Հունվարին բացվեց 2022 թվականի տրանսֆերային առաջին՝ ձմեռային պատուհանը։ Տրանսֆերային անցուդարձը թերևս ֆուտբոլային աշխարհի ամենահետաքրքիր իրադարձություններից մեկն է, և շատ երկրպագուների է հետաքրքրում ֆուտբոլիստների տրանսֆերները, դրանց վերաբերյալ քննարկումներն ու շշուկները․․․ Հունվարն արդեն հատել է հասարակածը և այսօր մենք կամփոփենք մինչ այժմ տրանսֆերային շուկայում գրանցված ամենակարևոր և հետաքրքիր իրադարձությունները։
Մերոնք՝ Արևելյան Եվրոպայում․․․
Եվ այսպես, տրանսֆերային անցուդարձը սկսենք մերոնցից, իսկ միջազգային անցուդարձին կանդրադառնանք հաջորդ՝ երկրորդ նյութում։
Հայաստանի ազգային հավաքականի ֆուտբոլիստ Տիգրան Բարսեղյանը պաշտոնապես տեղափոխվեց Բրատիսլավայի «Սլովան»։ Ինչպես տեղեկացնում է սլովակական ակումբի պաշտոնական կայքը, կողմերի միջև պայմանագրի ժամկետը նախատեսված է երեք տարով։ Բարսեղյանի նախկին ակումբը ղազախական «Աստանան» էր։ «Սլովանը» Սլովակիայի ամենահեղինակավոր և ուժեղագույն ակումբներից մեկն է, այս պահին առաջնության առաջատարը։ Ընդհանուր առմամբ այս տեղափոխությունը կարելի է առաջընթաց համարել Տիգրանի համար, նամանվանդ, եթե հաշվի առնենք, որ Ղազախստանի առաջնությունն այս պահին ավելի շատ սկսել է զիջել դիրքերը, քան առաջընթաց գրանցել (հաշվի առնենք նաև վերջին քաղաքական իրադարձությունները, որը ևս կարող է բացասական ազդել երկրում մարզական կյանքի վրա)։
Հեռու չգնանք Ղազախստանից՝ համառոտ ամփոփելով հայ ֆուտբոլիստների վերաբերյալ նորությունները։ Հայ դարպասպահ Արամ Հայրապետյանը համաձայնել է աշխատավարձի նվազեցման և երկարաձգել է պայմանագիրն «Ատիրաուի» հետ: Այս մասին հայտնի է դարձել Meta-ratings.kz-ին: Իսկ ահա Սոլոմոն Իմե Ուդոն միացել է «Ակտոբեին», hայտնում է ղազախ լրագրող Այդին Կոժախմետը, չնայած, ավելի վաղ նշվում էր, որ մեր հավաքականի կիսապաշտպանի ծառայություններով հետաքրքրված էին նաև ռուսական «Նիժնի Նովգորոդը» և «Ուրալը»։ Վերջինս հետաքրքրված էր նաև Ղազախստանում հանդես եկած ևս մեկ հայ ֆուտբոլիստի՝ Կամո Հովհաննիսյանի ծառայություններով, ով հեռացել է «Կայրաթից»։ Հովհաննիսյանին կանդրադառնանք մի փոքր ուշ։ Իսկ ահա կիսապաշտպան Արտակ Դաշյանը հեռացել է «Ատիրաուից» և կարիերան կշարունակի Հայաստանում՝ «Փյունիկում»։
Հայաստանի ազգային հավաքականի ևս մեկ ֆուտբոլիստ՝ Վահան Բիչախչյանը, փոխել է ակումբային գրանցումը։ 22-ամյա ֆուտբոլիստը Սլովակիան ներկայացնող «Ժիլինայից» տեղափոխվել է Լեհաստանի Բարձրագույն խումբը ներկայացնող «Պոգոն» ակումբ։ Ինչպես տեղեկացնում է լեհական ակումբի պաշտոնական կայքը, Վահանի հետ կնքվել է 3,5 տարվա պայմանագիր։ «Պոգոնը» Լեհաստանի ընթացիկ առաջնությունում զբաղեցնում է մրցաշարային աղյուսակի երկրորդ հորիզոնականը։ Մեր ֆուտբոլիստը նույնիսկ հասցրել է աչքի ընկնել գոլով իր առաջին խաղում նոր ակումբի կազմում։ Վահանի գոլը՝ այստեղ։
Այս դեպքում ևս կարելի է ասել, որ Բիչախչյանը մեկ քայլ առաջ է կատարել․ Լեհաստանի առաջնությունն այս պահի դրությամբ բավականին ուժեղ առաջնություն է, որտեղ նկատվում է պրոգրես, իսկ լեհական թիմերը վերջին շրջանում սկսել են ավելի հաճախ մասնակցել եվրագավաթների հիմնական փուլերին։
Արևելյան Եվրոպայում կարիերան կշարունակի Հայաստանի հավաքականի ևս մեկ ներկայացուցիչ․ Ուկրաինական «Վերեսը» պաշտոնական կայքի միջոցով հայտնեց Ժիրայր Մարգարյանի հետ պայմանագիր ստորագրելու մասին։ Կողմերի միջև պայմանագիրը նախատեսված է 3,5 տարվա համար։
Իսկ Արթուր Ավագիմյանը պաշտոնապես տեղափոխվեց ուկրաինական մեկ այլ ակումբ՝ «Ալեքսանդրիա»։ Ավագիմյանը «Ալեքսանդրիա» տեղափոխվեց «Չեռնոմորեցից»։ Պայմանագիրը նախատեսված է մինչև 2025 թվականի հունիսի 30-ը։ Ավելի վաղ նա հանդես էր գալիս Երևանի «Ալաշկերտում»։
Ինչ վերաբերում է տրանսֆերային շշուկներին․․․ Հայաստանի ազգային հավաքականի ֆուտբոլիստ Կամո Հովհաննիսյանն այսօր՝ հունվարի 18-ի առավոտյան, Երևան-Մոսկվա-Անթալիա չվերթով մեկնել է Հայաստանից: Այս մասին հայտնում է Armenian Football Group (AFG)-ը՝ հղում կատարելով իր աղբյուրներին: Ավելի վաղ հաղորդվում էր, որ հայ ֆուտբոլիստի ծառայություններով լրջորեն հետաքրքրված են ռուսական «Ուրալը» և «Ուֆան», ինչպես նաև հունական մի քանի ակումբներ։ Հատկանշական է, որ Հովհաննիսյանի ծառայություններով ակտիվորեն հետաքրքրված ակումբներից միայն ռուսական «Ուֆան» է այս պահին հավաք անցկացնում Անթալիայում։
Ինչպես հայտնի է դարձել «Матч ТВ»-ին, «Վելեսի» կիսապաշտպան Արթուր Գալոյանը թիմի հետ բուժզննում է անցնում, բայց, ամենայն հավանականությամբ, թիմի հետ ուսումնամարզական հավաքի չի մեկնի։ Այս շաբաթ պետք է լուծվի 22-ամյա կիսապաշտպանի՝ ՌՊԼ-ի ակումբ տեղափոխության հարցը։ Ավելի վաղ հաղորդվում էր, որ Գալոյանի ծառայություններով հետաքրքրված են «Ռոստովը», «Սոչին» և «Լոկոմոտիվը», ինչպես նաև «Գենտը», սակայն, ըստ աղբյուրի, նա դժվար թե տեղափոխվի Բելգիայի առաջնություն։
Տրանսֆերային անցուդարձը ՀՊԼ-ում․․․
Մեր ակումբներն արդեն դուրս են եկել ձմեռային արձակուդից և մարզումներ են անցկացնում։ Նոր համալրումներն այդքան էլ շատ չեն հայկական ակումբներում, սակայն մի շարք ֆուտբոլիստներ արդեն հեռացել են կամ փոխել են ակումբային գրանցումը։
Ֆուտբոլիստ Դանու Սպատառուի և «Արարատ-Արմենիա» ֆուտբոլային ակումբի միջև կնքված պայմանագրի ժամկետը ավարտվել է: Ինչպես հայտնում է ակումբի մամուլի ծառայությունը, կողմերը համատեղ որոշում են կայացրել չերկարաձգել պայմանագրի ժամկետը:
Լատվիայի հավաքականի կիսապաշտպան Էդուարդս Էմսիսը հեռացել է Երևանի «Նոայից»։ Ինչպես տեղեկացնում է ակումբի մամուլի ծառայությունը, ֆուտբոլիստի պայմանագրի ժամկետը լրացել է, և կողմերը որոշել են չերկարաձգել այն։ Թիմից հեռացել է նաև Հայաստանի հավաքականի հարձակվող Ալեքսանդր Կարապետյանը, ինչպես նաև «Նոայի» պատմության մեջ խաղերի քանակով ռեկորդակիր Բենիկ Հովհաննիսյանը, Դենիս Դեդեչկոն, Ջեֆերսոնը, Արտյոմ Ֆիլիպովը, Ալեքսանդր Գոլովնյան, Դոբրիվոյե Վելիմիրը, Նիկոլայ Նովիկովը, Պավել Օվչիննիկովը, Վադիմ Պաիրելին։ Փոխարենը «Նոան» ձեռք է բերել Գևորգ Տարախչյանին, Արթուր Քարտաշյանին, Ալեքսեյս Գրյազնովսին, Թարեք Աֆկիրին, Վարդան Շահատունուն և Ալեքսեյ Չիոպային։
«Փյունիկը», բացի վերևում արդեն նշված Դաշյանի, ևս մեկ համալրում ունի. թիմին է միացել 32-ամյա բրազիլացի հարձակողական ոճի կիսապաշտպան Տիագո Գալվաոն, ում վերջին թիմը եղել է Երևանի «Ալաշկերտը»։ Թիմից հեռացել են կիսապաշտպաններ Էրիկ Վարդանյանը և Արամ Քոչարյանը: Ինչպես տեղեկացնում է ակումբի մամուլի ծառայությունը, երկկողմ համաձայնությամբ խզվել են պայմանագրերը նաև դարպասապահ Սևակ Ասլանյանի, պաշտպան Սուրեն Հարությունյանի և հարձակվող Լազար Յովանովիչի հետ։ Թիմից հեռացել է նաև բոսնիացի կիսապաշտպան Ադնան Շեչերովիչը։
Երևանի «Արարատից» հեռացել են հարձակվողներ Սերժ Դեբլեն ու Յակուբա Սիլուեն: Ֆուտբոլիստների հետ պայմանագրերը խզվել են փոխադարձ համաձայնությամբ: Հիշեցնենք, որ օրեր առաջ թիմից հեռացել էր գլխավոր մարզիչ Վարդան Բիչախչյանը:
«Ալաշկերտի» գլխավոր մարզչի պաշտոնը կրկին ստանձնել է Արամ Ոսկանյանը, ով նախորդ երկու տարիներին հանդիսանում էր ղազախական «Ատիրաու» թիմի գլխավոր մարզիչը։ Ոսկանյանի մարզչական շտաբում ընդգրկվել են նաև Մանուկ Սարգսյանը և ֆիզպատրաստության մարզիչ Հայկ Ոսկանյանը։ «Ալաշկերտի» պատմության լավագույն լեգիոներ-ռմբարկուն՝ Ալեքսանդր Գլիշիչը հեռացել է թիմից։ Այս մասին ArmSport-ի հետ զրույցում ասել էր սերբ ֆուտբոլիստը։
«Վանը» լքել են Ստեֆան Աջումանին, Էդեդեմ Էսսիենը, Եռնիստ Բատիրկանովը, Լուիզ Մենեզեսը, Բրունո Միրանդան և Նիկոլայ Ցիգանը: Առաջիկա օրերին Չարենցավանի ակումբը կհայտարարի լքած ևս մի քանի խաղացողի մասին: Այս պահին «Վանում» փորձաշրջան են անցնում մի շարք հայ և արտասահմանցի ֆուտբոլիստներ, որոնք կմասնակցեն առաջիկա ընկերական հանդիպումներին:
ԲԿՄԱ-ն ևս հայտարարել է մի շարք ֆուտբոլիստների հեռանալու մասին: Կարեն Մուրադյանը, Արման Ղազարյանը, Պատվական Ավետիսյանը, Ստեփան Սահրադյանը, Հայկ Ղևոնդյանը, իսկ ԲԿՄԱ-2֊ից՝ Ռադիկ Սարգսյանը, Գրիգոր Մուրադյանը, Տիգրան Վարդանյանը և Սուրեն Հակոբյանը այլևս չեն շարունակի ելույթներն ակումբի կազմում:
Վար Բաբայան
