Հայկական ակումբային ֆուտբոլի ամենավատ եվրոպական մրցաշրջաններից մեկը մեզ համար, չսկսված, գրեթե ավարտվեց: Ինչու՞ գրեթե, քանի որ դեռ «Արարատ-Արմենիան» պետք է խաղա ԵԼ-ի որակավորման երկրորդ փուլում: Սակայն, նույնատիպ խաղ ցուցադրելով, գործող չեմպիոնը դժվար հեռու գնա:
Արդեն խոսել էինք այն մասին, որ ՉԼ-որակավորման առաջին փուլում «Արարատ-Արմենիան» պարտվել է «Օմոնիային»: Ի դեպ, «Օմոնիան» ՉԼ-ի որակավորման երկրորդ փուլում, կրկին հյուրընկալվելիս, կրկին լրացուցիչ ժամանակում, հաղթեց ոչ ավել, ոչ պակաս «Լեգիային» և այժմ ՉԼ-ի որակավորման երրորդ փուլում է:
Երեկ պայքարի մեջ մտավ հայկական ևս երեք ակումբ: Այստեղ արդեն պարտությունը կնշանակեր հրաժեշտ 2020/21 մրցաշրջանի եվրոպական շրջագայությանը: Խաղերի ժամերը իդեալական դասավորված էին՝ մեկը մյուսի հետևից:
- «Կայրաթ»-«Նոա»
Առաջինը պայքարի մեջ մտավ Երևանի «Նոան»՝ հյուրընկալվելով «Կայրաթին»: Խաղի մեկնարկը շատ լավ ստացվեց մեզ համար: 8-րդ րոպեին խորամանկ Կիրիլ Բոռը փոխանցում-հարվածով Ստաս Պոկատիլովին ստիպեց գնդակը հանել սեփական դարպասից: Սակայն, մեր ուրախությունը երկար չտևեց: 3 րոպե անց Ալիկուլովը, օգտվելով Կագերմազովի դիրքային սխալից ու Կրյուչկովի պասիվ պաշտպանվելուց, հեշտությամբ վերականգնեց հաշվի հավասարակշռությունը: Գոլերով փոխանակվելուց հետո խաղում հարաբերական անդորր տիրեց: Մեր թիմը, արդարության համար պետք է նշենք, որ առաջին խաղակեսում գրեթե ոչնչով չզիջեց մրցակցին: Ընդունած գոլից րոպեներ անց, 1-1 հաշվի պայմաններում, անկյունայինի իրացումից հետո Միխաիլ Կովալենկոն գրավեց մրցակցի դարպասը, սակայն եզրային մրցավարը խաղից դուրս վիճակ «հորինեց», իսկ գլխավոր մրցավարը չհաշվեց գոլը: Իրականում, մեծ վստահությամբ կարող ենք նշել, որ խաղից դուրս վիճակ չկար ու մրցավարները «գողացան» մեր գոլը: Չտեսանք, պրոֆեսիոնալ կրկնապատկեր կամ, միգուցե, ղազախները չցանկացան, որպեսզի տեսնենք: 35-րդ րոպեին բազմափորձ Վագներ Լավը վարպետորեն խաղաց մեր տուգանային հրապարակում ու մոտ տարածությունից «ռմբակոծեց» դարպասը՝ 2-1: Առաջին խաղակեսի վերջում տուգանայինի իրացումից հետո Կովալենկոյի հետ պայքարում մրցակցի պաշտպանը շեղեց գնդակը դեպի դարպասը, սակայն Պոկատիլովը կրկին փրկեց «Կայրաթին»: Երկրորդ խաղակեսը «Կայրաթը» սկսեց այնպես, կարծես՝ առաջին կեսից հետո պարտվում էր. բարձր պրեսինգ, խաղ՝ առաջին համարով ու մեզ թույլ էր տալիս հակագրոհել: «Կայրաթը» չցանկացավ հետ քաշվել ու պահել հաշիվը, ինչի արդյունքը եղավ այն, որ 70-րդ րոպեին, օգտվելով Էմսիսի սխալից, Վագներ Լավը դուբլ ձևակերպեց և մեզ համար թողեց միայն տեսական «աղոտ» հնարավորություն: «Նոան» նետվեց առաջ, սակայն գրոհներն արդեն հախուռն էին, չօգնեցին նաև փոփոխությունները:
Ավելացված 4-րդ րոպեին ևս մեկ ոչ պարտադիր գոլ բաց թողեցինք. Վագներ Լավի եզրից կատարած փոխանցմանն արձագանքեց Հաբիբ Էսեոլան՝ 4-1:
«Նոայի» առաջին եվրագավաթային փորձն անհաջող էր: Մեր թիմը պայքարեց, սակայն կար փորձի պակաս, բախտ չունեցավ, խանգարեցին մրցավարները:
- «Ալաշկերտ»-«Ռենովա»
«Նոայի» խաղից հետո հուսալքված շտապեցինք «Հանրապետական» մարզադաշտ՝ մեծ հույսով, որ «Ալաշկերտը» հաղթելու է, և մի փոքր կփարատվենք: Սակայն, եթե «Կայրաթ»-«Նոա» սցենարներից մեկն այն էր, որ «Կայրաթը» կհաղթի, ապա այստեղ հնարավոր պարտության մասին ոչ-ոք չէր ցանկանում լսել, և դա, իրոք, օբյեկտիվ կարծիք էր:
Մելիքյանը խաղը սկսեց 5 պաշտպանով՝ եզրերում ամբողջ երկայնքով ազատություն տալով պաշտպաններին: Առաջին խաղակեսում, և ընդհանրապես ամբողջ խաղում, թելադրողի դերում հայկական թիմն էր: Մրցակիցը մեկ վտանգավոր պահ ստեղծեց առաջին խաղակեսում, սակայն Չանչարևիչը փրկեց «Ալաշկերտին»: «Ռենովան» հրաշալի տեսք ուներ, երբ գնդակով էր. արագ ու ճշգրիտ փոխանցումներ՝ հիմնականում, իսկ երկրորդ հարկում մրցակիցը բազմիցս գերազանցեց մեր թիմին: Երկրորդ խաղակեսի 13-րդ րոպեին անկյունայինի խաղարկումը ճակատագրական եղավ մեր թիմի համար. Միշկովսկին խփեց, ինչպես հետագայում պարզվեց, խաղի միակ ու հաղթական գնդակը: Որքան ժամանակը մոտենում էր ավարտին, «Ալաշկերտը» հայտնվում էր ցայտնոտում: Փոփոխություններ, որոնք ոչինչ չփոխեցին: Պապիկյանը որոշակի ակտիվություն մտցրեց խաղում, սակայն միայն այդքանը: Պապե Կամարան հիմնականում հերթապահում էր մրցակցի տուգանային հրապարակում, սակայն նրա ուղղությամբ փոխանցումները չէին հասնում նպատակին: «Ալաշերտը» անատամ խաղով պարտվեց և իր եվրագավաթային պատմության ընթացքում առաջին անգամ ասպարեզը լքեց առաջին փուլից հետո:
- ՖԱՍԲ-«Շիրակ»
«Շիրակին», հայկական թիմերի շրջանակում, ամենաբարդ մրցակիցն էր բաժին ընկել: «Շիրակը» մրցավայր գործուղեց իր հիմնական կազմին: Մի բան փաստ է, «Շիրակը» խաղաց այնքան, որքան մրցակիցը թույլ տվեց: Մեր թիմը մի քանի լավ հնարավորություն ունեցավ, սակայն չօգտագործեց: Երբեմն, լավ էր խաղում մրցակցի դարպասապահը. օրինակ՝ Նենադովիչի հեռահար հարվածից հետո: Ընդհանրապես, առաջին խաղակեսում «Շիրակի» կազմում լավագույններից Ուրոշ Նենադովիչն էր:
Պասիվ էր «Շիրակի» հարձակման գծի առաջատար Մորի Կոնեն: «Շիրակի» խաղը դժվար է ինչ-որ հատվածների բաժանել: Մեր թիմը դարպասն անառիկ պահեց 33 րոպե: 34-րդ, 65-րդ և 83-րդ րոպեներին մրցակցի խփած գոլերը տվեցին խաղի վերջնական պատկերը՝ 3-0:
Մեր թիմերն այս պահի դրությամբ, ընդհանուր առմամբ, անցկացրել են 4 հանդիպում, կրել՝ նույնքան պարտություն, խփել են մեկ, ընդունել՝ 8 գնդակ: Այս պահի դրությամբ, Եվրոպական ասպարեզում սա հայկական ակումբային ֆուտբոլի պատկերն է 2020/21 մրցաշրջանում:
Արմեն Գարամյան
