Թոփ-ակումբների տրանսֆերային հասույթները դեռ շահույթ չեն

Թոփ-ակումբները շատ փող են աշխատում, բայց էլ ավելի շատ ծախսում են։

Transfermarkt պորտալը, որը նշում է իր 20-ամյակը, հաշվել է ակումբների տրանսֆերային բալանսները 2000/01 մրցաշրջանից սկսած։ Պորտալի վարկանիշում միանգամից 10 ակումբներ են, որոնք երկու տասնամյակում ֆուտբոլիստների վաճառքից ավելի քան 1 միլիարդ եվրո են աշխատել։ Ընդ որում, դրանք խաբուսիկ թվեր են, որոնք հաճախ ոչ մի կերպ չեն վկայում այն մասին, որ թոփ-ակումբները, իսկապես, շահույթ են ստանում ֆուտբոլիստների վաճառքից։ Չէ որ, օրինակ, «Յուվենտուսը», «իրացնելով» խաղացողներին ավելի քան 1,3 միլիարդ եվրոյով, շատ ավելի մեծ գումարներով գնել է։ Այնպես որ, թուրինցիների տրանսֆերային շուկայից ստացած մաքուր բալանսը այս դարի սկզբից մինուս 650 մլն եվրո է։

Transfermarkt-ը հրապարակելով ֆուտբոլային ակումբների տրանսֆերային հաշվեկշիռների ամփոփ աղյուսակը՝ սկսած 2000/01 մրցաշրջանից, շեշտը դրել է այն հանգամանքի վրա, թե որքան հասույթ է հաջողվել թիմերին ստանալ՝ ֆուտբոլիստների վաճառքից: Ֆուտբոլիստների տրանսֆերներից ամենից շատ աշխատել է «Յուվենտուսը»՝ 1,33 մլրդ եվրո։ Երկրորդ տեղում «Չելսին» է՝ 1,22 մլրդ։ Թոփ-տասնյակում նաև հայտնվել են «Մոնակոն»՝ 1,18 մլրդ, «Բենֆիկան»՝ 1,16, «Ատլետիկոն»՝ 1,13, «Պորտուն»՝ 1,12, «Ինտերը»՝ 1, 10, «Ռեալը»՝ 1,09, «Բարսելոնան»՝ 1,08 ու «Ռոման»՝ 1,03։

Ինչպես երևում է՝ թոփ-10-ի բոլոր ներկայացուցիչները կարողացել են խաղացողներին վաճառել ընդհանուր ավելի քան 1 միլիարդ եվրոյով։ 1 միլիարդին չի կարողացել հասնել 11-րդ տեղում հայտնված «Լիվերպուլը» (988 մլն եվրո)։

Թոփ-25-ում տեղ գտած ՊՍԺ-ն ֆուտբոլիստների վաճառքից ստացել է 603 մլն եվրոյից մի փոքր ավելի։ Սակայն տպավորիչ վաճառքները չեն նշանակում ֆուտբոլիստների իրացումից ստացած շահույթ։

Բոլոր թոփ-ակումբները խաղացողների գնելու վրա շատ ավելի են ծախսում, քան ստանում են վաճառքից։

Արդյունքում «Յուվենտուսի» տրանսֆերային բալանսը 20 տարում կազմել է մինուս 650 մլն եվրո։ «Չելսիի» կորուստներն ավելի տպավորիչ են՝ 948 մլն եվրո։ Իսկ «Ռեալն» ու ՄՅՈՒ-ն (վերջինիս շահույթը վաճառքից՝ 699 մլն եվրո է) համապատասխանաբար 1,048 ու 1,076 միլիարդ եվրոյի կորուստ են կրել։

Թոփ-10 ակումբներից միայն 3-ն են շահող դուրս եկել տրանսֆերային շուկայում՝ «Մոնակոն»՝ 141 մլն եվրո, ինչպես նաև «Բենֆիկան» ու «Պորտուն»՝ համապատասխանաբար 602 ու 551 մլն եվրո։