Բրիտանացի հայտնի հեռուստահաղորդավար Պիրս Մորգանը ռադիոյի ուղիղ եթերում բուռն բանավեճ է ծավալել Կրիշտիանու Ռոնալդուի մեծության շուրջ:
Հիշեցնենք, որ Պորտուգալիայի ազգային հավաքականի 41-ամյա հարձակվողը դուբլի հեղինակ էր դարձել ԱԱ-2026-ի խմբային փուլի երկրորդ տուրի՝ Ուզբեկստանի դեմ խաղում (5:0):
Պիրս Մորգան․ «Բարի լույս: Ինչպիսի՜ հրաշալի օր է ապրելու համար, պարոնայք: Գիտե՞ք ինչ, երեկ, երբ ես շարունակում էի կանխատեսումներ անել, որ Ռոնալդուն գոլ է խփելու և հիմար դրության մեջ է դնելու իր բոլոր քննադատներին, որդիներս ասացին ինձ. «Պա՛պ, հավանաբար, չափն անցնում ես: Իսկ ի՞նչ, եթե նա գոլ չխփի»։ Իսկ ես պատասխանեցի. «Դուք պարզապես չգիտեք Կրիշտիանու Ռոնալդուին»։
Վերջին չորս-հինգ օրերին ամբողջ աշխարհը ծաղրում էր նրան, ատում էր, դուրս էր գրել հաշիվներից, ասում էին, որ նա արդեն սպառել է իրեն, որ նա Պորտուգալիային ներքև է քաշում և այլն: Իսկ երեկ երեկոյան նա նորից ապացուցեց աշխարհին, որ համաշխարհային ֆուտբոլի պատմության մեջ գրոհների ամենասառնասիրտ և փայլուն եզրափակողն է: Եվ ով այլ կերպ է մտածում, ըստ իս, պարզապես ապրում է երևակայության աշխարհում։
Տղան 41 տարեկան է: Այն երկու գոլերը, որոնք նա խփեց, հպարտության առիթ կլինեին անգամ այն ժամանակ, երբ նա 21 տարեկան էր: Եվ գիտեք, տեսնելով այն, ինչ Ռոնալդուն արեց անցած գիշեր, անհնար է չհամաձայնել ինձ հետ: Նա ամենևին էլ չի սպառել իրեն: Իր 41 տարեկանում նա բառացիորեն նորովի է սահմանում այն սահմանները, թե որքան երկար կարելի է ֆուտբոլ խաղալ»:
Ռադիոհաղորդավար Էնդի Գոլդշտեյն․ «Այն դեպքի համար, եթե ինչ-որ մեկը նոր է միացրել ռադիոն, նշեմ՝ Պիրսը խոսում է ոչ թե աշխարհի առաջնության եզրափակչի մասին: Սա Ուզբեկստանի դեմ խաղն էր: Եկեք չմոռանանք այդ մասին»:
Պիրս Մորգան․ «Դեռևս եզրափակիչը չէ: Դեռևս: Բայց, գիտեք, եթե ամեն ինչ ընթանա այնպես, ինչպես հիմա, Անգլիան միանգամայն կարող է շատ շուտով հանդիպել Պորտուգալիային: Եվ, անկեղծ ասած, հաշվի առնելով, թե ինչպես էին նրանք խաղում երեկ գիշեր… Այո՛, դա Ուզբեկստանն էր: Բայց չէ՞ որ դուք բոլորդ նախկինում հիանում էիք, երբ Մեսսին գոլեր էր խփում երկրորդ կարգի թիմերին: Իսկ հիմա հանկարծ, երբ Ռոնալդուն գրավում է Ուզբեկստանի դարպասը, դա այլևս չի՞ հաշվվում»։
