Եվրոպական գոտում ավարտվել են 2026 թվականի աշխարհի առաջնության որակավորման փուլի անցումային վերջին հանդիպումները։ Աշխարհի առաջնության եզրափակիչ փուլի ուղեգրեր են նվաճել Թուրքիայի և Շվեդիայի հավաքականները։
Մարտի 31-ին կայացած C ուղու եզրափակիչում Թուրքիայի հավաքականը Պրիշտինայի «Ֆադիլ Վոկրի» մարզադաշտում 1:0 հաշվով արտագնա հաղթանակ տարավ Կոսովոյի նկատմամբ և ապահովեց իր մասնակցությունը ԱԱ-2026-ին։
Հանդիպման միակ և հաղթական գոլը 53-րդ րոպեին Օրքուն Քյոքչյուի փոխանցումից հետո հեղինակեց հարձակվող Քերեմ Աքթյուրքօղլուն։
Նշենք, որ կիսաեզրափակիչում Կոսովոն անցել էր Սլովակիայի արգելքը (4:3), իսկ Թուրքիան նվազագույն հաշվով առավելության էր հասել Ռումինիայի նկատմամբ:
Տեսանյութը՝ ԱՅՍՏԵՂ
B ուղու եզրափակիչում Շվեդիայի ընտրանին Ստոկհոլմի «Սթրոուբերի Առենա» մարզադաշտում ընդունել էր Լեհաստանին։ Գոլառատ և դիտարժան խաղում դաշտի տերերը հաղթեցին 3:2 հաշվով և նվաճեցին աշխարհի ստուգատեսի ուղեգիր։
Առաջին խաղակեսի միջնամասում հաշիվը բացեց տանտերերի վինգեր Էնթոնի Էլանգան, սակայն 33-րդ րոպեին Նիկոլա Զալևսկին վերականգնեց հավասարությունը։ Ընդմիջումից առաջ՝ 44-րդ րոպեին, պաշտպան Գուստաֆ Լագերբիլկեն կրկին առաջ մղեց շվեդներին, իսկ 55-րդ րոպեին Կարոլ Սվիդերսկին կրկին հավասարեցրեց հաշիվը։ Շվեդների համար հաղթական դարձավ 88-րդ րոպեին հարձակվող Վիկտոր Գյոքերեշի խփած գնդակը։
Նախորդ փուլում Շվեդիան 3:1 հաշվով պարտության էր մատնել Ուկրաինային, իսկ Լեհաստանը հաղթել էր Ալբանիային (2:1):
Տեսանյութը՝ ԱՅՍՏԵՂ
