«Նախորդ տարիների համեմատ այս անգամ առաջնությանը ավելի հանգիստ էի մոտեցել՝ այն ժամանակվա մոտիվացիան ու լարվածությունը չկար, ու դրա համար կար մի քանի պատճառ»,-այս մասին ArmSport-ի հետ զրույցում ասաց շախմատի Հայաստանի քառակի չեմպիոն, 2021-ի թվականի Հայաստանի առաջնությունում 3-րդ տեղը գրաված, գրոսմայստեր Մարիա Գևորգյանը.
Շախմատի Հայաստանի կանանց առաջնությունը մինչև վերջին տուրը լարվածության մեջ պահեց մտքի խաղի սիրահարներին: Առաջնության ավարտից ընդամենը մեկ տուր առաջ Մարիա Գևորգյանը գլխավորում էր մրցաշարային աղյուսակը, սակայն վերջին տուրում ամեն ինչ գլխիվայր շրջվեց և Գևորգյանը զբաղեցրեց 3-րդ հորիզոնականը.
«Վերջին տուրում միայն հաղթանակն էր պետք չեմպիոնության համար: Հաղթած դիրք ունեի Սիրանույշ Ղուկասյանի հետ պարտիայում, բայց մեկ-երկու սխալ քայլը ամբողջվին փոխեց պարտիայի ընթացքը: Ինձ համար պարտվելն ու ոչ-ոքին նույնն էր, քանի որ երկու դեպքւոմ էլ չէի կարողանա առաջին տեղը պահել, ուստի միայն հաղթանակ էր անհրաժեշտ: Շանսեր էի փնտրում որ հաղթեի, բայց պարտվեցի»,-ասում է Գևորգյանը:
Մարիա Գևորգյանը գոհ չէ իր արդյունքից, սակայն նրա խոսքով, անհաջող ելույթներն ունեն օբյեկտիվ պատճառներ.
«Ինձ մոտ երևի պատերազմական ապրումները դեռ կային: Բացի այդ մոտիվացիայի պակաս կար: Նախորդ տարի չեմպիոն էի դարձել ու այսպես ասած՝ «չեմպիոնության ոչ մի բանից չեմ օգտվել», քանի որ ոչ մի միջազգային մրցաշար չկայացավ, հետաձգվեց նույնիսկ Օլիմպիադան: Ընդհանուր առմամբ վատ չէի խաղում, բայց չստացվեց: Առաջին երկու պարտիան խաղալուց հետո վստահություն եկավ մոտս, բայց հետո ամեն ինչ մի փոքր վատ ընթացող»,-ասում է Հայաստանի քառակի չեմպիոնը:
Վերջին մեկ տարում Մարիա Գևորգյանը մասնակցել է տարբեր մրցաշարերի, սակայն ամբողջը եղել է օնլայն տարբերակով. «Տարբերությունը շատ մեծ է համակարգչով խաղալու և խաղատախտակի առջև նստած: Վերջինին ավելի լուրջ ես վերաբերվում: Մինչև մրցաշարը դեպք եղավ, երբ խնդիրը լուծել փորձեցի տախտակի վրա ու չկարողացա, բայց համակարգչով ստացվեց: Դա նրանից էր, որ արդեն սովորել էինք համակարգչով խաղալուն»,-նշում է Գևորգյանը:
Ամփոփելով առաջնությունը Մարիա Գևորգյանը նշում է. «Ամեն տարի մասնակիցները գնալով ուժեղանում են: Այս տարի լավ խաղացին Վերոնիկա Խաչատրյանը, Մարիամ Մկրտչյանը: Ինձ համար վճռորոշ եղավ նաև Սուսաննա Գաբոյանի հետ պարտիան: Այսինքն ընդհանրապես պարզ չէր, թե ով է ֆավորիտ: Ամեն ինչ անկանխատեսելի էր»,-ասում է շախմատիստը:
Հավաքականի առաջատարի խոսքով նախորդ տարիներին այս արդյունքն ավելի ծանր կտաներ. «Նախորդ տարիներին այս պարտությունն ավելի ծանր կտանեի, բայց հետպատերազմական երևույթներից հետո արժեհամակարգս փոխվել է ու այս անհաջողություններին ավելի թեթև եմ սկսել նայել, չնայած որ միշտ հետևություններ եմ անում պարտություններից ու սխալներից»,-եզրափակեց Գևորգյանը:
Երվանդ ՀԱԿՈԲՅԱՆ
