«Վստահ եղեք, որ մեր հնարավորությունների սահմանում, իսկ այդ հնարավորությունները տարեցտարի ավելանում են, ձեզ համար կարվի առավելագույնը: Վստահ եղեք, որ ձեր կատարած աշխատանքը գնահատվում է և դուք մշտապես պետության ուշադրության կենտրոնում եք»: Այս մասին այսօր ասել է ՀՀ կրթության, գիտության, մշակույթի և սպորտի նախարար Վահրամ Դումանյանը՝ ընդունելով ըմբշամարտի աշխարհի Մ23 տարեկանների և բռնցքամարտի Եվրոպայի կանանց մեծահասակների առաջնություններում մեդալներ նվաճած մարզիկներին:
Հանդիպմանը ներկա են եղել ԿԳՄՍ նախարարի տեղակալ Կարեն Գիլոյանը, ըմբշամարտի Մ23 տարեկանների աշխարհի չեմպիոններ Արսեն Հարությունյանը, Վազգեն Թևանյանը, փոխչեմպիոն Գևորգ Թադևոսյանը, բրոնզե մեդալակիրներ Արման Ավագյանը, Հրաչյա Պողոսյանը, բռնցքամարտի Եվրոպայի կանանց մեծահասակների առաջին հայ չեմպիոն Անի Հովսեփյանը, բրոնզե մեդալակիր Սոնա Հարությունյանը, նրանց մարզիչներն ու երկու մարզաձևերի ֆեդերացիաների ներկայացուցիչները:
«Ուրախ եմ ձեզ այստեղ տեսնել և լսել ձեր հաջողությունների մասին: Հույս ունեմ և վստահ եմ, որ հաղթանակների շարքը պետք է շարունակվի մինչև օլիմպիական բարձունքներ: Այս դժվարին ժամանակներում ձեր հաղթանակները ոգևորում են մեր ժողովրդին: Հպարտ եմ ձեզանով և շատ շնորհակալ եմ նվիրված աշխատանքի համար»,- ասել է Վահրամ Դումանյանը:
ԿԳՄՍ նախարարի տեղակալ Կարեն Գիլոյանը ևս բարձր է գնահատել մարզիկների ելույթներն ու նրանց գրանցած արդյունքները. «Վստահ եմ՝ ապագայում հաղթանակներն ավելի ծանրակշիռ են լինելու, քանի որ դրա համար թե՛ մարզիչների ու մարզիկների, թե՛ պետության կողմից արվում է ամեն բան: Առաջիկայում Օլիմպիական խաղերն են ու սպասելիքները շատ մեծ են»:
Հանդիպման ընթացքում մեդալակիր մարզիկներն ու մարզիչները ամփոփել են իրենց ելույթներն ու խոսել տպավորությունների մասին:
Վահրամ Դումանյանը տեղեկացրել է՝ վերջին տարիներին առավելագույն թվով մեդալներ ունեցել ենք 2019 թվականին, երբ մեր պատանի, երիտասարդ և մեծահասակ մարզիկներն աշխարհի, Եվրոպայի առաջնություններում և միջազգային մրցաշարերում ընդհանուր առմամբ նվաճել են 222 մեդալ: 2022 թվականի ընթացքում մեր մարզիկները մինչև այս պահն արդեն իսկ 285 մեդալ են նվաճել, որոնցից 100-ը ոսկե.
«Այս ռեկորդները ձերն են: Այս տարվա հետ կապված սպասելիքները դեռ մեծ են: Շնորհակալ եմ ձեր ջանքերի համար»,- ասել է ԿԳՄՍ նախարարը:
