Արգենտինայի ֆուտբոլի ասոցիացիայի (AFA) նախագահ Կլաուդիո Տապիան մեկնաբանել է ազգային հավաքականում Լիոնել Մեսսիի հնարավոր կարիերայի ավարտի վերաբերյալ լուրերը։
«Դա զուտ նրա անձնական որոշումն է։ Մենք պետք է նրան հանգիստ թողնենք։ 2022 թվականին մենք չգիտեինք՝ արդյոք նա կխաղա 2026-ին։ Նա ասաց, որ պետք է առաջ շարժվել խաղից խաղ, և կարծում եմ, որ աշխարհի առաջնությունում մենք տեսանք Լեոյի հիանալի, եթե ոչ՝ լավագույն տարբերակը: Մենք պետք է թույլ տանք, որ նա շարունակի հաճույք ստանալ ֆուտբոլից, իսկ հետո հնարավորություն տանք կայացնելու այն որոշումը, որն ինքը ճիշտ է համարում»,- Տապիայի խոսքերը մեջբերում է TyC Sports պարբերականը։
AFA-ի ղեկավարը նաև բարձր է գնահատել Մեսսիի ելույթն ԱԱ-2026-ում.
«Լեոյի համար դա հիանալի աշխարհի առաջնություն էր։ Մենք մեծ բավականություն ստացանք նրա խաղից և պետք է հպարտանանք նրանով։ Ես վայելել եմ յուրաքանչյուր ակնթարթ։ Անկասկած, աշխարհի առաջնությունում նա մեր թիմի առաջատարն էր։ Եթե վերլուծենք նրա մրցելույթները, ապա ինձ համար նա լավագույն ֆուտբոլիստն էր։ Նա ռեկորդներ էր գերազանցում խաղից խաղ»,- հավելել է Տապիան։
Հիշեցնենք, որ ավելի վաղ հաղորդվում էր, որ Մեսսին կարող է այլևս հանդես չգալ ազգային հավաքականում, սակայն ինքը՝ արգենտինացին, իր ապագայի վերաբերյալ դեռևս պաշտոնական հայտարարություն չի արել։
