Հայաստանի Ֆիզիկական կուլտուրայի և սպորտի պետական ինստիտուտը ֆիթնես մարզիչներին այսուհետ հնարավորություն կտա կատարելագործվել:
Ինստիտուտում կայացած մամուլի ասուլիսի ընթացքում ՀՖԿՍՊԻ-ի նորընտիր ռեկտոր Դավիթ Խիթարյանը խոսեց ԲՈՒՀ-ի ռազմավարության և ծրագրերի մասին:
«Մեր ԲՈՒՀ-ի ռազմավարության մեջ է մտնում շարունակական կրթության ապահովումն ու զարգացումը որպես կրթության ձև: Ինչպես գիտեք երկար տարիներ ԲՈՒՀ-ում գործում էր մերսման դասընթացներ և մենք մեր ռազմավարության մեջ նպատակ ունենք նաև այլ ոլորտներ ընդգրկել, որպեսզի մեր նախկին շրջանավարտները, մեր ուսանողները կամ այլ մասնագետներ հնարավորություն ունենան ավելի նեղ մասնագիտական ուղղությամբ ձեռք բերել գիտելիքներ, ու դրանք հնարավորություն ունենան կիրառել իրենց մասնագիտության մեջ՝ միևնույն ժամանակ ստանալով վկայականներ»,-իր խոսքում ասաց Դավիթ Խիթարյանը:
Ինստիտուտի աշխատակից, մարմնամարզության, սպորտային պարերի, գեղասահքի և շախմատի ամբիոնի դոցենտ Քրիստինա Քեշիշյանը կարևորում է ֆիթնես մարզիչների պատրաստման ծրագրի դերը:
«Ծրագիրը եզակի է ՀՀ-ում: Նմանատիպ նախադեպն ունեցող ծրագիր չենք ունեցել: Այսօր շատ արդիական է դարձել ֆիթնես մարզումներն ու մասսայական սպորտը, ինչպես նաև առողջարարական մարզումները: Նախորդ տարի համոզվեցինք, որ առողջ ապրելակերպը շատ կարևոր է մարդու համար: Այսինքն ինչ ենք հասկանում առողջ ապրելակերպ ասելով: Մարզումներ, սնունդ, և հանգստի կազմակերպում: Իսկ մարզումներն այն մարդկանց համար, ովքեր երբևէ սպորտով չեն զբաղվել, գիտենք, որ շատ կարևոր է: Մենք մեծ կարևորություն ենք տալիս ոչ ֆորմալ կրթությանը: Անհրաժեշտ ենք համարում, որ ՀՀ-ում լինեն ֆիթնեսի վերապատրաստման դասընթացներ բարձր որակյալ գիտելիքներ տրամադրելու համար»,-նշեց Քեշիշյանը:
Նրա խոսքով այսօր շատ ֆիթնես ակումբներում աշխատում են մարդիկ, ովքեր չունեն մասնագիտական գիտելիքներ.
«Այսօր շատ մարզիչներ չունեն համապատասխան կրթություն: Մենք գործ ունենք մարդկանց առողջության հետ և հարկավոր է ունենալ գրագետ մասնագետներ, իսկ այդ գիտելիքը մեզ կարող է տրամադրել միայն ֆիզիկական կուլտուրայի ինստիտուտը: Այսօր շատերը, որ բացարձակ գիտելիքներ չունեն ֆիզիկական դաստիրակության, ուսուցման, ֆիզիոլոգիայի, անատոմիայի մասին, որոշում են մեկ շաբաթում դառնալ մարզիչ: Բնականաբար նրանց աշխատանքային պրոցեսում բազմաթիվ խնդիրներ կլինեն, քանի որ մարզումներից հետո հաճախ հարցեր են առաջանում՝ այս վարժությունն ինչպե՞ս կազդի մարզվողի վրա կամ կարելի՞ է այն կատարել՝ թե ոչ: Այդ դեպքում մարզիչը ցույց է տալիս, որ չունի համապատասխան գիտելիքներ, իսկ եթե ուզում ենք լինել որակյալ մարզիչ, պետք է ունենանք խորը գիտելիքներ: Ցավով նշում եմ, որ կան շատ ֆիթնես մարզիչներ, ովքեր բացարձակ կրթություն չունեն ու նույնիսկ վերապատրաստումներ չեն անցել և այսօր նրանք մարզում են մեր բնակչությանն ու այդ մոտեցումը կարող է շատ վնասվածքների հետևանք դառնալ»,-ասաց Քեշիշյանը:
Ծրագրի կազմակերպիչները նշեցին, որ այս քայլով ցանկանում են հետագայում պարտադիր դարձնել ֆիթնես ակումբներում մարզչական լիցենզիան:
«Սա առաջին քայլն է լինելու: Հետագայում ցանկանում ենք դիմել օրենսդրական փոփոխություններ կատարելու համար: Այսինքն ֆիթնես ակումբներում մարզիչ աշխատելու համար պարտադիր է լինելու անցնել լիցենզավորում: Երբ առաջին փորձն իր արդյունքը տա, ավելի համարձակ կգնանք այդ օրենսդրական փոփոխություններին»,-ասաց կազմակերպիչներից մեկը:
Դասընթացները տևելու են մոտ 3 ամիս և դրանց կարող են մասնակցել բոլորը: Դասընթացներից հետո մասնակիցները ստուգարքային քննություն կհանձնեն, որից հետո միայն կստանան լիցենզիան:
«Համոզված եմ որ կունենանք հագեցած գիտելիքներով մասնագետներ: Մենք դա կապացուցենք գործնականում, քանի որ ամեն փուլից հետո ստուգարքային քննություն է լինելու և եթե մասնակիցը չկարողանա դա անցնել՝ չի ստանա անհրաժեշտ սերտիֆկատը: Մենք խիստ ենք պահանջելու մեր շրջանավարտներից: Ֆիթնեսն անընդհատ զարգանում է, և մենք պետք է համապատասխան քայլենք այս ոլորտի հետ: Այն, որ այս ծրագրի շրջանավարտներին տրվելու է պետական ԲՈՒՀ-ի կողմից տրված վկայական՝ դա արդեն մեծ առավելություն է»,-եզրափակեց Քեշիշյանը:
Երվանդ ՀԱԿՈԲՅԱՆ
