ Այն, որ երկրորդ կեսում «Զենիթը» ոչ մի գոլային պահ չունեցավ, վկայում է այն մասին, որ մենք ուղղեցինք մեր խաղը»,- Սպերցյանի խոսքերն է մեջբերում «Чемпионат»-ի թղթակից Էլվիրա Բագիրովան։
Հայ կիսապաշտպանը նաև իր երախտագիտությունն է հայտնել ակումբի աջակիցներին տոնական օրով թիմի կողքին լինելու համար.
«Ցանկանում եմ շնորհավորել բոլոր ուղղափառ հավատացյալներին Սուրբ Զատկի կապակցությամբ։ Շնորհակալություն երկրպագուներին մեզ աջակցելու համար։ Նրանք լավագույնն են»:
Նշենք, որ ՌԴ առաջնության 24 հանդիպումներից հետո «Կրասնոդարը» վաստակել է 53 միավոր և գլխավորում է մրցաշարային աղյուսակը։ «Զենիթը» 52 միավորով զբաղեցնում է երկրորդ հորիզոնականը։
Հաջորդ տուրում՝ ապրիլի 19-ին, Մուրադ Մուսաևի գլխավորած թիմը կմրցի «Բալթիկայի» հետ, իսկ Սերգեյ Սեմակի սաները ուժերը կչափեն Մախաչկալայի «Դինամոյի» հետ։
