Դե ինչ, տևական դադարից հետո ֆուտբոլային շունչը վերադառնում է Հայաստան: Հայաստանի ազգային հավաքականն այսօր կսկսի պայքարը ԱԱ-2022-ում հայտնվելու համար, և այդ պայքարի ճանապարհի առաջին կանգառը Լիխտենշտեյնում է։ Կարելի է պատկերացնել, թե ինչ անշլագ կարող է լինել Երևանում երեք օր անց, եթե մեր թիմը 3 միավորով վերադառնա Լիխտենշտեյնից:
Յուրաքանչյուր ընտրական փուլից առաջ հայ երկրպագուի մոտ արթնանում են նոր հույսեր, որ մի օր մենք էլ կհայտվենք Աշխարհի կամ Եվրոպայի առաջնություների որակավորման փուլերում: Որքան էլ գիտակցենք, որ ընտրական այս փուլում մեզ բաժին հասած խումբը, մեղմ ասած, ամենահարմարներից չէ մեզ համար, այնուամենայնիվ, դրանից չեն պակասում մեր սպասումները: Ամեն դեպքում, ամեն նոր բանի սկիզբ հաջող մեկնարկի նոր հնարավորություն է։
Արդեն հաջորդ երկու խաղերում հավաքական թիմը աջակցություն կունենա տրիբունաներից: Մարտի 28-ին ազգային թիմը Երևանում կմրցի Իսլանդիայի, իսկ դրանից 3 օր անց՝ Ռումինիայի հավաքականի հետ։ Առաջիկա խաղերը լավ առիթ են ֆուտբոլային քաղցը հագեցնելու ու հավաքականի խաղերը վայելելու համար: Ճիշտ է, տրիբունաներում թույլատրելի է, որ ներկա գտնվեն երկրպագուները միայն մարզադաշտի տարողության 30 %-ի չափով, սակայն վստահ ենք, որ տղաները այդ կերպ էլ հզոր աջակցություն կստանան, իսկ մինչ այդ պետք է այսօր վաստակել 3 միավորը ու հաղթանակած վերադառնալ հայրենիք: Ինչպես նախախաղային ասուլիսի ընթացքում նշեց պարոն Կապառոսը, թիմը հիմա կենտրոնացած է առաջին խաղի վրա և ցանկանում է 3 միավոր վաստակել։ Դրանից հետո միայն կմտածեն հաջորդ խաղերի մասին։
Վերջին ամիսներին կատարվող իրադարձությունները՝ անկասկած իրենց հետքն են թողել ինչպես մեր հավաքականի ֆուտբոլիստների, այնպես էլ հայ մարզասերների վրա: Ազգային թիմի փոքրիկ հաջողությունը ազգերի լիգայում հայ երկրպագուներն իսկապես չվայելեցին։ Կորոնավիրուսն ու պատերազմը մեզ տեղափոխել էր ամբողջովին այլ իրականություն։ Ավելորդ է ասել, թե մեր ազգի համար այս դժգույն ժամանակաշրջանում որքան ուրախալի են նույնիսկ ամենափոքրիկ հաղթանակները, էլ չենք խոսում սպորտային հաղթանակների՝ այն էլ ֆուտբոլի ազգային թիմի հաջողությունների մասին։
Վերջին օրերը հայկական մարզաշխարհի համար ֆանտաստիկ ստացվեցին: Ըմբիշների փառահեղ հաջողությունները պետք է շարունակել ֆուտբոլով: Այլ տարբերակ պարզապես չկա։ Այսօր պետք է հաղթենք ու վե՛րջ։
Ազգային թիմի խաղերից առաջ ցանկացած հայ ֆուտբոլասերի մոտ յուրատեսակ զգացում է առաջանում՝ հաղթելու անսպառ հավատով: Իսկ այդ հաղթանակն այսօր ավելի, քան երբևէ, պետք է մեզ, պետք է մեր ազգին․․․ դե ուրեմն՝ առա՛ջ տղաներ, Ձեր հաղթանակը հիմա կարևոր է, քան երբևէ:
Երվանդ ՀԱԿՈԲՅԱՆ
