«Բարսելոնայի» հարձակվող Ռոբերտ Լևանդովսկին սոցիալական ցանցերում հայտնել է, որ դադարեցնում է իր կարիերան Լեհաստանի հավաքականում։
«Հաշվի առնելով հանգամանքները և Լեհաստանի հավաքականի գլխավոր մարզչի նկատմամբ վստահության կորուստը՝ ես որոշել եմ հրաժարվել ազգային հավաքականում խաղալուց, քանի դեռ նա զբաղեցնում է այս պաշտոնը։ Հուսով եմ, որ ապագայում կկարողանամ խաղալ աշխարհի լավագույն երկրպագուների համար», — գրել է Լևանդովսկին։
Միխալ Պրոբիերժը Լեհաստանի հավաքականի գլխավոր մարզչի պաշտոնը ստանձնել է 2023 թվականի սեպտեմբերին։ Նրա օրոք լեհերը առաջինն էին, որ դուրս մնացին Եվրո 2024-ից, և այդ ժամանակ Լեհաստանի ֆուտբոլային ասոցիացիայի նախագահ Ցեզարի Կուլեշան իր լիակատար աջակցությունը հայտնեց ազգային հավաքականի գլխավոր մարզչին։
36-ամյա Ռոբերտ Լևանդովսկին ազգային հավաքականի պատմության լավագույն ռմբարկուն է՝ խփած 85 գոլով։ Նա ազգային հավաքականում խաղում է 2008 թվականից։
