Տոկիո 2020-ի կազմկոմիտեի ղեկավար Յոշիրո Մորին խոստովանել է, որ մինչև 2021 թվականը հետաձգված Օլիմպիական խաղերը հնարավոր է ընդհանրապես չեղյալ հայտարարվեն, եթե այդ ժամանակ կորոնավիրուսը դեռ սպառնա մարդկանց առողջությանը: Ֆունկցիոնալ գործչին մեջբերում է Nikkansports-ը:
«Ոչ, այդ դեպքում ՕԽ-ն կչեղարկվի», — պատասխանեց Մորին այն հարցին, թե հնարավո՞ր է, որ Օլիմպիական խաղերը հետաձգվեն ևս մեկ տարով:
Կազմակերպչական կոմիտեի ղեկավարը հիշեցրել է, որ պատերազմական տարիներին ՕԽ-ն չեղյալ էր հայտարարվել, իսկ այժմ մարդկությունը պայքարում է անտեսանելի թշնամու դեմ:
Ավելի վաղ, Յոշիրո Մորին ասել էր, որ եթե կորոնավիրուսի սպառնալիքը շարունակվի, անհնար կլինի ևս մեկ անգամ վերանայել ամառային Օլիմպիական խաղերի անցկացման ժամկետները:
Առողջապահության ոլորտի որոշ ներկայացուցիչներ վստահ են, որ Օլիմպիական խաղերը կարող են անցկացվել միայն այն դեպքում, եթե կորոնավիրուսի դեմ պատվաստանյութը հայտնվի մինչ Խաղերի մեկնարկը։
Հիշեցնենք՝ Տոկիոյի Օլիմպիական խաղերը մեկ տարով հետաձգվեցին և կանցկացվեն 2021 թվականի ամռանը՝ հուլիսի 23-ից օգոստոսի 8-ը:
Տոկիոյի Օլիմպիական խաղերի տեղափոխումը 2021 թ․ ՄՕԿ-ի համար կարժենա մի քանի հարյուր միլիոն դոլար: Այս մասին հայտարարել էր ՄՕԿ-ի նախագահ Թոմաս Բախը՝ welt.de-ին։ Դեռ հաշվարկ չի կատարվել, բայց փաստ է, որ լրացուցիչ մեծ ծախսեր կառաջանան։ ՄՕԿ-ը տևական ժամանակ չէր համաձայնում հետաձգել խաղերը՝ հիմնականում սպասվող ֆինանսական կորուստների պատճառով։ Ամենամեծ վնասը կրել է Ճապոնիան․ երկիրը նախապատրաստության վրա ծախսել է ավելի քան 12 միլիարդ դոլար:
