Ներքին եռուզեռ. Ինչպես օգտագործեցին դադարը հայկական թիմերը

Հայաստանի Բարձրագույն և Առաջին խմբերի առաջնությունում դադար էր` պայմանավորված հավաքականների միջազգային հանդիպումներով:

ArmSport-ը հետևել է հայկական թիմերի անցուդարձին և պարզել, թե ինչպես են օգտագորել այս հատվածը տեղական թիմերը:

«Արարատ»

Բարձրագույն խմբի ընթացիկ առաջնության առաջատարը նոր գլխավոր մարզիչ ունի:

Հայկական ամենահին ֆուտբոլային ակումբի մարզչական ղեկին է ուկրաինացի Վադիմ Լազորենկոն: Մինչև այդ, հոկտեմբերի 12-ին, երևանյան թիմը ընկերական հանդիպման շրջանակում 1:2 հաշվով պարտվել է Առաջին խմբի առաջատար «Վեսթ Արմենիային». «Արարատի» միակ գոլը խփել է Արկադի Կալաջյանը:

«Շիրակ»

«Շիրակը» հոկտեմբերի 11-ին Գյումրիի ֆուտբոլի ակադեմիայում հյուրընկալել է Չարենցավանի «Վանին» և հաղթել 2:0 հաշվով. Հայաստանի «երկրորդ մայրաքաղաքի» թիմի գոլերը խփել են Կարեն Մուրադյանը և Ժիրայր Մարգարյանը:

«Արարատ-Արմենիա»

Գործող չեմպիոնը հոկտեմբերի 14-ին ընկերական հանդիպման շրջանակում ՀՖՖ տեխնիկական կենտրոն/ֆուտբոլի ակադեմիայում հյուրընկալել է ԲԽ-ի ընթացիկ առաջնության հետնապահ «Երևանին» և հաղթել 2:0 հաշվով: «Արարատ-Արմենիայի» գոլերը խփել են Արտյոմ Ավանեսյանը և Հակոբ Խաչատրյանը:

«Ալաշկերտ»

«Ալաշկերտը» այս դադարի ընթացքում ընկերական հանդիպում չի անցկացրել: Կայացել է երկկողմանի խաղ թիմի ամբողջ կազմի միջև:

«Լոռի»

Հոկտեմբերի 11-ին ընկերական հանդիպում է անցկացրել նաև «Լոռին»: Վանաձորի ֆուտբոլի ակադեմիայում կայացած խաղում Հայաստանի Առաջին խմբի նախորդ առաջնության չեմպիոնը 0:1 հաշվով պարտվել է Երևանի «Լոկոմոտիվին»:

«Նոա»

«Նոան» ևս հանդիպում չի անցկացրել այս ընթացքում: Թիմը ծանրաբեռնված մարզումներ է անցկացնում Աշտարակի «Քասախի մարզիկ» ստադիոնում: Հայտնի է, որ կան նաև օրեր, երբ թիմը մեկ օրում 2 մարզում է անցկացնում:

«Փյունիկ»

«Փյունիկը» բավականին հագեցած օգտագործեց դադարը: Տարխանովի գլխավորած թիմը մեկնել էր Ռուսաստան: Հոկտեմբերի 14-ին Նովոգորսկի «ՎՏԲ Նովոգորսկ-Դինամո» արենայում հայկական թիմը ստուգողական հանդիպում էր անցկացրել «Դինամոյի» հետ: Տանտերերը հաղթել են 2:0 հաշվով, իսկ երևանյան թիմի դարպասը պաշտպանել է նույն «Դինամոյի» դարպասապահ Ալեքսանդր Շեպլյանովը…:

«Փյունիկը» վերադարձել է և Երևանում է պատրաստվում ԲԽ-ի առաջիկա հանդիպմանը:

«Ուրարտու»

Այս ընթացքում «Ուրարտուն» ամենօրյա մարզումներ է անցկացրել, օրեր են եղել, որ 2 պարապմունք` առավոտյան և երեկոյան:

«Գանձասար-Կապան»

Հոկտեմբերի 13-ին «Գանձասար-Կապանը» ՀՖՖ տեխնիկական կենտրոն/ֆուտբոլի ակադեմիայում ստուգողական հանդիպում է անցկացրել Հայաստանի մինչև 19 տարեկանների հավաքականի հետ: Խաղն ավարտվել է ոչ-ոքի` 1:1: «Գանձասարի» գոլը խփել է Վարդան Պողոսյանը:

«Երևան»

Ինչպես վերը նշվեց, Բարձրագույն խմբի ներկայիս հետնապահը ստուգողական խաղում 0:2 հաշվով պարտվել է «Արարատ-Արմենիային»:

«Վեսթ Արմենիա»

Բարձրագույն խմբի առաջատար «Արարատի» հետ խաղում «Վեսթ Արմենիայի» գոլերը խփել են Միխայիլ Ժաբկինը և Անդրեյ Զորինը:

«Վան»

Հոկտեմբերի 11-ին «Վանը» ստուգողական խաղում 0:2 հաշվով պարտվել է «Շիրակին»: Թիմն ինտենսիվ մարզումներ է անցկացնում սեփական հարկի տակ` Չարենցավանի մարզադաշտում:

«Սևան»

«Սևանը» նույնպես հագեցած շրջան է անցկացրել: Թիմը 4-օրյա հավաք է անցկացրել Թբիլիսիում, որտեղ կայացել է նաև ընկերական հանդիպում «Շևարդենիի» հետ: Տանտերերը հաղթել են 3:2 հաշվով, հայկական թիմի գոլերը խփել են Արմեն Դուրունցը և Բոգդան Ռյաբեցը:

«Տորպեդո»

Աբովյանում հանդիպումներն անցկացնող «Տորպեդո Երևան» ՖԱ-ն հոկտեմբերի 9-ին ստուգողական հանդիպում է անցկացրել «Դիլիջանի» դեմ. Ալբերտ Աճեմյանի գլխավորած թիմը հաղթել է 3:0 հաշվով. դուբլ է ձևակերպել Օսման Սուլեյմանովը, մեկ անգամ աչքի է ընկել Արսեն Միքայելյանը:

ԲԿՄԱ

Հայաստանի Մ-19 հավաքականի կազմը գրեթե ամբողջապես բաղկացած է ԲԿՄԱ-ից: Մինչև 19 տարեկանների ազգային ընտրանին ոչ-ոքի (1:1) էր խաղացել «Գանձասար-Կապանի» հետ:

«Արագած»

Աշտարակի «Արագածը» հոկտեմբերի 12-ին սեփական հարկի տակ ընկերական հանդիպում է անցկացրել «Դիլիջանի» հետ` հաղթելով 2:1 հաշվով: Գոլի հեղինակ են դարձել Ալեն Համբարձումյանը և Ալեն Կարապետյանը:

«Լեռնային Արցախը», «Մասիսը» և «Անին» միայն մարզումներ են անցկացրել:

«Դիլիջան»

Հայկական միակ թիմն է, որն այս դադարի ընթացքում 2 ստուգողական հանդիպում է անցկացրել: Մրցաշրջանի մեկնարկից առաջ կազմավորված թիմը պարտվել է երկու խաղերում. 0:3 «Տորպեդոյի» և 1:2 «Արագածի» դեմ. այս խաղում «Արագածի» ֆուտբոլիստն ինքնագոլի հեղինակ է դարձել:

Բարձրագույն խմբի առաջնության առաջիկա` 11-րդ տուրը մեկնարկելու է հոկտեմբերի 18-ին.

Հոկտեմբերի 18

15:00. «Նոա» — «Երևան»

հոկտեմբերի 19

15:00. «Շիրակ» — «Արարատ»

հոկտեմբերի 20

15:00. «Ալաշկերտ» — «Լոռի»
17:30. «Փյունիկ» — «Ուրարտու»

հոկտեմբերի 21

16:00. «Գանձասար-Կապան» — «Արարատ-Արմենիա»

Առաջին խմբի առաջնությունը վերսկսվում է այսօր` հոկտեմբերի 16-ին

Հոկտեմբերի 16

15:30. «Տորպեդո» — «Վեսթ Արմենիա»
15:30. «Վան» — «Անի»
15:30. ԲԿՄԱ — «Մասիս»
15:30. «Արարատ-2» — «Սևան»
15:30. «Լեռնային Արցախ» — «Դիլիջան»

հոկտեմբերի 18

15:00. «Արագած» — «Ուրարտու»
15:00. «Լոկոմոտիվ» — «Շիրակ-2»
15:00. «Արարատ-Արմենիա-2» — «Փյունիկ-2»

Արման Առաքելյան