Վազորդ Երվանդ Մկրտչյանը Համաշխարհային ուսանողական ամառային 31-րդ խաղերում բրոնզե մեդալ նվաճեց՝ դառնալով առաջին հայ աթլետը, որը վազքային մրցաձևում մեդալ է նվաճում Համաշխարհային ուսանողական խաղերում:
ArmSport-ի հետ զրույցում Մկրտչյանը խոսել է վերջին նվաճումների, Հայաստանում միջազգային չափորոշիչներին համապատասխան աթլետիկական վազքուղի ունենալու, ինչպես նաև Օլիմպիական խաղերի հեռանկարների մասին:
«Այս տարվա հետ կապված գլխավոր նպատակս Համաշխարհային ուսանողական խաղերն էին. բավական լավ էի նախապատրաստվել: Չենդու-2021-ը վերջին երկու-երեք տարվա ընթացքում ամենասպասված մրցումն էր ինձ համար: Անկեղծ ասած, մտածում էի միայն եզրափակիչ դուրս գալու մասին, քանի որ աթլետիկան բավական բարդ մարզաձև է, Հայաստանում էլ ոչ այնքան լավ զարգացած: Երբ դուրս եկա եզրափակիչ, անսպասելի էր, բոլորը շնորհավորում էին, բայց ես զգում էի, որ կարող եմ ավելին անել»,- խոստովանում է գյումրեցի մարզիկը:
Նրա խոսքով՝ վազքային մրցաձևում Հայաստանից առաջին մեդալակիրը դառնալը մեծ պատիվ է իր համար. «Կարելի է ասել՝ շարունակեցի գյումրեցիների գործը: Եզրափակչում էլ, երբ ընդամենը 300 մետր տարածություն էր մնացել, ես նախավերջին տեղում էի 14-15 մասնակիցների մեջ: Հետո բոլորն ասում էին՝ մտածել են, որ վերջ, ամեն ինչ ավարտվեց: Բայց ես հավատում էի իմ ուժերին ու վստահ էի, որ այդքանով ամեն ինչ չի ավարտվի: Ուրախ եմ, որ մեդալ նվաճեցի, բայց կարծում էի՝ կարող էի ավելի լավ արդյունք գրանցել: Եվ դա արեցի արդեն աշխարհի առաջնության ժամանակ»:
Մկրտչյանը Բուդապեշտում անցկացված աթլետիկայի աշխարհի առաջնությունում ՀՀ նոր ռեկորդ է սահմանել՝ 1500 մետր վազքատարածությունը հաղթահարելով 3։39.35 րոպեում: Նախորդ ռեկորդը ևս գրանցել էր Երվանդ Մկրտչյանը՝ Չինաստանում անցկացված Համաշխարհային ուսանողական խաղերի 1500 մետր վազք մրցաձևում ցույց տալով 3:40.68 արդյունք:
«Աստված առաջ: Կարծում եմ՝ կարող եմ նաև այս արդյունքը բարելավել: Ըստ իս, հիմա իմ լավագույն մարզավիճակում եմ: Այո, դարձա առաջին հայ աթլետը, որը 1500 մետր տարածությունում գերազանցեց 3.40-ի շեմը, բայց դա իմ կատարած աշխատանքի չնչին մասն էր, ու ես պատրաստ էի ավելի բարձր արդյունք գրանցելու, ուղղակի չհասցրի լիարժեք վերականգնվել Ունիվերսիադայից, ապա Համահայկական խաղերից հետո»,- ասում է Երվանդ Մկրտչյանը:
Ի դեպ, Համահայկական ամառային 8-րդ խաղերի ծրագրով աթլետիկայի մրցումներն անցկացվել են Արտաշատի քաղաքային մարզադաշտի՝ միջազգային չափորոշիչներին համապատասխան վազքուղում: Մկրտչյանն այս խաղերում ոսկե մեդալակիր դարձավ 1500մ. վազքում:
«Վերջապես Արտաշատ քաղաքում ունեցանք եվրոպական չափանիշներին համապատասխան վազքուղի: Այն շատ լավն է, որակով: Բայց, կարծում եմ, նախևառաջ նման վազքուղի պետք է մայրաքաղաքում ունենայինք: Գյումրի քաղաքային մարզադաշտում սովորական ռեզինե ծածկոց է տեղադրվել, որի վրա շատ դժվար է պարապելը: Գյումրիում, ինչպես գիտեք, Արթուր Ալեքսանյանի անվան մարզահամալիր է կառուցվում. այդտեղ ևս նախատեսվում է աթլետիկայի համար վազքուղի ունենալ: Կարծում եմ՝ դա շատ կնպաստի արդյունքների բարելավմանը: Բայց նախևառաջ իմ քաղաքում՝ Գյումրիում, առաջնայինը փակ վազքուղիներով մարզադաշտ ունենալն է, քանի որ եղանակային պայմանները Գյումրիում բարենպաստ չեն»,- ասում է Երվանդ Մկրտչյանը:
Խոսելով առաջիկա ծրագրերի մասին՝ գյումրեցի վազորդը տեղեկացնում է՝ Բուդապեշտում սեպտեմբերի սկզբին միջազգային մրցաշարի կմասնակցի:
Մկրտչյանի խոսքով՝ 1500 մետր տարածության համար օլիմպիական վարկանիշները բավականին բարձր են. Օլիմպիական ուղեգիր ապահովելու համար Մկրտչյանը տվյալ տարածությունը պետք է հաղթահարի 3։33.50 րոպեում. «Սա նշանակում է լինել աշխարհում լավագույն 10-15 մարզիկների ցանկում: Շատ բարդ է: Կարծում եմ՝ այս ժամանակին մոտ արդյունք կկարողանամ գրանցել: Տեսնենք»:
Հիշեցնենք՝ Փարիզի ամառային Օլիմպիական խաղերը կանցկացվեն 2024 թվականի հուլիսի 26-ից օգոստոսի 11-ը:
