Տեղի է ունեցել Միջազգային Օլիմպիական կոմիտեի (ՄՕԿ) գործկոմի հեռավար նիստը։ Նիստի ժամանակ քննարկվել է համաճարակի հետևանքով օլիմպիական շարժման վրա ազդեցություն ունեցած ֆինանսական խնդիրը։
Գործկոմը հաստատել է մինչև 800 միլիոն դոլար աջակցության փաթեթը, որը կուղղվի կորոնավիրուսի ազդեցության հաղթահարմանը։ Դրանից 65 մլն դոլարը կտրամադրվի ՕԽ-ի հետաձգման պատճառով առաջացած լրացուցիչ ֆինանսական խնդիրները լուծելուն։ Գումարից 150 մլն դոլարը կտրամադրվի միջազգային ֆեդերացիաներին և ԱՕԿ-ներին։
Նախկինում ՄՕԿ-ը նշել էր, որ լրացուցիչ 3 մլր դոլար կպահանջվի խաղերի հետաձգման պատճառով առաջացած խնդիրները լուծելու համար։
Ավելի վաղ հայտնի էր դարձել, որ ՄՕԿ-ը տևական ժամանակ չէր համաձայնում հետաձգել խաղերը՝ հիմնականում սպասվող ֆինանսական կորուստների պատճառով։ Ամենամեծ վնասը կրել է Ճապոնիան․ երկիրը նախապատրաստության վրա ծախսել է ավելի քան 13 միլիարդ դոլար: Իսկ որոշ աուդիտորական ընկերությունների կողմից նշվում է նույնիսկ մինչև 28 մլրդ դոլարի կորուստների մասին։
Ըստ Коммерсантъ-ի, ՄՕԿ-ի նախագահ Թոմաս Բախը նշել է, որ ներկա դրությամբ կազմակերպությունը իր ռեզերվներում ունի ավելի քան 2 մլրդ դոլար, և ՄՕԿ-ը ի վիճակի է ներկայումս ինքնուրույն լուծել առկա ֆինանսական խնդիրները։ Թոմաս Բախը շեշտել է, որ խաղերի անցկացման ժամկետները հետագայում կրկին չեն փոխվի և վստահություն է հայտնել, որ խաղերը կսկսվեն 2021-ի հուլիսի 21-ին և դրանք անվտանգ կլինեն մասնակիցների համար։
Հիշեցնենք՝ Տոկիոյի Օլիմպիական խաղերը մեկ տարով հետաձգվեցին և կանցկացվեն 2021 թվականի ամռանը՝ հուլիսի 23-ից օգոստոսի 8-ը:
