Բարսելոնայի որոշ տնօրեններ կարող են հրաժարական տալ Չավիի մնալու պատճառով

«Բարսելոնայի» տնօրենների խորհրդի որոշ անդամներ կարող են հեռանալ իրենց զբաղեցրած պաշտոններից՝ հաջորդ մրցաշրջանում կատալոնական թիմի գլխավոր մարզչի պաշտոնում Չավիի մնալու որոշման պատճառով։ Այս մասին հաղորդում է Sport.es-ը։

Աղբյուրի համաձայն՝ Չավիի որոշումը տարաձայնություններ է առաջացրել «Բարսելոնայի» տնօրենների խորհրդում, քանի որ կատալոնական ղեկավարությունը պլանավորել է ֆինանսական հաշվետվության հաջորդ շրջանը՝ առանց հաշվի առնելու իսպանացու աշխատավարձը։

Հիշեցնենք, որ «Բարսելոնան» ավելի վաղ հայտարարել էր, որ կատալոնացիների գլխավոր մարզիչ Չավին կմնա թիմում և նույնիսկ կարող է երկարաձգել պայմանագիրն ակումբի հետ։ Նշենք, որ հունվարին Չավին հայտարարել էր կատալոնական թիմի գլխավոր մարզչի պաշտոնից վաղաժամկետ հեռանալու մասին։ Վերջին շրջանում ԶԼՄ-ներում ակտիվորեն քննարկվում է այն տեղեկությունը, որ Չավին կարող է վերանայել իր որոշումը։