Վաղը` հուլիսի 8-ին կայանալիք Կոնֆերենցիաների գավաթի որակավորման առաջին փուլի «Նոա»-ԿուՊՍ խաղից առաջ կայացած ասուլիսին մեր թիմի գլխավոր մարզիչ Արամ Հակոբյանը լրագրողների հարցերին:
-Պարո՛ն Հակոբյան, հասցրե՞լ եք ուսումնասիրել մրցակցին, ի՞նչ կարծիք ունեք։
-Նախ ասեմ, որ ֆիննական ԿուՊՍ-ը, իրոք, լավ թիմ է։ Հասցրել ենք ուսումնասիրել, 7-8 խաղ ենք վերլուծել։ Ինչպես բոլորը՝ նրանք էլ ունեն իրենց ուժեղ և թույլ կողմերը։ Պետք է վաղը փորձենք օգտագործել իրենց թույլ կողմերը, որ հասնենք հաջողության։
-Հաշվի առնելով, որ Հայաստանում հիմա շոգ եղանակ է, նաև այն, որ «Նոան» խաղալու է բնական խոտածածկի վրա, իսկ մրցակիցը արհեստականի է սովոր՝ մեր թիմը կարո՞ղ է որոշակի առավելություն ստանալ։
-Եղանակի առումով, կարծում եմ, որոակի առավելություն կունենանք, որովհետև երկար ժամանակ է մարզվում ենք այս եղանակային պայմաններում։ Իսկ խաղադաշտի հետ կապված՝ կարծում եմ՝ բոլոր երկրներում էլ կան բնական խոտածածկով մարզադաշտեր ու իրենք էլ դրան պատրաստված կլինեն։
-Որքանո՞վ եք հասցրել ծանոթանալ «Նոայի» ֆուտբոլիստների որակներին ու որքանո՞վ եք հասցրել նրանց Ձեր ուզածով պատրաստել վաղվա խաղին։
-Նախորդ մրցաշրջանում հետևել եմ թիմի խաղերին, բավականին ծանոթ էի նրանց։ Հիմնականում թիմի կորիզը մնացել է նույնը ու դժվարություններ այդ առումով չունեցանք։ Իսկ որակային առումներով էլ մարզումների միջոցով ծանոթացանք նրանց։ Մեր թիմը օպտիմալ վիճակում է, որը լավ դիմակայելու պատրաստ է։
-Ո՞րն է Ձեր դերը ներկայիս մարզչական շտաբում․ տպավորություն կա, որ ռուս մարզչի օգնականի պարտականություններն եք ավելի շատ կատարելու։
-Լավ մարզչական շտաբ է հավաքվել, որտեղ տնօրինում է ընդհանուր գաղափարը։ Պետք է բոլորով աշխատենք։ Ինչ-որ մեկին չէի տարանջատի։ Մի միտք, մի գաղափար․ նպատակը լավ արդյունք գրանցելն է։
