Իսպանիայի արքայական ֆուտբոլի ֆեդերացիայի տնօրենների խորհուրդը, Ռաֆայել Լոուսանի գլխավորությամբ, միաձայն հաստատել է ազգային հավաքականի գլխավոր մարզիչ Լուիս դե լա Ֆուենտեի պայմանագրի երկարաձգումը։ Իսպանացի մասնագետը կշարունակի գլխավորել «Ֆուրիա Ռոխան» ևս 6 տարի՝ մինչև 2032 թվականը։
Այս որոշումն ընդունվել է 2026 թվականի Աշխարհի առաջնությունում Իսպանիայի հավաքականի տպավորիչ հաղթանակից հետո: Թեև նախկինում լուրեր էին շրջանառվում, որ մարզչի նոր համաձայնագիրը նախատեսված կլինի մինչև 2030 թվականը, ֆեդերացիան որոշել է ավելի երկարաժամկետ վստահություն հայտնել իրենց համակարգի սանին:
2022 թվականից ազգային հավաքականի ղեկը ստանձնած Դե լա Ֆուենտեն արդեն իսկ կերտել է պատմական դարաշրջան. նրա գլխավորությամբ իսպանացիները նվաճել են Ազգերի լիգայի (2022/23), Եվրո-2024-ի և ԱԱ-2026-ի գավաթները՝ գրանցելով պատմության մեջ ամենաերկար անպարտելի շարքը:
«Մենք նպատակ ունենք կառուցել կայունության և վստահության վրա հիմնված նախագիծ։ Սա Լուիս դե լա Ֆուենտեի և նրա գլխավորած սպորտային նախագծի նկատմամբ լիակատար վստահության դրսևորում է։ Մենք խոսում ենք հավաքականի պատմության ամենատիտղոսակիր մարզչի մասին, և մեր տանն անցկացրած 14 տարիներից հետո նա միանգամայն արժանի է այս երկարաժամկետ ապագային», — նշել է RFEF-ի նախագահ Ռաֆայել Լոուսանը:
Ինչպես նշվում է RFEF-ի մամուլի ծառայության տարածած հաղորդագրության մեջ, պայմանագրի երկարաձգումը ապահովում է անհրաժեշտ հաջորդականությունը նոր ցիկլում, որը հիմնված է «աշխատասիրության, համեստության, միասնության և թիմային ոգու վրա»։
Նոր պայմանագրով Դե լա Ֆուենտեն թիմը կնախապատրաստի գալիք երկու Եվրոպայի առաջնություններին (2028 և 2032 թթ.), ինչպես նաև 2030 թվականի Աշխարհի առաջնությանը, որն Իսպանիան կհյուրընկալի Պորտուգալիայի, Մարոկկոյի, Պարագվայի, Ուրուգվայի և Արգենտինայի հետ համատեղ:
Աշխարհի չեմպիոնների համար հաջորդ մարտահրավերը ՈւԵՖԱ-ի Ազգերի լիգայի նոր խաղարկությունն է, որի շրջանակներում սեպտեմբերին և հոկտեմբերին իսպանացիները ուժերը կչափեն Անգլիայի, Խորվաթիայի և Չեխիայի հավաքականների հետ։
Հավելենք նաև, որ Լաս Ռոսասում կայացած ժողովի ընթացքում ֆեդերացիան հաստատել է ևս մեկ կարևոր որոշում՝ մինչև 2029 թվականի հուլիս երկարաձգելով Իսպանիայի ֆուտզալի ազգային հավաքականի գլխավոր մարզիչ Խեսուս Վելասկոյի պայմանագիրը։ Երկու մարզիչների նոր համաձայնագրերի պաշտոնական շնորհանդեսը տեղի կունենա առաջիկա օրերին՝ իսպանական ֆուտբոլի ներկայացուցիչների մասնակցությամբ։
