ՊՍԺ-ի և Իսպանիայի հավաքականի հարձակվող Ֆերան Տորեսը իսկական իրարանցում է առաջացրել սոցիալական ցանցերում՝ անելով բավականին խորհրդավոր և անսպասելի հրապարակում։
Ինստագրամի իր էջի «Սթորի» բաժնում 26-ամյա ֆուտբոլիստը սև ֆոնի վրա գրել է ընդամենը մեկ նախադասություն՝ առանց որևէ բացատրության կամ լրացուցիչ մանրամասների․
«Ես տևական ժամանակ մտածում էի այս մասին և ուզում եմ տեղեկացնել, որ հաջորդ շաբաթ դուք իմ դեմքը չեք տեսնի»։
Այս կարճ հաղորդագրությունը բավական էր, որպեսզի շփոթության ալիք բարձրանա երկրպագուների շրջանում՝ հատկապես հաշվի առնելով այն նուրբ պահը, երբ արվել է գրառումը։ Բանն այն է, որ Տորեսի ուղերձը համընկել է Իսպանիայի հավաքականի գլխավոր մարզիչ Լուիս դե լա Ֆուենտեի կողմից Ազգերի լիգայի առաջիկա խաղերի համար հրավիրված ֆուտբոլիստների ցուցակի հրապարակման հետ։
Աշխարհի չեմպիոն իսպանացին ընդգրկված է այդ ցանկում, և սա լրացուցիչ հարցեր է առաջացնում «Ֆուրիա Ռոխայի» կազմում նրա հնարավոր բացակայության վերաբերյալ։
Այս առեղծվածը էլ ավելի անսպասելի է դառնում նրա ֆանտաստիկ մարզավիճակի ֆոնին։ Հիշեցնենք, որ այս ամռանը «Բարսելոնայից» 50 միլիոն եվրոյի դիմաց ՊՍԺ տեղափոխված հարձակվողը փայլուն մեկնարկ է գրանցել նոր ակումբում։ Եվրոպայի գործող կրկնակի չեմպիոնի կազմում նա արդեն հասցրել է դառնալ 6 գոլի հեղինակ անցկացրած ընդամենը 5 հանդիպումներում (3 գոլ ներքին առաջնությունում և ևս 3-ը՝ Չեմպիոնների լիգայում)՝ դառնալով մրցաշրջանի մեկնարկում թիմի գլխավոր դեմքերից մեկը։
Ի՞նչ է իրականում թաքնված այս հայտարարության հետևում։ Արդյոք դա կապված է ազգային հավաքականի հետ, զուտ անձնակա՞ն որոշում է, թե՞ պարզապես ֆուտբոլիստը ցանկանում է ժամանակավորապես հեռանալ սոցիալական ցանցերից։ Հնարավոր է նաև, որ սա ընդամենը կատակ կամ ինչ-որ նոր նախագծի անակնկալ նախապատրաստություն է։
Առայժմ ոչ ֆուտբոլիստը, ոչ ՊՍԺ-ն և ոչ էլ Իսպանիայի ֆուտբոլի ֆեդերացիան որևէ պաշտոնական մեկնաբանություն չեն տվել հարցի վերաբերյալ։ Ֆուտբոլային աշխարհին մնում է միայն սպասել և հետևել իրադարձությունների զարգացմանը՝ հասկանալու համար իսպանացի աստղի «անհետացման» իրական պատճառը։
