Լա լիգայի նախագահ Խավիեր Տեբասը մեկնաբանել է Մադրիդի «Ռեալի» որոշումը՝ ՈւԵՖԱ-ին ներկայացնել Նեգրեյրայի գործի համատեքստում «Բարսելոնայի» օգտին թույլ տրված մրցավարական սխալների վերաբերյալ զեկույց։
«Ես դեռ չեմ տեսել այդ զեկույցը, բայց շատ եմ ցանկանում կարդալ: Ուզում եմ տեսնել, թե որ թվից սկսած են նրանք բողոքում, արդյոք բողոքում են բոլոր ակումբների, այդ թվում՝ հենց Մադրիդի «Ռեալի» դեմ թույլ տրված սխալներից: Եթե կա մի ակումբ, որն իրավունք չունի բողոքելու մրցավարական սխալներից, ապա դա Մադրիդի «Ռեալն» է»,- Տեբասի խոսքերը մեջբերում է Mundo Deportivo-ն:
Հիշեցնենք, որ 2023 թվականին «կապտանռնագույններին» մեղադրանք էր առաջադրվել Իսպանիայի թագավորական ֆուտբոլի ֆեդերացիայի (RFEF) մրցավարների տեխնիկական կոմիտեի (CTA) նախկին փոխնախագահ Խոսե Մարիա Նեգրեյրային կաշառելու համար։ «Բարսելոնան» մեղադրվում էր 2001-ից 2018 թվականներն ընկած ժամանակահատվածում մոտ 8,4 միլիոն եվրոյի չափով նշված վճարումներն իրականացնելու մեջ։
Ըստ կատալոնական ակումբի վարկածի՝ Նեգրեյրան վարձվել էր որպես արտաքին խորհրդատու՝ մրցավարության վերաբերյալ տեխնիկական հաշվետվություններ կազմելու համար։ CTA-ի նախկին փոխնախագահն իր հերթին հերքում է, որ իրեն կաշառել են՝ մրցավարների վրա ազդելու նպատակով։
