Տրանսֆերային պատուհանի վերջին օրը կայացած գործարքներն այս պահի դրությամբ

Այսօր, Երևանի ժամանակով 02։00-ին թոփ-5 լիգաներում փակվել է տրանսֆերային պատուհանը։ Կայացած որոշ տրանսֆերների մասին ակումբներն արդեն հայտարարել են։ Սակայն, դեռ կան մեծ թվով տրանսֆերներ, որոնց մասին դեռ պաշտոնական հայտարարություն չի արվել։ Հետևյալ տեղափոխություններին կանդրադառնանք ավելի ուշ։

Վերջին ժամերին կայացած տրանսֆերային անցուդարձը՝ ստորև։

✅ «Տոտենհեմի» կիսապաշտպան Լո Սելսոն տեղափոխվել է «Բետիս»․ տրանսֆերի արժեքը կազմել է 8 մլն ֆունտ։

✅ «Աուգսբուրգի» բելգիացի կիսապաշտպան Արնե Էնգելսը տեղափոխվել է «Սելթիկ»․ տրանսֆերի արժեքը կազմել է 11 մլն եվրո։

✅ «Վեսթ Հեմի» մարոկկացի պաշտպան Նայիֆ Ագերը վարձավճարով տեղափոխվել է «Ռեալ Սոսեյդադ»։

✅ «Սելթիկի» ճապոնացի կիսապաշտպան Տոմոկի Իվատան վարձավճարով տեղափոխվել է «Բիրմինգհեմ»։

✅ «Վեսթ Հեմի» կիսապաշտպան Ջեյմի Վարդ Փրոուսը վարձավճարով տեղափոխվել է «Նոթինգհեմ»։

✅ Անգլիացի հարձակվող Էդի Նկետիան հեռացել է «Արսենալից» և տեղափոխվել լոնդոնյան մեկ այլ ակումբ՝ «Քրիսթալ Փելաս»: «Արծիվները» հայտարարել են 25-ամյա հարձակվողի հետ պայմանագիր կնքելու մասին։ Կողմերը պայմանագիր են կնքել 5 տարով։

✅ Նկետիան «Քրիսթալ Փելասի» միակ նորեկը չէ այսօր․ ակումբը ձևակերպել է նաև «Վոլֆսբուրգի» ֆրանսիացի պաշտպան Մաքս Լակուրայի տրանսֆերը։

✅ «Կրեմոնեզեի» գանացի հարձակվող Ֆելիքս-Աֆենյա Գյանը տեղափոխվեց «Յուվենտուս»։ Սկզբնական շրջանում նա հանդես կգա ակումբի երկրորդ թիմի կազմում։

✅ «Վուլվերհեմփթոնի» անգոլացի վինգեր Չիկինյոն վարձավճարով տեղափոխվեց «Մալյորկա»։

✅ «Բենֆիկայի»  բրազիլացի պաշտպան Մորատոն տեղափոխվեց «Նոթինգհեմ Ֆորեստ»։

✅ Բրազիլիայի հավաքականի և «Ֆլումինենսեի» հենակետային կիսապաշտպան Անդրեն կարիերան կշարունակի ԱՊԼ-ում։ 23-ամյա ֆուտբոլիստը պայմանագիր է կնքել «Վուլվերհեմփթոնի» հետ։ Ֆուտբոլիստի տրանսֆերի համար անգլիական ակումբւ վճարել է 22 մլն եվրո։

✅ «Լիվերպուլի» կիսապաշտպան Ստեֆան Բայչետիչը վարձավճարով տեղափոխվել է ավստրիական «Զալցբուրգ»։

✅ «Ժիրոնայի» կիսապաշտպան Վալերի Ֆերնանդեսը վարձավճարով տեղափոխվել է «Մալյորկա»։

✅ Գերմանացի պաշտպան Ռոբին Գոսենսը վերադարձավ իտալական Ա Սերիա։ Այս անգամ գերմանացին կպաշտպանի «Ֆիորենտինայի» գույները։ Գոսենսի տրանսֆերային իրավունքները պատկանում են «Ունիոն Բեռլինին»: Գոսենսը մեկ մրցաշրջանով վարձավճարով կխաղա իտալական ակումբում։ Իր կարիերայի ընթացքում Գոսենսն արդեն խաղացել է Իտալիայի առաջնությունում՝ պաշտպանելով «Ատալանտայի» և Միլանի «Ինտերի» գույները։

✅ «Ռոմայի» կիսապաշտպան Էդուարդո Բովեն վարձավճարով տեղափոխվել է «Ֆիորենտինա»։

✅ Իսպանական «Ռեալ Սոսյեդադը» հայտարարել է «Կոպենհագենից» Օրրի Օսկարսոնի տեղափոխության մասին։ Իսլանդացի Ֆուտբոլիստը 6 տարվա պայմանագիր է կնքել նոր թիմի հետ։ Գործարքի արժեքը կազմել է մոտ 20 մլն եվրո։

✅ «Ատալանտայի» նիդեռլանդացի կիսապաշտպան Միտչել Բեքերը վարձավճարով տեղափոխվեց ֆրանսիական «Լիլ»։

✅ Շոտլանդիայի հավաքականի և «Բրայթոնի» կիսապաշտպան Բիլի Գիլմորը տեղափոխվեց իտալական «Նապոլի»։ Ըստ Transfermarkt-ի՝ տրանսֆերի արժեքը կազմել է 14 մլն եվրո։ 23-ամյա ֆուտբոլիստը 5 տարվա պայմանագիր է կնքել նոր ակումբի հետ։

✅ Շոտլանդացի վինգեր Ռայան Ֆրեյզերը «Նյուքասլից» տեղափոխվեց «Սաութհեմփթոն»։

✅ Շվեյցարիայի հավաքականի պաշտպան Քևին Մբաբուն «Ֆուլհեմից» տեղափոխվեց «Միդտյուլանդ»։

✅ «Մանչեսթեր Յունայթեդն» իր պաշտոնական կայքում հայտարարել է ՊՍԺ-ից 23-ամյա հենակետային կիսապաշտպան Մանուել Ուգարտեի տեղափոխության մասին։ Ուրուգվայցի ֆուտբոլիստի հետ պայմանագիրը նախատեսված է մինչև 2029 թվականի ամառ՝ ևս մեկ մրցաշրջանով երկարաձգելու հնարավորությամբ։ Ավելի վաղ լրատվամիջոցներում տեղեկություն էր հայտնվել, որ անգլիական ակումբը ֆրանսիական գրանդին վճարել է 50 մլն եվրո։

✅ Մյոնխենգլադբախի «Բորուսիայի» կիսապաշտպան Մանու Կոնեն տեղափոխվել է իտալական «Ռոմա», հայտնում է Transfermarkt-ը։ Ֆրանսիացի կիսապաշտպանի հետ կնքվել է 5 տարվա պայմանագիր։ «Ռոման», ըստ Transfermarkt-ի, ֆուտբոլիստի տրանսֆերի համար կվճարի 17 մլն եվրո։

✅ Նիգերիացի կիսապաշտպան Ֆրանկ Օնյեկան «Բրենտֆորդից» վարձավճարով տեղափոխվեց «Աուգսբուրգ»։

✅ 35-ամյա բրազիլիացի դարպասապահ Նետուն վարձավճարով «Բորնմուտից» տեղափոխվեց «Արսենալ»։

✅ Նիդեռլանդների հավաքականի և «Ֆեյենորդի» պաշտպան Լուտսարել Գերտրուդան տեղափոխվել է գերմանական «Լայպցիգ»։ Ինչպես հայտնում է Sky Sport Deutschland-ը, ռոտերդամյան ակումբը թիմի ավագի տրանսֆերի համար ստացել է գրեթե 20 միլիոն եվրո, ևս 5 միլիոնը տրամադրվել է բոնուսների տեսքով։

✅ «Էվերտոնը» հայտարարել է «Լիոնի» կիսապաշտպան Օրիել Մանգալյային վարձակալելու մասին։

✅ «Բետիսի» և Ֆրանսիայի հավաքականի կիսապաշտպան Նաբիլ Ֆեկիրը տեղափոխվել է ԱՄԷ-ի «Ալ Ջազիրա» ակումբ։

✅ Պորտուգալացի վինգեր Ժոտան վերադարձավ Եվրոպա․ նա «Ալ Իթիհադից» տեղափոխվեց ֆրանսիական «Ռենն»․ տրանսֆերի արժեքը՝ 8 մլն եվրո։

✅ «Ռոմայի» անգլիացի հարձակվող Թեմի Աբրահամը վարձավճարով տեղափոխվել է իտալական մեկ այլ ակումբ՝ «Միլան»։ 

✅ Ֆրանսիացի պաշտպան Սամուել Ժիգոն «Մարսելից» տեղափոխվեց «Լացիո»։ Տրանսֆերի արժեքը՝ 3 մլն եվրո։

✅ Պորտուգալացի հարձակվող Ֆաբիո Սիլվան վարձավճարով «Վուլվերհեմփթոնից» տեղափոխվեց «Լաս Պալմաս»։

✅ «Նապոլին» իր սոցցանցերում հայտնել է «Մանչեսթեր Յունայթեդից» 27-ամյա կիսապաշտպան Սկոթ ՄաքԹոմինայի տեղափոխության մասին։ Տրանսֆերի արժեքը՝ 30 մլն եվրո։

✅ Բելգիացի վինգեր Ալեքս Սաելմակերսը վարձավճարով «Միլանից» տեղափոխվեց «Ռոմա»։

✅ Նիդեռլանդացի վինգեր Արնաուտ Դանժուման վարձավճարով «Վիլյառեալից» տեղափոխվեց «Ժիրոնա»։

✅ «Արսենալի» դարպասապահ Աարոն Ռեմսդեյլը պաշտոնապես միացել է «Սաութհեմփթոնին»:  Հաղորդվում է, որ «Արսենալը» դարպասապահի տրանսֆերի համար անմիջապես կստանա 18 միլիոն ֆունտ ստերլինգ, ևս յոթ միլիոն ֆունտ կտրամադրվի բոնուսների տեսքով։