Հայկական սպորտն այսօր անդառնալի կորուստ կրեց․ կյանքից հեռացավ մեծանուն մարզիկ, հայկական և համաշխարհային մարմնամարզության լեգենդ Ալբերտ Ազարյանը։
Մարզաշխարհի ներկայացուցիչները, սպորտային մի շարք կառույցներ արձագանքեցին մեծն վարպետի մահվանն ու ցավակցական գրառումներ կատարեցին նրա հիշատակին։
Նախ արձագանքեցին Ազարյանի սպորտային ընտանիքի՝ Հայաստանի մարմնամարզության ֆեդերացիայի ներկայացուցիչները, որոնց հետ լեգենդար մարզիկն անցկացնում էր, թերևս, ամենաշատ ժամանակը։
«Սիրելի հայրենակիցներ, խոր վշտով պիտի տեղեկացնեմ, որ քիչ առաջ կյանքի 94-րդ տարում իր մահկանացուն կնքեց բոլոր ժամանակների մեծագույն հայ մարզիկ ԱԼԲԵՐՏ ԱԶԱՐՅԱՆԸ: Պատիվ և երջանկություն էր լինել ՔՈ ժամանակակիցը, հանգչիր խաղաղությամբ սիրելի՜ վարպետ»,- Ազարյանի կորստի մասին նախ այսպես տեղեկացրեց ֆեդերացիայի նախագահ Գագիկ Վանոյանը։
«Աստված հոգիդ լուսավորի Մեր ուսուցիչ»,- գրեց հավաքականի գլխավոր մարզիչ, օլիմպիական կարգի մրցավար Հակոբ Սերոբյանը։
«Միշտ կհիշենք քեզ, մեր լեգենդ» ․ Եվրոպայի կրկնակի չեմպիոն, Օլիմպիական խաղերի բրոնզե մեդալակիր Արթուր Դավթյան։
Ազարյանի մահվան կապակցությամբ ցավակցական գրառումներ կատարեցին նաև ՀՀ կրթության, գիտության, մշակույթի և սպորտի նախարարությունը, ՀԱՕԿ նախագահը, Հայաստանի ֆուտբոլի, ըմբշամարտի, վոլեյբոլի ֆեդերացիաները, հայկական մի շարք ակումբներ։
ԿԳՄՍՆ․ «ԿԳՄՍ նախարարությունն իր վշտակցությունն է հայտնում Ալբերտ Ազարյանի ընտանիքի անդամներին, հարազատներին և մարզաշխարհի ներկայացուցիչներին։
Հոգեհանգստի արարողության և հուղարկավորության վերաբերյալ կտրվի հավելյալ տեղեկատվություն»:
ՀՖՖ․ «94 տարեկանում կյանքից հեռացել է հայկական սպորտի՝ բոլոր ժամանակների մեծագույն ներկայացուցիչներից մեկը՝ Օլիմպիական խաղերի եռակի չեմպիոն, օղակների արքա Ալբերտ Ազարյանը։ Հայաստանի ֆուտբոլի ֆեդերացիան հայտնում է իր խորին ցավակցությունն Ալբերտ Ազարյանի ընտանիքի անդամներին, հարազատներին ու մարզական աշխարհի բոլոր ներկայացուցիչներին»։
ՀԸՖ․ «Հայաստանի ըմբշամարտի ֆեդերացիան խորապես ցավում է լեգենդար մարզիկ, Օլիմպիական եռակի չեմպիոն Ալբերտ Ազարյանի կորուստը… Մեր զորակցությունն ենք հայտնում Ազարյանների ընտանիքին»։
«Ուրարտու»ՖԱ. «Ալբերտ Ազարյանի անունը ոսկե տառերով է գրված հայկական և համաշխարհային սպորտի տարեգրությունում և հավերժ կմնա մեր հուշերում։ «Ուրարտու» ֆուտբոլային ակումբը ցավակցում և իր զորակցությունն է հայտնում Ազարյանի հարազատներին ու բարեկամներին»։
«Փյունիկ» ՖԱ. «Օղակների արքա՜, հանգչիր խաղաղությամբ»։
«Նոա» ՖԱ․ «Ցավակցում ենք հայկական սպորտի լեգենդ Ալբերտ Ազարյանի ընտանիքի անդամներին, հարազատներին, ընկերներին և մեր բոլոր հայրենակիցներին այս կորստի կապակցությամբ»:
«Արարատ-Արմենիա» ՖԱ․ «Հայկական ու համաշխարհային սպորտը մեծ կորուստ է կրել. կյանքի 94-րդ տարում վախճանվել է հռչակավոր մարմնամարզիկ, Օլիմպիական խաղերի եռակի չեմպիոն Ալբերտ Ազարյանը։ Նրա կյանքը, նվաճումներն ու անունը վառ կմնան մեր պատմության մեջ ու մեր սրտերում։
«Արարատ-Արմենիա» ֆուտբոլային ակումբը իր ցավակցությունն է հայտնում Ազարյանի հարազատներին ու հայկական սպորտային մեծ ընտանիքին` մեծանուն մարզիկի կորստի կապակցությամբ։
Հոգիդ լույսերի մեջ մնա, վարպետ»։
«Արարատ»․ «Սգում ենք Օլիմպիական լեգենդ, հայ մարմնամարզիկ Ալբերտ Ազարյանի մահվան կապակցությամբ»:
ArmSport.am-ը ևս ցավակցում է մարզաշխարհին, Ալբերտ Ազարյանի հարազատներին ու մտերիմներին: Հանգչե՛ք խաղաղությամբ, վարպետ։
