Անգլիական «Ռեքսհեմ» ֆուտբոլային ակումբը, որի մասին քչերն էին լսել 2020 թվականից առաջ, խելահեղ գաղափարի արդյունքում գնում են հոլիվուդյան դերասաններ Ռայան Ռեյնոլդսը և Ռոբ Մաքելհենին, որոնք ոչ մի կապ չունեին ֆուտբոլի հետ, ու սկսում զարգացնել թիմը։ Արդյունքում, ոչնչով աչքի չընկնող թիմը հաղթում է Անգլիայի հինգերորդ դիվիզիոնը ու բարձրանում չորրորդ՝ 2-րդ լիգա (ԱՊԼ-ից, Չեմպիոնշիփից ու 1-ին լիգայից հետո)։ Անիրական թվացող գաղափարը դառնում է իրականություն։
«Ծրագիրն այն է, որ 10 տարի հետո թիմը խաղա Պրեմիեր լիգայում: Եթե տեսականորեն դա հնարավոր է, ապա ինչու ոչ։ Ոչ ոք այս աշխարհում երբևէ մեծ բան չի արել՝ մտածելով. «Մենք ուզում ենք անցնել ճանապարհի կեսը»: Մենք ուզում ենք գնալ մինչև վերջ։ Եվ մենք հավատում ենք, որ կարող ենք անել դա»-, ասել է Ռեյնոլդսը։
Wrexham Association ֆուտբոլային ակումբը, որը պարծենում է աշխարհի երրորդ ամենահին ակումբի տիտղոսով, ժամանակին հիմնականում պատկանում էր իր նվիրյալ երկրպագուներին: Այնուամենայնիվ, ամեն ինչ փոխվեց, երբ դերասաններն ուշադրություն դարձրին դժվարությունների մեջ գտնվող ակումբի վրա և տեսան փայլուն և ոչ ստանդարտ ներդրումների հնարավորություն: Նրանց գաղտնի զե՞նքը․ ստեղծագործական միտք և մարքեթինգային տաղանդ:
Քանի որ ակումբը պատկանում էր երկրպագուներին ու այն գնելու համար հարկավոր էր նրանց թույլտվությունը, երկու դերասաններն էլ 2020 թվականին երկար ժամեր են անցկացրել՝ Zoom-ով հանդիպելով և զրուցելով ավելի քան 2100 երկրպագուների և աջակիցների հետ: Նրանք ներկայացրել են առաջարկ, որտեղ մանրամասն նկարագրել են իրենց 2,5 միլիոն դոլարի ներդրումն ակումբի խաղացողների և ենթակառուցվածքների վրա, և նույնիսկ 25 տարվա վարձակալություն են կնքել Ռեքսհեմ նույնանուն քաղաքի մարզադաշտի հետ՝ վստահեցնելով երկրպագուներին, որ թիմը կմնա իրենց սիրելի քաղաքում:
«Բարի գալուստ Ռեքսհեմ» վավերագրական սերիալի թողարկումը առանցքային դեր էր խաղում նրանց ռազմավարության մեջ։ Ներկայացնելով ակումբի ճամփորդությունը անհայտության եզրից դեպի համաշխարհային հայտնություն՝ սերիալը վաստակեց 3,2 միլիոն դոլար եկամուտ և արժանացավ հանդիսատեսի հիացական գնահատականներին: Բայց այս ներդրման իսկական փայլը Ռեյնոլդսի և Մաքելհենիի բիզնես հնարամտության և հեռատես մոտեցման մեջ է:
Դուետը հասկանում էր հանդիսատեսի ընկալման ձևավորման կարևորությունը, և նրանք օգտագործեցին իրենց մարքեթինգային հմտություններն ու աստղային ուժը՝ դրան հասնելու համար: Այս գործընթացի առանցքային քայլը ակումբի համար սոցիալական ցանցերում ուժեղ ներկայության ապահովումն էր: Այժմ, ունենալով ավելի քան 3,4 միլիոն հետևորդ սոցիալական ցանցերում, «Ռեքսհեմ» ՖԱ-ն սոցիալական մեդիայում այս առաջխաղացումը վերածել է եկամտաբեր հնարավորությունների: Ակումբն ապահովել է հանդերձանքի հովանավորչական գործարքներ TikTok-ի, Aviation American Gin-ի, Expedia-ի և Vistaprint-ի հետ:
Սակայն նրանց ներդրումների ազդեցությունը դուրս է գալիս ակումբի շրջանակներից: Ներդրումները նաև դրական ազդեցություն են ունեցել Ուելսի գեղատեսիլ քաղաքի վրա: Արդյունքում, տեղական զբոսաշրջային տնտեսությունը զգալի խթան է ստացել՝ գրավելով երկրպագուների ամբողջ աշխարհից: Փորձնական սեզոնի հաջողությունից հետո, «Բարի գալուստ Ռեքսհեմ»-ը կանաչ լույս է ստացել 2-րդ և 3-րդ սեզոնների համար: Նրանց ջանքերը ոչ միայն աշխուժացրել են երբեմնի մոռացված ֆուտբոլային ակումբը, այլև վերափոխել են ամբողջ համայնքի առօրյան:
Ուելսյան «Ռեքսհեմը» մեկն էր այն ակումբներից, ով տարիներ շարունակ խաղացել է կիսապրոֆեսիոնալ անգլիական դիվիզիոնում՝ իր հին մարզադաշտում հավաքելով ավելի քան 4000 երկրպագու, և գրեթե անհայտ էր երկրից դուրս: Խելահեղ գաղափարի արդյունքում՝ ակումբը գնեցին ամերիկացի դերասաններ Ռայան Ռեյնոլդսն ու Ռոբ Մաքելհենին՝ տարված լինելով թիմի մասին վավերագրական սերիալ նկարահանելու գաղափարով։ Ըստ պլանի՝ թիմը, հաղթահարելով դժվարությունները, բարձրանում է դիվիզիոնից դիվիզիոն։ Եվ «Ռեքսհեմը» բարձրացավ․ 15 տարվա մեջ առաջին անգամ ակումբը լքեց սիրողական համարվող անգլիական ֆուտբոլի հինգերորդ դիվիզիոնը՝ բարձրանալով պրոֆեսիոնալ համարվող չորրորդ դիվիզիոն: Ու այդ ամենը երկու տարի անց այն բանից հետո, երբ ակումբի նոր սեփականատերերը եկան Ուելս՝ փոքր ակումբից համաշխարհային մեդիա նախագիծ կառուցելու համար:
