Հունիսի 11-ին Հռոմում կմեկնարկի երկար սպասված Եվրո-2020-ը։ ԵԱ-ին մասնակցում են 24 հավաքականներ, որոնք բաժանված են 6 խմբի՝ յուրաքանչյուրում 4-ական թիմ։ Մինչ մրցաշարի մեկնարկը ArmSport-ն առաջարկում է վերհիշել խմբերն ու մասնակից թիմերին։
Այսօր կխոսենք A խմբի մասին, որտեղ միմյանց դեմ կմրցեն Իտալիայի, Շվեյցարիայի, Թուրքիայի և Ուելսի հավաքականները։ Ի դեպ, մրցաշարը կմեկնարկի այս խմբում հանդես եկող Թուրքիայի ու Իտալիայի ազգային թիմերի խաղով։
🇮🇹 «Կապույտ թիմը»
Գլխավոր մարզիչ՝ Ռոբերտո Մանչինի
Տիտղոսներ՝ ԱԱ քառակի չեմպիոն, ԵԱ չեմպիոն
ՖԻՖԱ-ի վարկանիշ՝ 7-րդ տեղ
Իտալիայի հավաքականն առաջին պաշտոնական խաղն անցկացրել է 1910 թվականին։ Մայիսի 15-ին Միլանում իտալացիներն ընդունել էին Ֆրանսիայի ընտրանուն ու հաղթել 6-2 հաշվով։
Իտալիայի հավաքականն աշխարհի քառակի չեմպիոն է (1934, 1938, 1982, 2006), ընդ որում, եվրոպական առաջին հավաքականն է, որը դարձել է աշխարհի չեմպիոն և, առհասարակ, առաջին հավաքականը, որը կարողացել է պաշտպանել աշխարհի չեմպիոնի տիտղոսը՝ այն նվաճելով 1934 և 1938 թվականներին։
Իտալիայի հավաքականին հաճախ անվանում են Squadra Azzurra, ինչը թարգմանաբար նշանակում է «Կապույտ թիմ»։ Ավանդության համաձայն՝ Իտալիայի ազգային հավաքականի և Իտալիան ներկայացնող ցանկացած մարզիկի մարզահագուստի կապույտ գույնը կապված է Սավոյների արքայատան (Սավոյների դինաստիա) հետ, որի առաջնորդը 1861 թվականին դարձավ միավորված Իտալիայի թագավորը։ Կապույտը հենց այս արքայատան գույնն էր համարվում, որի որոշակի երանգն Իտալիայում կոչվում է Սավոյան կապույտ։
Իտալիայի հավաքականում անցկացրած խաղերի թվով ռեկորդակիրը դարպասապահ Ջանլուիջի Բուֆոնն է, որ ազգային թիմի մարզաշապիկը հագել է 176 անգամ։ Լավագույն ռմբարկուն Լուիջի Ռիվան է՝ 35 գոլով։
Այսօր Իտալիայի հավաքականի դարպասում Բուֆոնին փոխարինել է «Միլանի» երիտասարդ դարպասապահ Ջանլուիջի Դոնարուման, իսկ Եվրո-2020-ի հայտացուցակին նայելով՝ կարելի է տեսնել, որ Մանչինիի թիմն աստղային ֆուտբոլիստների պակաս չունի և խմբում հեշտությամբ կարող է լուծել իր խնդիրները։ Թիմը բավականին բալանսավորված է՝ փորձառու և երիտասարդ ֆուտբոլիստների համադրությամբ։ Ինչպես և օրերս նշել էր հավաքականի ավագ, փորձառու պաշտպան Ջիորջիո Կյելինին՝ հավաքականում երիտասարդներին շատ բան պետք չէ ճնշումը հաղթահարելու համար։ «Մենք արդեն մի քանի լուրջ հանդիպում անցկացրել ենք, դա գերազանց փորձ էր, տղաները մեծ նվիրվածություն ցույց տվեցին»,- հավելել էր նա։
Հետաքրքիր կլինի հետևել հավաքականի երիտասարդ ֆուտբոլիստների խաղին, մասնավորապես՝ Կիեզայի, Բարելայի, Պոլիտանոյի, Լոկատելիի և Պեսինայի, որոնք Squadra Azzurra-ի ապագան են։
Հայտացուցակի անակնկալներից մեկը Մոյզե Քինի բացակայությունն է, որը լավ մրցաշրջան անցկացրեց ՊՍԺ-ում։ Փոխարենը՝ Մանչինին շարունակում է նախապատվությունը տալ Իմոբիլե-Բելոտի զույգին։
Իտալացիներն առաջին խաղը կանցկացնեն հարազատ պատերի ներքո՝ Հռոմի «Օլիմպիկո» մարզադաշտում, ինչը, իհարկե, նույնպես մեծ առավելություն կլինի։
🇨🇭 «Կարմիր խաչեր»
Գլխավոր մարզիչ՝ Վլադիմիր Պետկովիչ
Տիտղոսներ՝ ՕԽ արծաթե մեդալակիր (1924)
ՖԻՖԱ-ի վարկանիշ՝ 13-րդ տեղ
Շվեյցարիայի հավաքականն իր առաջին միջազգային խաղն անցկացրել է 1905 թվականին․ մրցակիցը Ֆրանսիայի հավաքականն էր ու առաջին խաղը շվեյցարացիները մեկնարկեցին նվազագույն հաշվով պարտությամբ։
Շվեյցարիայի ընտրանին դրանից հետո էլ մեծ թվով հաջողություններ չունեցավ․ հավաքականի միակ տիտղոսն առայժմ մնում է 1924 թվականի Փարիզի Օլիմպիական խաղերի արծաթե մեդալը։
1954 թվականին Շվեյցարիան ընդունեց Աշխարհի առաջնությունն ու գրանցեց 3-րդ լավագույն արդյունքը՝ հասնելով քառորդ եզրափակիչ։ Այս փուլում, սակայն, շվեյցարացիները 5-7 հաշվով պարտվեցին Ավստրիայի ընտրանուն։ Այս խաղը մինչ օրս ԱԱ պատմության ամենագոլառատ խաղն է համարվում։
2006-ին Շվեյցարիան ԱԱ ռեկորդ գրանցեց` առանց գոլ բաց թողնելու դուրս մնալով մրցաշարից։ Իսկ դուրս մնաց 1/8 եզրափակչում հետխաղային 11-մետրանոց հարվածաշարում Ուկրաինային պարտվելու պատճառով։
Շվեյցարիայի հավաքականին կոչում են նաև Rossocrociati, ինչը թարգմանաբար նշանակում է «Կարմիր խաչեր»։ Այն ուղիղ կապ ունի երկրի պետական դրոշի հետ, որը պատկերում է սպիտակ խաչ՝ կարմիր գույնի ֆոնին։
Շատերը Շվեյցարիայի հավաքականն ասոցացնում են Գրանիտ Ջակայի ու Ջերդան Շաքիրիի հետ, բայց հարկ է նշել, որ այժմյան թիմի կազմում ոչ պակաս կարևոր դեր ունեն նաև Դենիս Զաքարիան ու Մանուել Ականջին։
Հետաքրքրական է այն, որ Ազգային հավաքականի կազմում մեծ թիվ են կազմում ծագումով ոչ շվեյցարացի ֆուտբոլիստները։
Այս խմբում Շվեյցարիային, իհարկե, ֆավորիտ համարել չի կարելի, բայց նա լավ շանսեր ունի ամրապնդվելու լավագույն եռյակում։
Թուրքիայի հավաքական
Գլխավոր մարզիչ՝ Շենոլ Գյունեշ
Տիտղոսներ՝ ԱԱ բրոնզե մեդալակիր (2002)
ՖԻՖԱ-ի վարկանիշ՝ 23-րդ տեղ
Թուրքիայի հավաքականի պատմությունը սկսվում է 1923 թվականից։ Այս հավաքականի առաջին մրցակիցը նույն թվականին եղել է Ռումինիան, որի հետ խաղն ավարտվել է 2-2 հաշվով։
Այս երկրի հավաքականը Սիրիայի ընտրանու դեմ տարած 7-0 հաշվով հաղթանակից հետո որակավորվել էր մասնակցելու Աշխարհի՝ 1950 թվականի առաջնությանը, սակայն ֆինանսական խնդիրների պատճառով ստիպված է եղել դուրս մնալ մրցաշարից։
Չնայած մեր վերաբերմունքին վերոնշյալ երկրի հանդեպ՝ պիտի փաստենք, որ այս Եվրոյին նրանք խմբից դուրս գալու պոտենցիալ ունեն։
Ինչպես արդեն նշեցինք՝ նրանք մրցաշարում առաջին խաղը կանցկացնեն հունիսի 11-ին՝ Հռոմում մրցելով Իտալիայի ազգային հավաքականի հետ։
«Վիշապները»
Գլխավոր մարզիչ՝ Ռայան Գիգզ
Լավագույն արդյունք՝ ԱԱ 1/4 (1958), ԵԱ 1/2 (2016)
ՖԻՖԱ-ի վարկանիշ՝ 17-րդ տեղ
Ուելսի հավաքականի առաջին խաղը կայացել է 1876 թվականին․ մարտի 26-ին Գլազգոյում «վիշապները» մրցում էին Շոտլանդիայի դեմ ու պարտվեցին 0-4 հաշվով։
Ուելսի հավաքականին է պատկանում ՖԻՖԱ-ի վարկանիշային աղյուսակի ամենաարագ առաջընթացը։ 2011-ին Ուելսը աղյուսակի 117-րդ տեղում էր, իսկ արդեն 2015-ին բարձրացավ 8-րդ հորիզոնական։
Թեև հավաքականի գլխավոր մարզիչը Ռայան Գիգզն է, բայց ինչպես հայտնի դարձավ վերջերս՝ նա թիմին չի առաջնորդի Եվրոյի ժամանակ։ Պատճառը նախկին ֆուտբոլիստի դեմ մեղադրանքներն են․ Ուելսի ֆուտբոլի ֆեդերացիան հաղորդագրություն էր տարածել, որ 2 կանանց վրա հարձակվելու հետ կապված դատական գործերի պատճառով Գիգզը չի ղեկավարի թիմի գործողությունները Եվրո-2020-ի ժամանակ: Նրան փոխարինելու է Ռոբերտ Փեյջը։
Հավաքականի լավագույն ռմբարկուն թիմի առաջատար Գարեթ Բեյլն է, որի ակտիվում 33 գնդակ է։
Ուելսի հավաքականի ուժեղագույն օղակը կենտրոնական հատվածն է, որտեղ բացի Բեյլից, գործում են նաև Աարոն Ռեմսին ու Ջո Ալենը։ Իսկ երիտասարդ Իթան Ամպադուն և Դանիել Ջեյմսը կփորձեն առավելագույնս լավ դրսևորել իրենց նման խոշոր մրցաշարում՝ թիմի համար խմբում հնարավորինս բարձր տեղ ապահովելու համար։
11.06․2021 ⏰23։00 Թուրքիա-Իտալիա, Հռոմ
12.06․2021 ⏰17։00 Ուելս-Շվեյցարիա, Բաքու
16․06․2021 ⏰20։00 Թուրքիա-Ուելս, Բաքու
16․06․2021 ⏰20։00 Իտալիա-Շվեյցարիա, Հռոմ
20․06․2021 ⏰20։00 Շվեյցարիա-Թուրքիա, Բաքու
20․06․2021 ⏰20։00 Իտալիա-Ուելս, Հռոմ
Ստելլա Բաբլոյան
