Առաջիկա ամառային օլիմպիական խաղերին, որոնք կանցկացվեն Փարիզում (Ֆրանսիա), կմասնակցեն Ռուսաստանի ներկայացուցիչ ութ թենիսիստներ (4 թենիսիստ, 4 թենիսիտուհի)։ Ռուս թենիսիստներին թույլատրվել է չեզոք կարգավիճակով մասնակցել 2024 թվականին Փարիզում կայանալիք Օլիմպիական խաղերին։
Այսօր՝ հունիսի 13-ին, Ռուսաստանի թենիսի ֆեդերացիայի ղեկավար Շամիլ Տարպիշչևը հայտարարեց, որ Թենիսի միջազգային ֆեդերացիան (ITF) ընդունել է բոլոր ռուս թենիսիստների հայտը։ Նա նշել է, որ բոլոր այն խաղացողների անունները, ովքեր ընդգրկվել են լավագույն հարյուրյակում (ATP, WTA), ուղարկվել են ITF հաստատման։
Հայտում ներառված են թենիսիստներ, ովքեր ATP/WTA վարկանիշային աղյուսակում ունեն ամենաբարձր դիրքերը։ Ըստ վարկանիշի՝ Փարիզում կայանալիք Օլիմպիական խաղերին պետք է մեկնեն Դանիիլ Մեդվեդևը, Անդրեյ Ռուբլևը, Կարեն Խաչանովը և Ռոման Սաֆիուլինը, թենիսիստուհիներից՝ Միրա Անդրեևան, Դարիա Կասատկինան, Լյուդմիլա Սամսոնովան և Եկատերինա Ալեքսանդրովան։
Այսպիսով, մրցաշարին պետք է մասնակցի նաև Կարեն Խաչանովը, ով Ռուսաստանը ներկայացնող թենիսիստների շրջանում երրորդն է վարկանիշով։ Խաչանովը Տոկիոյի ՕԽ-ի արծաթե մեդալակիր է։
Թիմի վերջնական կազմը կընտրվի մինչև հունիսի 19-ը։ «Պատասխանը եկավ ITF-ից, մեր բոլոր թենիսիստներն թույլատրվել է մասնակցել Օլիմպիական խաղեր, մեր խաղացողների վերաբերյալ հարցեր չառաջացան։ Վերջնական հայտը կուղարկենք մինչև 19-ը։ Գլխավորն այն է, որ մենք կազմի ձևավորման սահմանափակում չունենք։ ITF-ն ասաց, որ ամեն ինչ կախված է միայն մեր մարզիկներից»,- ասել է Տարպիշչևը MatchTV-ին։
