Մարմնամարզության մեծահասակների հավաքականի գլխավոր մարզիչ Հակոբ Սերոբյանը լրագրողների հետ զրույցում ամփոփել է Թուրքիայում անցկացված երիտասարդների աշխարհի ու մեծահասակների Եվրոպայի առաջնությունները.
«Շատ բարդ էր, երիտասարդներն ու մեծահասակներն իրար հետ պետք է մարզվեին: Ամեն ինչը շատ լավ ստացվեց: Նախատեսել էինք, որ մեդալներ կնվաճենք: Բայց մեր սպասելիքներն գերազանցվեցին: Համլետը դարձավ աշխարհի կրկնակի չեմպիոն, ապացուցեց, որ ուժեղագույն է: Նույնն էլ Դավթյան Արթուրը ապացուցեց:
Երիտասարդներն արեցին այն, ինչ կարող են: Չէինք սպասում, որ թիմով կարող ենք լավ արդյունք գրանցել: Ամռանը պատանեկան օլիմպիական փառատոն կանցկացվի, նախատեսում ենք, որ երիտասարդներն կարող են մասնակցել: Ապրեն մեր Համլետը, Մամիկոնը և Էրիկը: Շատ ուրախ ենք: Մեզնից որևէ պահանջ չկա, մենք ենք մեր առջև պահանջ դնում: Կրկնակի պատասխանատու էր, որ Թուրքիայում էինք մրցում: Մենք արդեն իսկ մեր նշաձողը բարձրացրել ենք: Տղաներն արդարացրին սպասելիքները: Երբ երեքով խաչակնքվեցին ու մտան դահլիճ, ես մեծ հպարտություն ապրեցի»,- ասել է Հակոբ Սերոբյանը:
Հայ երիտասարդ մարմնամարզիկները 2 ոսկե և 1 արծաթե մեդալ էին նվաճել Թուրքիայում անցկացված աշխարհի երիտասարդական առաջնությունում:
Հայաստանի հավաքականի կազմում աշխարհի երիտասարդական առաջնության կրկնակի հաղթող էր դարձել Համլետ Մանուկյանը՝ նժույգթափերի և օղակների վարժությունում: Նժույգթափեր վարժության արդյունքներով առաջնության արծաթե մեդալին արժանացել էր Հայաստանի մյուս ներկայացուցիչ Մամիկոն Խաչատրյանը՝ 14.100 միավորով:
Թիմային հաշվարկում Հայաստանի հավաքականը զբաղեցրել էր 4-րդ հորիզոնականը:
